Gall y Cyngor ddiddymu, newid neu ychwanegu at y rhannau hynny o'r Rheolau Sefydlog hyn nad ymgorfforir ynddynt gymalau o'r Siarter, Ystatudau neu Ordinhadau, ar yr amod bod telerau'r newid a gynigir wedi'u dosbarthu i'r aelodau o leiaf wythnos cyn y cyfarfod o'r Cyngor lle y bwriedir eu hystyried, ac ar yr amod bod y newid yn cael ei gymeradwyo gan o leiaf ddwy ran o dair o'r aelodau sy'n bresennol ac yn pleidleisio.
Gellir atal yr adrannau hynny o'r Rheolau Sefydlog hyn nad ymgorfforir cymalau o'r Siarter, Ystatudau neu'r Ordinhadau ynddynt ar gyfer eitem neilltuol o fusnes drwy bleidlais dwy ran o dair o'r aelodau sy'n bresennol ac yn pleidleisio.
Datganiad Cysylltiad
Dylai unrhyw aelod o'r Cyngor a chanddo/chanddi gysylltiad ariannol, teuluol neu gysylltiad personol arall ag unrhyw fater o dan sylw yn unrhyw gyfarfod o'r Cyngor neu un o'i bwyllgorau y mae ef/hi yn bresennol ynddo, ddatgan cyn gynted ag sy'n ymarferol ei gysylltiad ef/chysylltiad hi i'r cyfarfod gan fynd allan o'r rhan hwnnw o'r cyfarfod. Serch hynny, nid ystyrir bod gan aelod o'r Cyngor gysylltiad ariannol na phersonol â'r materion o dan sylw yn unig yn sgil y ffaith ei fod ef/bod hi yn aelod o staff neu'n fyfyriwr/fyfyrwraig yn y sefydliad. Nid yw cyfyngiadau ar ymwneud â materion y mae ganddynt gysylltiad uniongyrchol personol neu ariannol â hwy yn gwahardd aelodau o'r Cyngor rhag ystyried neu bleidleisio ar gynigion i ddiogelu'r Cyngor rhag ymrwymiadau posibl - Y Cyngor, 3.4.96, Cofnod 37.
Trefn Cymeradwyo Adroddiadau Pwyllgorau Dewis
Bydd gan Bwyllgorau Dewis heblaw yn achos penodiad Is-Ganghellor, Cofrestrydd ac Ysgrifennydd, a Chyfarwyddwr Gwasanaethau Gwybodaeth, yr hawl i gadarnhau penodiadau, gan adrodd i'r Cyngor ar eu penderfyniadau - Y Cyngor 20.12.2000, Cofnod 34.
Adolygiad Cyfnodol o'r Rheolau Sefydlog
Bydd i'r Cyngor adolygu'r Rheolau Sefydlog hyn bob pum mlynedd neu'n amlach na hynny.