Daearyddiaeth (F801)

Mae BSc Daearyddiaeth [F801] yn rhoi ichi radd Ddaearyddiaeth wedi’i haddysgu yn bennaf drwy gyfrwng y Gymraeg, gyda chyfuniad i fodiwlau Daearyddiaeth Ddynol a Ffisegol sy’n cwmpasu pob agwedd ar y ddisgyblaeth. Mae Daearyddwyr yn astudio’r prosesau dynol a ffisegol sy’n ffurfio’r ddaear, a’r materion gwleidyddol ac amgylcheddol a gwyd yn sgil rhyngweithio rhwng pobl a’r ddaear. Mae dealltwriaeth o sut mae cymdeithas ddynol a’r amgylchedd byd-eang yn ymwneud â bywydau pob un ohonom, p’un ai a ydym yn byw ym Mhrydain neu du hwnt, o bwysigrwydd canolog i’r byd cyfoes.

Mae mynediad drwy F801yn addas i fyfyrwyr sydd wedi astudio Daearyddiaeth Safon Uwch (neu gymhwyster tebyg) ynghyd â phynciau eraill ym meysydd Gwyddoniaeth, y Gwyddorau Cymdeithasol neu’r Dyniaethau. Drwy gydol y tair blynedd, bydd gennych y cyfle i astudio Daearyddiaeth Ffisegol a Dynol, a chyfle i arbenigo mewn rhannau penodol o’r ddisgyblaeth. Gan mai’r Sefydliad Daearyddiaeth a Gwyddorau Daear yw un o’r cymunedau Daearyddiaeth mwyaf yn y DU, gallwn gynnig amrywiaeth eang tu hwnt o arbenigeddau Daearyddol, gan eich galluogi i greu cynllun gradd sy’n addas i’ch diddordebau unigol chi.

Gwybodaeth Bellach