Portffolio o Wasanaethau

 

1. Cyflwyniad

Mae gan Brifysgol Aberystwyth ddull integredig o reoli a chyflwyno gwasanaethau gwybodaeth. Mae’r Gwasanaethau Gwybodaeth yn goruchwylio darpariaeth y Gwasanaethau Llyfrgell ar gyfer dysgu, addysgu ac ymchwil, gwasanaethau TGCh at ddibenion academaidd, Gwasanaethau Gwybodaeth Busnes a Gwasanaethau Cyfryngau, gan gynnwys y rhai a ddarperir yn yr ardaloedd dysgu a archebir ar yr amserlen ganolog.

Caiff y Gwasanaethau Gwybodaeth eu rheoli gan y Cyfarwyddwr, Mr Roger Matthews. Caiff ef ei gefnogi gan staff sydd â phrofiad yn y Gwasanaethau Llyfrgell, TGCh a Chyfryngau.

2. Llyfrgelloedd yn Aberystwyth

Mae gan Aberystwyth amrywiaeth ardderchog o adnoddau llyfrgell lleol. Dyma’r llyfrgelloedd sydd gan y Gwasanaethau Gwybodaeth.

• Mae Llyfrgell Hugh Owen, sydd ar Gampws Penglais, yn gartref i brif gasgliadau’r Brifysgol yn y Dyniaethau, Gwyddorau Bywyd, Addysg a Dysgu Gydol Oes, Astudiaethau Gwledig, y Gymraeg a’r Gyfraith. Mae Llyfrgell Hugh Owen ar agor am 91 awr yr wythnos yn ystod y tymor, 0830-00.00 dydd Llun i ddydd Iau, 0830-2130 ar ddydd Gwener a 1000-1800 ar y penwythnosau.
• Mae Llyfrgell Thomas Parry ar Gampws Llanbadarn yn gartref i gasgliad mawr yn ymwneud ag Astudiaethau Gwybodaeth.
• Mae’r Llyfrgell Gwyddorau Ffisegol ar Gampws Penglais yn gartref i ddeunyddiau ar gyfer Ffiseg, Mathemateg a Chyfrifiadureg.

Yn ogystal â’r adnoddau Prifysgol hyn gall yr holl fyfyrwyr fanteisio ar y casgliadau ymchwil eang yn Llyfrgell Genedlaethol Cymru, llyfrgell adnau hawlfraint ger Campws Penglais, a nifer o lyfrgelloedd arbenigol a chasgliadau eraill yn yr ardal.

Mae llyfrgelloedd y Brifysgol yn darparu mannau astudio i oddeutu 1100 o fyfyrwyr. Mae’r mannau astudio yn cynnwys ardaloedd astudio tawel traddodiadol ac ardaloedd astudio agored, ardaloedd i weithio ar gyfrifiaduron, carelau astudio i fyfyrwyr ymchwil ac ardaloedd astudio grŵp i fyfyrwyr sy’n gweithio ar brosiectau. Mae darpariaeth ar gael hefyd i fyfyrwyr ag anghenion arbennig (gweler Adran 15).

3. Casgliadau

Mae gan lyfrgelloedd y Brifysgol dros 845,000 o gyfrolau argraffedig, llawer o ddeunydd microffilm nad ydynt wedi’u hargraffu ac maent yn tanysgrifio i oddeutu 45,000 o deitlau cyfnodolion. Mae cofnodion llyfryddiaethol o’r holl eitemau ar gael trwy system llyfrgell gyfrifiadurol Primo sy’n ymdrin â phob agwedd ar gaffael, catalogio a chylchrediad. Gellir cael deunyddiau nad ydynt ar gael yn y Brifysgol na Llyfrgell Genedlaethol Cymru drwy’r Gwasanaeth Benthyca rhwng Llyfrgelloedd. Yn 2010/11 cafodd oddeutu 521,000 o lyfrau eu benthyca, ac ymdriniwyd â llawer o’r rhain drwy’r cyfleusterau hunan fenthyca a dychwelyd effeithlon a chyflym.

Yn ystod 2010/11 gwariwyd bron i £1.5 miliwn ar gaffael deunydd a rhwymo. Mae’r gwasanaeth yn defnyddio system o gyllid a glustnodir trwy fformiwla yn seiliedig ar niferoedd y staff a’r myfyrwyr a pherfformiad ymchwil i benderfynu sut mae dyrannu cronfeydd prynu i wahanol bynciau. Rhoddir sylw arbennig i anghenion myfyrwyr trwy brynu nifer o gopïau o destunau cwrs ynghyd â deunydd electronig pan fo’n briodol. Mae’r Gwasanaethau Gwybodaeth yn gweithio’n agos â’r adrannau academaidd wrth ddewis deunyddiau newydd i’r llyfrgell.

4. Gwasanaethau Llyfrgell Electronig

Mae ffocws gwybodaeth wedi symud fwyfwy o gadw adnoddau’n lleol ar ffurf argraffedig gonfensiynol i ddarparu mynediad cyflym i wybodaeth pryd bynnag a lle bynnag y bydd ei angen. Mae gan fyfyrwyr fynediad i amrywiaeth eang o wybodaeth a geir o brif gronfeydd data llyfryddiaethol megis Web of Knowledge ac OCLC First Search; testun llawn ar gyfer ymchwil ysgolheigaidd mewn dros 10,000 o gyfnodolion electronig, gan gynnwys prif gyfresi ymchwil megis JSTOR a Science Direct; gwybodaeth bwnc a chysylltiadau ar gyfer pob adran academaidd a chysylltiadau cyfrifiadurol â llyfrgelloedd ac adnoddau ar-lein eraill. Mae cysylltiadau â’r holl adnoddau hyn ar gael trwy’r gwasanaeth eLyfrgell, offer ar-lein newydd a fydd yn galluogi i ddefnyddwyr bori a chwilio'r adnoddau pwnc perthnasol sydd ar gael o Aberystwyth ar www.aber.ac.uk/en/is/elecinfo. Mae’r holl ddeunyddiau hyn ar gael o ystafelloedd yn y neuaddau, neu drwy weithfannau cyhoeddus sydd wedi’u cysylltu â system gyfrifiadurol llyfrgell Primo neu â’r rhwydwaith cyfrifiadurol lleol a hefyd o bell trwy VPN neu Shibboleth. Mae staff y Gwasanaethau Gwybodaeth ar gael i roi cymorth â’r adnoddau hyn ac i roi cyfarwyddiadau i grwpiau wrth eu defnyddio yn ystod y cyflwyniad cychwynnol a thrwy gydol y cyrsiau academaidd. Mae’r Gwasanaethau Gwybodaeth hefyd yn darparu cadwrfa ymchwil ar-lein, sef CADAIR. CADAIR sy’n cadw casgliad Prifysgol Aberystwyth o draethodau ymchwil, traethodau estynedig ac ymchwil a adolygir gan gyfoedion yn y celfyddydau, y dyniaethau a’r gwyddorau.

5. Gwasanaethau Gweithfannau Cyhoeddus

Darperir y Gwasanaethau TGCh gan rwydwaith o dros 600 o weithfannau cyfrifiadurol sy’n rhedeg Microsoft Windows 7; mae pob system yn cynnig rhyngwyneb cyson i ddefnyddwyr gyda chymorth i weithio’n ddwyieithog cyhyd ag y bo’n bosibl. Mae gan yr holl systemau fynediad i’r rhwydwaith a’r rhyngrwyd.

Mae’r gweithfannau cyhoeddus hyn wedi’u lleoli mewn 22 o ardaloedd gwahanol, mae’n bosibl llogi 8 ohonynt ar gyfer dysgu, mae 12 ohonynt bob amser ar gael ar gyfer gwaith academaidd unigol ac mae’r 2 ardal arall wedi’u cadw i fyfyrwyr sydd â gofynion hygyrchedd. Mae nifer y gweithfannau ym mhob ardal yn amrywio o 4 i 100 ac mae rhai ardaloedd, yn arbennig y rhai yn y neuaddau preswyl, ar gael i’w defnyddio 24 awr y dydd, 7 diwrnod yr wythnos. Ar hyn o bryd mae gan yr holl weithfannau fonitorau sgrin fflat TFT 19” neu 20” ac maent yn rhedeg Windows 7. Mae’r holl weithfannau cyhoeddus ar gael i israddedigion ac uwchraddedigion a phob aelod o staff.

Caiff y feddalwedd sy’n cael ei rhedeg ar y cyfrifiaduron yn y gweithfannau ei dosbarthu gan 3 Gweinyddwr Windows 2008 gyda Rheolydd Parth R2 Windows 2008, a gefnogir gan 2 Weinyddwr Rheoli System Windows.

Mae amrywiaeth eang o feddalwedd ar gael i chi eu rhedeg ar gyfrifiaduron yn ystafelloedd cyfrifiaduron y brifysgol gan gynnwys:

• Microsoft Office 2010 Enterprise Edition (Word, Access, PowerPoint, Excel, Publisher, Groove, InfoPath, OneNote, SharePoint Designer) gyda’r rhan fwyaf yn cynnig cymorth llawn i’r Gymraeg a’r Saesneg;
• Adnoddau amrywiol ar gael drwy borwyr gwe (gan gynnwys Web mail);
• Adobe Acrobat (darllenydd ffeiliau);
• Nvivo (pecyn meddalwedd dadansoddi data ansoddol);
• Keypoint a PinPoint (meddalwedd arolwg);
• Minitab ac SPSS (pecynnau dadansoddi ystadegol);
• Java (offer datblygu);
• Visual Studio 2010 (Ieithoedd Rhaglennu - Visual C++, C#, J# a Visual Basic);
• Endnote (offer ar gyfer cyhoeddi a rheoli llyfryddiaethau);
• Primo (ein catalog Llyfrgell);
• Blackboard (Amgylchedd Dysgu Rhithwir);
• Putty a meddalwedd dynwarediad X terminal;
• Offer Cyflwyno ac Amlgyfrwng Amrywiol. 

Mae gan rai o’r cyfrifiaduron hyn becynnau megis Photoshop, CorelDraw a Dream Weaver hefyd (ar gyfer golygu darluniau a datblygu gwefannau).

Pan fo’n bosibl bydd yr holl gyfrifiaduron yn ystafelloedd cyfrifiadurol y brifysgol yn gallu defnyddio unrhyw rai o’r eitemau meddalwedd hyn yn rhwydd ond fel y nodwyd, mae rhai pecynnau wedi’u cyfyngu i leoliadau penodol neu i aelodau o adrannau penodol, yn amodol ar gyfyngiadau trwyddedu.

Mae trwydded safle ar gyfer meddalwedd gwrth firws Sophos wedi cael ei brynu sy’n galluogi i ddefnyddwyr lleol ac o bell fanteisio ar y diogelwch. Caiff y feddalwedd hon ei diweddaru’n awtomatig wrth i fygythiadau newydd godi.

6. Gwasanaethau cyfrifiannu canolog

Mae’r gwasanaethau cyfrifiannu canolog yn seiliedig ar system brosesu 2.3Gh ddeuol, craidd cwad sy’n rhedeg System Weithredu LINUX Gentoo. Gellir defnyddio hwn o unrhyw beiriant ar y rhwydwaith ar y campws ac o bell drwy SSH.

Darperir cyfres bwerus o feddalwedd ar y Gweinyddwr Cyfrifiannu canolog, gan gynnwys:

C, C++, Java, Perl, FORTRAN (Ieithoedd Rhaglennu),

Reduce (meddalwedd Fathemategol)

Latex (Paratoi Dogfennau),

ORACLE (Rheoli Cronfeydd Data),

GIMP (Trin darluniau)

XV (trin lluniau)

7. Gwasanaethau Meddalwedd

Cynigir cymorth a chyngor ar gaffael pecynnau meddalwedd a thrwyddedau. Hefyd, gan ddibynnu ar amodau penodol, gallwn ymdrin â cheisiadau adrannol i osod pecynnau meddalwedd canolog at ddibenion dysgu.

. Gwasanaethau Storfa Ffeiliau a Chopïau wrth Gefn

Gall pob defnyddiwr cofrestredig storio data ar nifer o Rwydweithiau Ardal Storio (SAN) sy’n rhoi mynediad tryloyw i ddefnyddwyr Windows ac UNIX. Mae’r SAN hyn yn seiliedig mewn lleoliadau sydd wedi’u gwahanu’n ddaearyddol i ddarparu adferiad os na fydd un o’r lleoliadau neu’r SAN a leolir yno ar gael. Ar hyn o bryd mae defnyddwyr yn cael 2 Gigabeit i storio e-bost a 2 Gigabeit i storio data defnyddwyr ar y dyfeisiau hyn.

Caiff copïau o’r fferm storfa ffeiliau eu gwneud bob dydd a’u cadw mewn uned copïau wrth gefn canolog. Mae 2 weinyddwr copïau wrth gefn un pwrpas ac mae gan y ddau ardal ddisgiau a newidydd tapiau LTO5 awtomatig.

9. Gwasanaethau Cyfryngau a Gwerthiannau

Oriau agor: 8:30 – 17:00 dydd Llun i ddydd Iau; 8:30 – 16:30 dydd Gwener

Mae’r tîm Cyfryngau a Gwerthiannau yn darparu gwasanaeth llungopïo, digideiddio, sganio ac argraffu cyflym, proffesiynol a chost effeithiol. Gallant lungopïo ac argraffu cyfeintiau mawr mewn amrywiaeth o fformatau gwahanol er enghraifft taflenni, cardiau, ffotograffau, posteri/argraffu fformat mawr.

Maent hefyd yn cynnig gwasanaeth rhwymo a lamineiddio - ceir manylion ar www.aber.ac.uk/en/is/printing/binding/

Mae ein gwasanaeth benthyca yn galluogi staff a myfyrwyr i fenthyca eitemau yn rhad ac am ddim am gyfnod byr o amser. Mae’r rhain yn cynnwys gliniaduron, cyfrifiaduron netbook, darllenwyr E-lyfrau, Camerâu troi ac offer ffotograffiaeth ddigidol neu fideo eraill, yn ogystal â ffonau cynhadledd a’r system bleidleisio Qwizdom a ddefnyddir yn aml wrth ddysgu. Ceir rhagor o fanylion ar: www.aber.ac.uk/en/is/computers/loans/  

Gallant dynnu ffotograffau o’r staff ar gyfer arddangosiadau adrannol o aelodau o staff. Cysylltwch â hwy i gael rhagor o fanylion ac i wneud apwyntiad.

Gellir prynu eitemau cyffredin megis CDs a DVDs gwag, co’ bach, papur a cheblau. Hefyd maent yn cadw stoc o getris argraffu ynghyd â chardiau Rhwydwaith ac amrywiaeth o feddalwedd sydd ar gael o dan drwydded safle.

Hwy sy’n gyfrifol am yr agweddau gweinyddol  ar wasanaeth ffôn Prifysgol Aberystwyth gan gynnwys fixed-line, VoIP a mobile telephony.

Maent yn cynnig gwasanaeth ffacsio, gan godi pris bach am y gwasanaeth yn ogystal â chost yr alwad. Nid oes raid talu i dderbyn negeseuon ffacs.

I gael ad-daliad am gredyd argraffu a llungopïo ac os oes gennych unrhyw ymholiadau ynglŷn â phrynu credyd cysylltwch ag is-mediasales@aber.ac.uk. Rhoddir ad-daliadau ar ddiwedd tymor yr haf yn unig. Bydd symiau hyd at £10 yn cael eu had-dalu fel arian parod, bydd symiau mwy yn cael eu had-dalu drwy anfon siec yn y post.

10. Cyngor ar Brynu Offer TG a gwasanaeth cynnal a chadw offer

Gall gwasanaeth pwrcasu TG roi cyngor ar y dewis o feddalwedd a chyfrifiaduron personol a pha rai i’w prynu. Gall hefyd ddarparu amrywiaeth o getris arlliw ar gyfer argraffyddion laser.

Mae’n bosibl cyflenwi offer a argymhellir i’w rhentu neu’u prynu am brisiau cystadleuol. Mae gweithdy ar gael sy’n darparu gwasanaethau atgyweirio ac uwchraddio ar gyfer offer y staff a’r myfyrwyr eu hunain.

11.  Adnoddau e-bost

Mae adnoddau e-bost ar gael i’r holl ddefnyddwyr cyfrifiaduron cofrestredig i’w galluogi i ddefnyddio e-bost ar gyfer cyfathrebu’n lleol a byd-eang. Cefnogir dwy ffordd o weithio.

Mae’r gwasanaeth e-bost i israddedigion ac uwchraddedigion yn defnyddio gwasanaeth a gynhelir ar bâr o gyfrifiaduron Intel sy’n rhedeg Linux i ddarparu adnoddau web-mail. Mae meddalwedd a gynhyrchir yn lleol yn gwneud i’r system ddosranedig hon ymddangos, i’w defnyddwyr, fel peiriant unigol a gellir ychwanegu peiriannau ychwanegol yn dryloyw os bydd y galw’n cynyddu.

Mae aelodau o staff yn defnyddio Microsoft Exchange. Mae’r fersiwn presennol (Exchange 2007), a gaiff ei uwchraddio’n fuan i Exchange 2010, yn rhoi cefnogaeth i fyrddau gwaith, gliniaduron a dyfeisiau symudol megis Ffonau call a ffonau PDA ar gyfer e-bost, calendrau a chynnal rhestrau o gysylltiadau.

Caiff unrhyw negeseuon e-bost sy’n dod i mewn eu sganio gan Sophos i gael gwared ar unrhyw firysau e-bost ac mae system a gynhyrchir yn lleol yn helpu i leihau negeseuon “sbam” ar gyfer defnyddwyr web-mail ac Exchange-mail.

12.  Gwasanaethau Rhwydweithio

Mae staff y Gwasanaethau Gwybodaeth yn ymwneud â gosod ceblau rhwydwaith, cymorth a chynnal a chadw, gyda’r dolenni asgwrn cefn opteg ffibr cyd-adeiladol a mewn-adeiladol, yn ogystal â’r cebl-i’r-bwrdd gwaith lleol. Mewn prosiectau o’r fath, rydym yn cysylltu’n gynnar â’r adrannau dan sylw (ac â’r Swyddfa Ystadau a/neu gontractwyr ar brosiectau ehangach), er mwyn lleihau problemau yn ddiweddarach.

Mae gan yr holl ystafelloedd preswyl ar y campws bwynt rhwydwaith yn seiliedig ar dechnoleg wifrog sy’n darparu cysylltiad cyflymder uchel. Mae hyn yn galluogi myfyrwyr i ddefnyddio rhwydwaith ardal leol Prifysgol Aberystwyth a’r rhyngrwyd. Mae canran uchel iawn o breswylwyr yn defnyddio’r cysylltiad ac ni chodir tâl ychwanegol am fynediad i’r gwasanaeth neu ar sail defnydd. I sicrhau bod cynifer o fyfyrwyr â phosibl yn gallu defnyddio’r adnoddau hyn waeth beth fo’u hincwm, rydym yn gweithredu cynllun rhentu cyfrifiaduron darbodus.

Mae adnodd rhwydwaith diwifr ar gael mewn ardaloedd cymdeithasol (e.e. barau Undeb y Myfyrwyr, caffis, ac ardaloedd ymlacio), yn ogystal â nifer o’r prif ystafelloedd dysgu a’r llyfrgelloedd. Yn yr ardaloedd hyn ac ardaloedd eraill ceir pwyntiau gliniadur wedi’u rhwydweithio i alluogi i ddefnyddwyr gysylltu gliniaduron personol nad ydynt yn gallu gweithredu’n ddiwifr.

13. Gwasanaethau Ffôn

Mae staff y Gwasanaethau Gwybodaeth yn cynnal a chadw a gwella gwasanaeth ffôn y Brifysgol ac ar hyn o bryd rydym ym mlwyddyn olaf prosiect mawr i symud gwasanaeth ffôn y Brifysgol i Voice over IP (VOIP), ac rydym hefyd yn cyflwyno gwasanaethau newydd a nodweddion megis peiriant ateb, adnabod galwyr, a symudedd estyniad.

14.  Gwasanaethau i ddefnyddwyr o bell

Mae gwasanaeth Rhwydwaith Preifat Rhithwir (VPN) ar gael sy’n cynnig mecanwaith diogel i ddefnyddwyr ddefnyddio gwasanaethau canolog trwy gysylltiad dilys. Caiff hwn ei ddefnyddio gan y rhai sy’n defnyddio ein gwasanaethau drwy’r adnodd rhwydwaith diwifr, o gartref ar eu cyswllt band llydan eu hunain, neu o unrhyw le ar y Rhyngrwyd.

15. Gwasanaethau i’r rhai sydd ag anghenion arbennig

Mae’r cyfrifiaduron yn ein hystafelloedd cyfrifiadurol yn darparu amrywiaeth dda o feddalwedd hygyrchedd gan gynnwys offer hygyrchedd Microsoft Windows 7 a mapio meddwl Inspiration. Hefyd, rydym yn darparu ardaloedd wedi’u cyfyngu i fyfyrwyr ag anghenion arbennig sydd wedi cofrestru i’w defnyddio, ac rydym yn darparu cyfrifiaduron â rhaglenni sganio a rhaglenni arbenigol eraill gan gynnwys darllenwyr sgrin a meddalwedd cyfarwyddyd llais. Mae gan un ystafell bwrpasol beiriant darllen a sgrin CCTV ac offer chwyddo print. Mae rhai o’r ardaloedd arbennig hyn yn addas i ddefnyddwyr cadair olwyn. Mae gwasanaethau cymorth ychwanegol ar gael megis gwasanaethau casglu a dosbarthu llyfrau ac argraffu Braille.

16.  Gwasanaethau Amlgyfrwng

Rydym yn darparu amrywiaeth gynhwysfawr o adnoddau sy’n galluogi i staff a myfyrwyr ddefnyddio cyfryngau wrth weithio. Mae offer ar gyfer golygu fideos, lluniau a sain ar gael ar yr holl gyfrifiaduron cyhoeddus sy’n darparu ar gyfer anghenion y rhan fwyaf o ddefnyddwyr. Mae’r stoc benthyca cyfryngau yn cynnig benthyciad tymor byr rhad ac am ddim i staff a myfyrwyr ar gyfer amrywiaeth o gamerâu digidol, camerâu fideo digidol, gliniaduron a thaflunyddion fideo/data. Gweler Adran 9.

Rydym hefyd yn cynnig  ‘gwasanaeth a gefnogir’ ar gyfer gweithgareddau amlgyfrwng lle bydd aelod o’r Gwasanaethau Gwybodaeth yn rhoi cymorth i staff a myfyrwyr nad ydynt yn hyderus wrth ddefnyddio’r dechnoleg.

I gynorthwyo darlithwyr i baratoi deunyddiau dysgu, rydym wedi tanysgrifio i’r British Universities Film and Video Council yn ogystal ag Open University off Air Recording Scheme a’r Educational Recording Agency.

17.  Adnoddau Fideo-gynadledda

Mae pump o adnoddau fideo-gynadledda ar gael ar gyfer cynadledda yn ymwneud â dysgu, addysgu a chynadledda gweinyddol; mae gan bob adnodd gymhorthion dysgu gan gynnwys byrddau gwyn rhyngweithiol a chamerâu dogfen. Mae’r stiwdios hyn yn caniatáu mynediad o bell o safon uchel drwy gysylltiad IP. Mae cysylltiad ISDN yn bosibl ond bydd yn rhaid i holl gostau ISDN gael eu talu gan y cwsmer. Mae’n well defnyddio cysylltiad IP pan fo’n bosibl. http://www.aber.ac.uk/en/is/media/vidconf/

18.  Systemau Gwybodaeth Busnes

Mae’r Adran SGB yn gyfrifol am systemau sy’n darparu gwybodaeth rheoli gorfforaethol. Mae’r systemau hyn yn rhedeg ar gymysgedd o Weinyddwyr Cymhwysiad Oracle Solaris a Microsoft Windows hydwyth a gefnogir gan bâr hydwyth o Weinyddwyr Cronfa Ddata Oracle a gedwir mewn lleoliadau daearyddol ar wahân.

Y prif systemau a gefnogir yw’r system Gyllid (ABW), y system Adnoddau Dynol a Chyflogau (Cyborg) a’r system Cofnodion Myfyrwyr a Derbyn Myfyrwyr (AStRA).

Mae’r system  AStRA wedi cael ei datblygu yn y Brifysgol ar lwyfan cronfa ddata Oracle. Mae’n cefnogi’r prosesau derbyn Israddedigion ac Uwchraddedigion sy’n cysylltu â’r cofnodion Myfyrwyr.  Mae’r cofnodion hyn yn cadw manylion personol a chyfeiriadau, cymwysterau mynediad, cofnodion academaidd, modiwlau a marciau. Mae’r cofnodion Myfyrwyr a Derbyn yn cysylltu â’r cofnodion Cynlluniau Astudio a Modiwlau a gynhelir trwy AStRA ac a gyhoeddir i wefan y Brifysgol. Mae’r system hefyd yn cadw manylion am y Neuaddau a’r llety Preifat, Myfyrwyr Dysgu Gydol Oes, Tiwtoriaid Personol, Gyrfaoedd, y Ganolfan Chwaraeon, Cymorth i Fyfyrwyr a phrosesu Ffioedd Myfyrwyr. Mae yna hefyd ryngwynebau i Amgylchedd Dysgu Rhithwir Blackboard, system Amserlennu’r Brifysgol (Syllabus Plus), Datblygu Staff, cofnodion Llyfrgell, creu cardiau adnabod, a chyfrifon E-bost ac i’r systemau Cyllid ac AD. Mae SGB hefyd yn cefnogi system fonitro presenoldeb myfyrwyr (SAMS) a systemau hunanwasanaeth sy’n rhoi mynediad i staff a myfyrwyr weld a diweddaru rhannau penodol o’u cofnod.

Gall staff yn yr adrannau gweinyddol ac academaidd wneud cais i ddefnyddio system AStRA os bydd yn berthnasol i’w gwaith. Mae AStRA yn cynnig amrywiaeth eang o sgriniau ymholiad a dewisiadau adroddiad. Anogir y defnyddwyr i gysylltu â’r adran Systemau Gwybodaeth Busnes os oes ganddynt geisiadau am ddadansoddiadau ac echdyniadau data penodol nad yw’r system safonol yn eu cynnig.

19.  Gwasanaethau Cymorth Ystafelloedd Dysgu

Mae’r holl ystafelloedd dysgu a gaiff eu hamserlennu’n ganolog yn defnyddio offer TG a Chlyweled. Mae gan bob ystafell gyfrifiadur ar y rhwydwaith sydd â chwaraewr DVD/VCR a thaflunydd data cydraniad uchel gyda sain stereo ar gyfer cyflwyniadau ar sgrin fawr. Gall darlithwyr hefyd gysylltu eu gliniaduron eu hunain i’r offer heb ofyn am gymorth gan y staff cefnogi. Mae’r cyfarwyddiadau ar gyfer defnyddio’r offer ar gael ym mhob ystafell yn ogystal â fideo hyfforddi ar-lein. Mae gan bob ystafell ffôn, trwy godi’r ffôn byddwch yn cysylltu’n uniongyrchol â thîm cymorth technegol TGCh a Chlyweled.

20.  Gwasanaethau E-Ddysgu

Mae’r Gwasanaethau Gwybodaeth yn darparu amrywiaeth o dechnolegau i fyfyrwyr a staff er mwyn ehangu eu dysgu. Mae’r rhain yn cynnwys AberLearn Blackboard (yr Amgylchedd Dysgu Rhithwir Sefydliadol), blociau adeiladu Campus Pack ar gyfer Blackboard (blogiau wicis, cyfnodolion, a phodlediadau), Panopto Lecture Capture, Questionmark Perception (arholiadau ar-lein), Qwizdom, sef system bleidleisio yn y dosbarth, yn ogystal â chymorth ar gyfer defnyddio cyfryngau wrth ddysgu ac addysgu. Mae’r GG yn darparu a chynnal y gweinyddwyr sy’n rhedeg AberLearn Blackboard, Panopto, a Questionmark Perception. Ym mis Ionawr 2012, cwblhawyd 1238 o arholiadau ar-lein unigol, gyda’r arholiad mwyaf yn profi 378 o fyfyrwyr.

Caiff y gwasanaethau E-ddysgu eu darparu ar y cyd gan y staff Datblygu Systemau a’r staff E-wasanaethau a Chyfathrebu, sy’n gyfrifol am osod, cynnal a chadw, datblygu, datrys problemau, a rhedeg y systemau o ddydd i ddydd. Darperir cymorth i ddefnyddwyr drwy e-bost, ffôn, Cwestiynau Cyffredin a gweddalennau. Mae’r wefan Nexus yn darparu cyfres o astudiaethau achos a chyngor sy’n datblygu o hyd i staff ar ddefnydd addysgiadol o dechnoleg i wella dysgu. Datblygir a darperir sesiynau hyfforddi i staff a myfyrwyr, a darperir ymgynghoriadau a sesiynau pwrpasol yn ôl y gofyn.

21. Hyfforddi a Datblygu

Bob tymor, mae’r Gwasanaethau Gwybodaeth yn cynnal rhaglen o gyrsiau hyfforddi sydd ar gael i unrhyw aelod o’r brifysgol. Cynhelir cyrsiau a digwyddiadau cynefino i fyfyrwyr newydd cyn gynted ag y byddant yn cyrraedd Aberystwyth er mwyn eu cyfarwyddo â’r adnoddau sydd ar gael a sut mae eu defnyddio. Mae’r Gwasanaethau Gwybodaeth yn darparu gwasanaeth clinig lle’r ydym yn cynnig cymorth un-i-un i holl staff a myfyrwyr Prifysgol Aberystwyth sydd â chwestiynau ynglŷn â defnyddio’r adnoddau yr ydym yn eu darparu, er enghraifft adnoddau electronig, Blackboard, Microsoft Office neu feddalwedd arall.

Cynigir sesiynau hyfforddi ar sut i ddefnyddio dysgu a gefnogir gan dechnoleg yn effeithiol wrth ddysgu i staff academaidd a staff eraill. Mae’r cyrsiau hyn yn cyfrif tuag at gyflawni’r gofynion DPP yn y Dystysgrif Uwchraddedig Addysgu mewn Addysg Uwch. Gellir trefnu sesiynau hyfforddi pwrpasol i adrannau penodol, yn ogystal ag ymgynghoriadau un-i-un trwy wneud cais. Gellir hefyd ddarparu hyfforddiant i fyfyrwyr ddefnyddio AberLearn Blackboard neu adnoddau e-ddysgu eraill yn ôl modiwl neu adran trwy wneud cais. 

22. Desgiau Ymholiadau

Mae’r desgiau TGCh a desgiau ymholiadau’r llyfrgell wedi’u lleoli mewn nifer o leoliadau yn llyfrgelloedd Campws Penglais ac yn Llanbadarn, sy’n rhoi cyngor i staff a myfyrwyr ar faterion sy’n ymwneud â’r llyfrgell a TGCh. Gellir gwneud ymholiadau hefyd trwy ffonio, e-bostio ac anfon negeseuon gwib. Gall y desgiau cymorth hyn gyfeirio ymholiadau naill ai at arbenigwyr TG neu at Lyfrgellwyr Pwnc pan fo angen. Y tu allan i’r oriau agor craidd, gellir cyflwyno ymholiadau drwy beiriant ateb neu e-bost ac ymdrinnir â’r ymholiadau hyn pan fydd y desgiau ar agor nesaf. Mae TG hefyd yn cynnig cyngor ar-lein cynhwysfawr ar faterion yn ymwneud â TG a’r llyfrgell ar ffurf “Cwestiynau Cyffredin”. http://www.inf.aber.ac.uk/advisory/faqs/

23.  Gwybodaeth/Llythrennedd Digidol

Mae Llyfrgellwyr y Gwasanaethau Academaidd yn gweithio gyda darlithwyr i fewnosod gwybodaeth a llythrennedd digidol o fewn y cwricwlwm sy’n cynnwys dysgu a chreu adnoddau cynorthwyol ar-lein ac mewn print. Ar lefel generig mae Llyfrgellwyr y Gwasanaethau Academaidd, ar y cyd â Chymorth i Fyfyrwyr a’r Gwasanaeth Gyrfaoedd yn cynnal Rhaglen Arferion Astudio bob Semester i israddedigion ac uwchraddedigion.

24.  Gwasanaethau ar y we

Mae’r Gwasanaethau Gwybodaeth yn darparu a chynnal y gweinyddwyr sy’n cynnal gweddalennau Prifysgol Aberystwyth, sy’n cael eu creu gan ddefnyddio System Rheoli Cynnwys y Brifysgol (Terminal 4).

25.  Trefniadau i fonitro ansawdd gwasanaeth

Mae’r Gwasanaethau Gwybodaeth yn awyddus i sicrhau bod yr adnoddau a'r gwasanaethau a gynigir yn cael eu gwerthuso gan y cwsmeriaid, ac mae Pwyllgor Defnyddwyr, a gadeirir gan un o’r Dirprwy Is-Gangellorion gyda chynrychiolwyr o bob adran academaidd, yn cwrdd bob tymor i wrando ar adroddiadau am fentrau newydd ac i adolygu cynnydd. Mae is-grŵp Prosiectau Gwybodaeth Busnes ar gael i sicrhau bod prosiectau gwybodaeth busnes yn cael eu cydlynu’n llwyddiannus.

Mae Llyfrgellwyr Gwasanaethau Academaidd yn cwrdd â Chynrychiolwyr TG yr adrannau academaidd ddwywaith y flwyddyn ac yn mynychu cyfarfodydd Pwyllgor Ymgynghorol Staff a Myfyrwyr a Myfyrwyr Ymchwil gan ymateb i unrhyw faterion GG sy’n codi. Mae staff y Gwasanaethau Gwybodaeth hefyd yn cwrdd yn flynyddol â staff a myfyrwyr ym mhob adran academaidd mewn cyfres o gyfarfodydd Bord Gron i drafod eu pryderon adrannol penodol. Gofynnir am sylwadau gan ddefnyddwyr hefyd drwy amrywiaeth o ffurflenni awgrymiadau, tudalennau sylwadau ar y we ac ati. Hefyd, cynhelir arolwg a holiadur cyffredinol o berfformiad y Gwasanaethau Gwybodaeth ymhlith y gymuned o ddefnyddwyr lleol drwy’r We, a gyflenwir o dro i dro gan arolygon eraill sy’n targedu grwpiau a materion penodol. Defnyddir y canlyniadau i amlygu’r cryfderau a’r gwendidau wrth ystyried datblygiadau newydd yn y gwasanaeth. Paratoir amrywiaeth o ystadegau blynyddol ar gyfer cyrff cenedlaethol megis HESA, UCISA a SCONUL sy’n ein galluogi i gymharu ein gweithgareddau ni â gweithgareddau mewn sefydliadau eraill, mae meincnod o’r fath yn cynnig arf rheoli gwerthfawr. Mae’r Gwasanaethau Gwybodaeth hefyd wedi datblygu datganiad o Ganllawiau Gwasanaeth Craidd mesuradwy i adrannau academaidd sy’n gosod y safonau y gellir eu disgwyl o ran darpariaeth y gwasanaeth a chaiff y rhain eu cyflenwi ymhellach gan ganllawiau sy’n ymwneud â gofynion defnyddwyr nad ydynt yn draddodiadol. Paratowyd canllawiau datganiad o wasanaeth ehangach tebyg i ymdrin â’r berthynas rhwng y Gwasanaethau Gwybodaeth a chymuned y myfyrwyr yn gyffredinol. Caiff y canllawiau a’r safonau hyn eu hadolygu’n rheolaidd.

26.  Rhagor o wybodaeth

Mae’r Gwasanaethau Gwybodaeth yn darparu llawer o ddogfennau ar y we am ei gwasanaethau a sut mae eu defnyddio. Ceir hyd i’r rhain ar: http://www.aber.ac.uk/en/is/

 

Roger Matthews,

Cyfarwyddwr y Gwasanaethau Gwybodaeth.