Cerdyn Aber

Mae eich Cerdyn Aber yn adnodd pwysig sy’n eich galluogi i ddefnyddio nifer o gyfleusterau a gwasanaethau gan gynnwys:

  • Benthyca o’r llyfrgelloedd
  • Cyfleusterau cyfrifiadur 24-awr
  • Cyfleusterau argraffu a llungopïo
  • Undeb y Myfyrwyr
  • Canolfan Chwaraeon y Brifysgol (bydd angen i chi dalu ar wahân i ddefnyddio’r cyfleusterau hynny)
  • Prynu bwyd ym mwytai’r Brifysgol

Ar gerdyn Aber ceir eich rhif myfyriwr neu staff, eich ffotograff, eich categori defnyddiwr a pheth gwybodaeth ddigidol, gan gynnwys cod bar ar gyfer defnyddio systemau’r Brifysgol.

Cerdyn Aber

Gwneud cais am gerdyn

Mae hawl gan holl fyfyrwyr ac aelodau staff cyfredol Prifysgol Aberystwyth gael Cerdyn Aber. I sicrhau bod eich cerdyn Aber yn barod i chi pan fyddwch yn cyrraedd y campws bydd yn rhaid i chi wneud cais amdano o leiaf wythnos ymlaen llaw.

  • Gall myfyrwyr sydd wedi cychwyn eu cyfrif e-bost Prifysgol wneud cais ar-lein am eu cerdyn Aber trwy lwytho ffotograff digidol i fyny ar eu ffeil myfyriwr. 
  • Gwneir trefniadau ar wahân i fyfyrwyr o’r Ysgol Addysg a Dysgu Gydol Oes. 
  • Gall aelodau o staff wneud cais am gerdyn Aber trwy lenwi Cerdyn Cofrestru GG, sydd ar gael o Lyfrgell Hugh Owen, atodi llun maint pasbort a’i ddychwelyd i’r Ddesg Gwasanaethau Cwsmeriaid yn Llyfrgell Hugh Owen.

I gael rhagor o wybodaeth am gategorïau eraill o ddefnyddwyr a fydd efallai yn gallu defnyddio Cerdyn Aber ac adnoddau’r llyfrgell, gweler Defnyddio’r Gwasanaethau Gwybodaeth. Yn achos defnyddwyr allanol neu ddefnyddwyr nad ydynt wedi cofrestru efallai y bydd yn rhaid gwirio manylion yr ymgeisydd ymhellach ac mewn achos o’r fath bydd y GG yn ceisio rhoi cardiau defnyddwyr newydd o fewn 48 o oriau gwaith i’r amser y derbyniwyd y cais gwreiddiol.

Defnyddio eich cerdyn

Bydd angen eich Cerdyn Aber bob tro y byddwch:

  • yn benthyca llyfr, naill ai o’r Ddesg Ymholiadau neu o’r Peiriannau Hunan Fenthyca yn y Llyfrgelloedd
  • yn defnyddio Ystafell Gyfrifiaduron 24 awr
  • angen gwneud llungopïau neu argraffu ar ein peiriannau argraffu/llungopïo hunan wasanaeth.

Ni ddylech adael i bobl eraill ddefnyddio eich cerdyn o dan unrhyw amgylchiadau.

Wrth ddefnyddio eich cerdyn i argraffu a llungopïo mae’n rhaid i chi sicrhau eich bod yn cydymffurfio â Chytundeb Hawlfraint y Brifysgol

 

Rhif PIN y Llyfrgell

Mae cyfleusterau hunan wasanaeth ar gael yn llyfrgelloedd PA. Mae angen defnyddio rhif PIN gyda’ch cerdyn Aber i ddefnyddio’r rhain.  Gweler Rhif PIN y llyfrgell am fanylion pellach.

Cardiau newydd

Mae’n rhaid i chi roi gwybod i’r GG cyn gynted â phosibl os ydych yn colli eich cerdyn, os yw’n cael ei ddwyn neu os nad yw’n gweithio. Bydd cerdyn coll yn cael ei flocio hyd nes y daw i’r golwg neu hyd nes y cyflenwir un arall yn ei le.
Dyma’r costau ar gyfer cardiau newydd:

  • Cerdyn coll: £11.00
  • Cerdyn wedi torri: £2.00
  • Cerdyn a ladratwyd (lle rhoddir rhif adrodd troseddol yr heddlu): £2.00

Codir tâl am roi cardiau newydd i dalu am gostau’r deunyddiau a’r prosesau sydd ynghlwm wrth wneud y cerdyn newydd.
Fel arfer y mae cardiau newydd ar gael o fewn 24 - 48 awr i’r taliad.

Os oes gennych unrhyw ymholiadau mae croeso i chi gysylltu â ni.