Polisi’r Gwasanaethau Gwybodaeth ar Hyfforddiant Sgiliau

Rhagair

Mae’r Gwasanaethau Gwybodaeth yn cydweithio’n agos â’r adrannau academaidd a’r gwasanaethau canolog eraill mewn sawl ffordd:

• Mae’n cynorthwyo’r staff academaidd yn eu gwaith dysgu sgiliau drwy, ymhlith pethau eraill, ddarparu gweddalennau, cyhoeddiadau a sesiynau diweddaru a sesiynau datblygu staff.
• Mae’n cydweithio’n uniongyrchol â’r myfyrwyr drwy’r Rhaglen Gyflwyno i Fyfyrwyr Newydd, yn ogystal â darparu cyfleoedd iddynt ddysgu sgiliau fel rhan o’u modiwlau allweddol.
• Mae’n darparu ystod eang o gyrsiau cyfrifiadura a sgiliau defnyddio’r llyfrgell, sy’n cael ei ategu gan wasanaeth cymorthfeydd sy’n rhedeg drwy’r flwyddyn.
• Yn Aberystwyth mae myfyrwyr yn cael cyflwyniad strwythuredig i’r Gwasanaethau Gwybodaeth (sef y llyfrgelloedd a’r cyfrifiaduron). Mae’n dechrau â chwrs cyffredinol Cyflwyniad i’r Gwasanaethau Gwybodaeth, a drefnir gan y Cyfadrannau yn ystod y penwythnos cyntaf fel rhan o’r Digwyddiadau cyflwyno i bob myfyriwr newydd. Ar ôl hynny ceir cyrsiau ynghylch dechrau yn y Llyfrgell (a drefnir fesul cyfadran) a sesiynau Gwybodaeth Hanfodol ynghylch defnyddio ein Rhwydwaith, sy’n cael eu cynnal yn ystod wythnos gyntaf y tymor.
• Hefyd mae llyfrgelloedd PA yn cadw casgliadau o ddeunydd i helpu staff a myfyrwyr i ddysgu sgiliau. Mae’r Casgliad Astudio Effeithiol a’r Ganolfan Datblygu a Dysgu Staff, sydd ar gael yn Llyfrgell Hugh Owen, yn werth tynnu sylw atynt.

Un o amcanion y Gwasanaethau Gwybodaeth (4.6) yw estyn cwmpas, cynnwys a rhawd y rhaglenni cyflwyno, hyfforddi a chynorthwyo presennol fel y caiff myfyrwyr o bob math, gan gynnwys dysgwyr o bell a myfyrwyr ag anghenion arbennig, y sgiliau fydd eu hangen i ddefnyddio gwybodaeth a thechnoleg yn effeithiol yn y gweithle, yn ogystal ag yn yr hinsawdd dysgu newydd.

Mae’r Gwasanaethau Gwybodaeth wedi ymrwymo i Gynorthwyo Dysgu drwy:

• Darparu cymorth a hyfforddiant ynghylch sut mae defnyddio’r adnoddau a’r gwasanaethau y mae’r Gwasanaethau Gwybodaeth yn eu cynnig.
• Cynnig amrywiaeth o hyfforddiant ar Sgiliau Gwybodaeth, lle bydd yr adnoddau ar gael, i ymateb i anghenion ein cwsmeriaid ym mhob rhan o PA.
• Darparu gwybodaeth, drwy’r dulliau mwyaf addas, ynghylch darparu a defnyddio’r adnoddau a’r gwasanaethau a ddarperir gan y Gwasanaethau Gwybodaeth.
• Darparu cymorth personol ynghylch materion cyfrifiadurol a llyfrgellol drwy’r gwasanaethau a gynigir wrth y Desgiau Ymholiadau, Gwybodaeth a Chymorth, a thrwy gyfeirio at staff arbenigol eraill, lle bydd hynny’n briodol.
• Darparu cyfres o gyrsiau bob semester sy’n cwmpasu’r sgiliau cyfrifiadurol a’r wybodaeth sydd eu hangen mwyaf, i’r staff a’r myfyrwyr i gyd.
• Darparu sesiynau cyflwyno i fyfyrwyr newydd sy’n cwmpasu gwybodaeth a sgiliau cyfrifiadura sylfaenol.
• Cyfrannu at raglenni uwchraddedig, gan gynnwys darparu hyfforddiant mewn sgiliau gwybodaeth.
• Darparu hyfforddiant ychwanegol yn ffurfiol neu’n anffurfiol i’r staff a’r myfyrwyr ym meysydd sgiliau cyfrifiadura, gwybodaeth a thestunau ar gais yr adrannau, yn amodol ar yr adnoddau sydd ar gael.
• Cynnig cyngor a chymorth ar ymgorffori sgiliau gwybodaeth i mewn i waith dysgu academaidd.
• Cynnig cyngor a chymorth ynghylch ddefnyddio’r amgylchedd dysgu electronig lleol ar gyfer gwaith dysgu academaidd.