Technocamps

Dr Fred Labrosse o’r Adran Gyfrifiadureg yw Cyfarwyddwr Rhanbarthol Technocamps Aberystwyth. Bydd yn trafod llywio robotiaid.

Mae Technocamps Aberystwyth a BCS, Y Sefydliad Technoleg Gwybodaeth Siartredig, yn cynnal digwyddiad rhad ac am ddim ym Mhrifysgol Aberystwyth ar ddydd Mawrth 24 Ionawr (5-9 yr hwyr) i bawb sydd â diddordeb mewn llythrennedd digidol ac addysg gyfrifiadurol.

Cynehlir y digwyddiad ym Mhrif Neuadd Adeilad Gwleidyddiaeth Rhyngwladol ar gampws Penglais.

Bydd y sesiwn gyntaf, sydd wedi’i hanelu at athrawon ac addysgwyr sy’n gweithio mewn pynciau sy’n gysylltiedig â STEM (Gwyddoniaeth, Technoleg, Peirianneg a Mathemateg) yn cyflwyno Canolfan Technocamps Aberystwyth a’i gweithdai sydd wedi’u cynllunio i danio brwdfrydedd pobl ifanc ynghylch cyfrifiaduro. Bydd y sesiwn yn cynnwys trosolwg o’r prosiect, sesiynau ymarferol yn ogystal â chipolwg o fyd anhygoel roboteg.

Yn dilyn hyn, bydd BCS Canolbarth Cymru yn cadeirio sesiwn gyffredinol i ystyried cwestiwn ehangach addysg gyfrifiadurol yn y Deyrnas Unedig. Bydd panel o arbenigwyr a phartïon â diddordeb yn arwain y drafodaeth, gan ystyried y broblem o gyfrifiaduro mewn ysgolion o safbwyntiau amrywiol.

Dyweddodd Dr Emma Posey o Technocamps Aberystwyth: “Rydym yn awyddus i weld pobl ifanc yn creu yn ogystal â phrynu technoleg. Yn Technocamps rydym yn eu cyflwyno i fyd rhaglennu ac electroneg i alluogi pobl ifanc o Gymru i arwain y ffordd yn yr economi ddigidol yn y dyfodol. Mae angen sefydlu Rhaglennu yn y cwricwlwm ysgolion yn yr un modd â TGCh.”

Mae’r ddau ddigwyddiad yn rhad ac am ddim ac yn agored i bawb. I gofrestru, ewch i www.technocamps.com/events. Am wybodaeth bellach cysylltwch â Lisa Fisher, Swyddog Cydlynu Ysgolion, Technocamps Aberystwyth ar 01970 622454 neu e-bost lisa.fisher@technocamps.com.

Mae Technocamps yn brosiect £6 miliwn a arweinir gan Brifysgol Abertawe mewn partneriaeth â Phrifysgolion Bangor, Aberystwyth, a Morgannwg. Mae’r prosiect yn darparu sesiynau dyddiol ac wythnosol i bobl ifanc rhwng 11-19 oed ar amrywiaeth o bynciau cyfrifiadurol cyffrous fel rhaglennu, roboteg, cryptograffeg, animeiddio a llawer mwy. Mae gan Technocamps nod tymor hir o annog pobl ifanc i ddilyn gyrfaoedd mewn maes a fydd yn gyrru twf economaidd yng Nghymru .

Sefydlwyd Cangen BCS Canolbarth Cymru ym Mawrth 2010, ac mae’n gweithio yng nghanolbarth Cymru i hyrwyddo amcanion y BCS. Cenhadaeth y BCS, sef Sefydliad Siartredig TG, yw galluogi’r gymdeithas wybodaeth. Rydym yn hyrwyddo cynnydd cymdeithasol ac economaidd ehangach trwy ddatblygu gwyddor ac ymarfer technoleg gwybodaeth. Mae BCS yn dod â diwydiant, academyddion, ymarferwyr, a’r llywodraeth at ei gilydd i rannu gwybodaeth, hyrwyddo ffyrdd newydd o feddwl, dylanwadu ar ddatblygiad addysg gyfrifiadurol, llunio polisi cyhoeddus a hysbysu’r cyhoedd  - www.bcs.org/midwales.

AU0212
 

Rhannu