Mae Aberystwyth yn cynnig profiad academaidd preswyl arbennig os ydych am ddilyn astudiaethau amser-llawn. Bydd myfyrwyr sydd ag absenoldeb astudio o'u gwaith neu sy'n ystyried addysg uwch fel rhan o newid gyrfa yn ei chael hi'n haws ymroi i'w hastudiaethau yn awyrgylch academaidd Aberystwyth.

Gallwn fod yn hyblyg iawn wrth eich galluogi i wneud eich ymchwil yn eich gweithle, naill ai am eich bod eisiau archwilio pwnc sydd â pherthnasedd penodol i'ch gyrfa neu eich cyflogwr, neu i allu defnyddio cyfarpar neu adnoddau arbenigol (er enghraifft archifau corfforaethol) nad oes gan y Brifysgol. Mae'r math hwn o raglen yn aml yn arbennig o ddeniadol ar gyfer academyddion tramor sydd am uwchraddio eu cymwysterau addysgol heb adael eu swyddi prifysgol.

Mae nifer o'n cyrsiau uwchraddedig ar gael yn rhan-amser fel y gallwch barhau gyda'ch gyrfa a'ch astudiaethau ar yr un pryd. Fel arfer nid oes rhaid i fyfyrwyr ymchwil rhan-amser (LLM drwy ymchwil, MPhil a PhD) breswylio yn Aberystwyth. Penderfynir y gofynion presenoldeb gan y Pennaeth Adran priodol.  Anogir myfyrwyr ymchwil rhan-amser i fynychu Modiwlau Hyfforddiant Ymchwil y Brifysgol, pan fo hynny'n ymarferol.

Defnyddir y term Dysgu o Bell i ddisgrifio dull amgen o gyflwyno cyrsiau a ddysgir drwy pecynnau astudio ac ysgolion astudio yn hytrach na'r ddarlith draddodiadol neu ddull y seminarau.

Mae ein cyrsiau dysgu o bell yn eich galluogi i astudio am radd uwch heb i chi orfod gadael eich swydd neu eich cartref, heblaw ar gyfer mynychu ysgolion astudio preswyl byr.  Mae'r dull hwn o ddysgu yn annog myfyrwyr i fod yn gryf eu cymhelliad, i gymryd cyfrifoldeb dros eu dysgu, ac i reoli eu hamser yn effeithiol.  Fodd bynnag, ar hyn o bryd mae Dysgu o Bell Aberystwyth yn cynnig cyrsiau mewn Astudiaethau Gwybodaeth neu'r Gyfraith a Throseddeg yn unig.

Cynllunir llawer o'n cyrsiau a ddysgir gyda'r amcan o gyfarfod ag anghenion cyfredol cyflogaeth. Mae'r dulliau gwahanol o astudio a ddisgrifir uchod yn bodoli er mwyn cymhwyso ac ategu llwybrau gyrfaoedd unigol. Gall fod goruchwylwyr allanol gan fyfyrwyr ymchwil yn ogystal â rhai yn y sefydliad. Bydd hyn yn sicrhau eich bod yn derbyn cyngor a chyfeiriad perthnasol i yrfa yn y dyfodol.

Mae'r Brifysgol yn croesawu pob cais gan unigolion sydd am fynychu'r sefydliad fel myfyrwyr sy'n ymweld, a bydd y manylion yn cael eu cwblhau gan y Swyddfa Derbyn Graddedigion a'r Adran berthnasol.