Rheoliadau ar gyfer Graddau Sylfaen

1.: I fod yn gymwys i'w dderbyn neu i'w derbyn i astudio am un o Raddau Sylfaen y Brifysgol Cymru, rhaid i ymgeisydd fod wedi bodloni unrhyw amodau mynediad pellach a all fod yn ofynnol gan y Brifysgol a/neu'r sefydliad mewn perthynas â'r cynllun dan sylw.

2.: Caiff cynlluniau Graddau Sylfaen eu cynnig ar sail cyfnod astudio dwy-flynedd amser-llawn (neu'r hyn sy'n cyfateb yn rhan amser).
3.: Bydd yn ofynnol i ymgeiswyr amser-llawn ddilyn yr hyn sy'n cyfateb i 120 o gredydau o leiaf ym mhob blwyddyn academaidd.
4.: Gan ddibynnu ar ofynion y cynllun astudio cymeradwyedig, bydd ymgeisydd yn mynd ar drywydd credyd mewn perthynas â dysgu asesedig sy'n seiliedig yn y gweithle a fydd nid llai nag 10 credyd o ran nifer.

5.: Er gwaethaf paragraffau 2 a 3 uchod, caiff y Brifysgol, o fewn y cyfyngiadau cyffredinol a ddangosir isod, farnu bod perfformiad myfyriwr neu fyfyrwraig yn naill ai'r astudio blaenorol a ddilynwyd a / neu mewn unrhyw ddysgu profiadaidd blaenorol yn cyfrif tuag at y gofynion ar gyfer dyfarnu Gradd Sylfaen. Rhaid i'r cyfryw astudio neu ddysgu profiadaidd blaenorol fod yn berthnasol i'r cynllun sydd i'w ddilyn a rhaid i werth y credydau gael ei asesu yn unol â disgresiwn y sefydliad sy'n derbyn. Bydd yr astudio blaenorol wedi ei gwblhau yn y Brifysgol, neu mewn Prifysgol neu Sefydliad arall y mae ei chynlluniau neu ei gynlluniau wedi eu cydnabod gan y Brifysgol at ddiben bodloni ei pholisi ar Gronni a Throsglwyddo Credydau.

Uchafswm y credydau y gellir eu derbyn i gyfrif tuag at Radd Sylfaen y Brifysgol fydd nid mwy na 120. Lle y bo uchafswm y credyd trosglwyddadwy a ganiateir wedi ei dderbyn, bydd gweddill y credydau sydd i'w dilyn drwy'r sefydliad derbyn ar Lefel 2 AU/ Lefel 5 FfCChC o leiaf fel rheol.

6.: Fel rheol caiff cynnydd ymgeisydd ei asesu yn y cyfnod yn union ar ôl iddo neu iddi gwblhau'r uned astudio.
7.: Y marc pasio ar gyfer unedau asesu, modylau a dyfarniadau fydd 40%.
8.: Bydd pob ymgeisydd am Radd Sylfaen yn cwblhau pob modiwl o fewn y cyfnodau canlynol:
8.i.: Dull amser-llawn: nid mwy na phedair blynedd o ddyddiad dechrau'r cynllun;
8.ii.: Dull rhan-amser: nid mwy na deng mlynedd o ddechrau'r cynllun.

(Gellir estyn y terfynau amser cyffredinol uchod o dan amgylchiadau eithriadol)

Lle y bo trosglwyddo credydau wedi ei gymeradwyo, o dan baragraff 5 uchod, caiff y Brifysgol gyfrif lleihad pro-rata i'r terfyn amser cyffredinol ar gyfer yr ymgeisydd unigol. Caiff y terfyn amser hwn ei gyfleu i'r ymgeisydd ar y dechrau.)

9: Yn unol â disgresiwn y Bwrdd Arholi, gellir caniatáu i fyfiwyr Rhan Un (Blwyddyn 1 fel arfer) hyd at dair* ymgais i gywiro modiwl a fethwyd. Byddant yn gymwys am farciau llawn wrth ailsefyll oni bai am y cynlluniau hynny lle mae symud ymlaen i Ran Dau (Blwyddyn 2 fel arfer) yn ddibynnol ar farc cymedrig uwch. Mewn achosion o'r fath, bydd myfyrwyr yn gymwys am y marc pasio lleiaf o 40% wrth ailsefyll Rhan Un. Yn unol â disgresiwn y Bwrdd Arholi, gellir caniatáu i fyfyrwyr Rhan Dau gael un ymgais bellach i ailsefyll neu gyfnewid modiwl a fethwyd. Byddant yn gymwys am ddyfarniad y marc pasio lleiaf (40%) yn unig ym mhob modiwl o'r fath, waeth beth fo lefel wirioneddol eu perfformiad.
* Un yn SGG

10.: Gellir dyfarnu cymhwyster ymadael (Tystysgrif Addysg Uwch) i ymgeiswyr sydd wedi dilyn 120 o gredydau o leiaf ond sy'n canfod eu hunain yn methu, wedi hynny, â chwblhau'r cynllun (neu na chaniateir iddynt wneud).
11.: I fod yn gymwys i'w ystyried neu i'w hystyried am ddyfarniad Gradd Sylfaen, bydd ymgeisydd wedi:
11.i.: dilyn cynllun astudio cymeradwyedig am y cyfnod a bennir gan y Brifysgol, ac eithrio fel a ddarperir gan Reoliad 5 uchod;
11.ii.: dilyn 240 o gredydau o leiaf, y bydd 120 o leiaf ohonynt ar Lefel 2 AU / Lefel 5 FfCChC, neu'n uwch;
11.iii: bodloni unrhyw amod(au) pellach sy'n ofynnol gan y Brifysgol.
12.: Rhaid i ymgeiswyr basio nid llai na thri chwarter o'r credydau hynny sy'n cyfrannu at ddyfarnu Gradd Sylfaen. Yn ddarostyngedig i'r gofyniad lleiaf hwn, bydd gan adrannau y disgresiwn i wneud y canlynol:
12.i.: gosod isafbwyntiau uwch na thri chwarter;
12.ii: pennu unedau astudio arbennig y mae'n rhaid eu cwblhau i foddhad y Bwrdd Arholi.
13.: Wrth bennu a ellir dyfarnu Gradd Sylfaen i ymgeisydd, bydd Byrddau Arholi yn dilyn y confensiynau a gymeradwyir gan y Brifysgol. Gall y confensiynau hyn gynnwys gweithdrefnau neu fecanweithiau er mwyn i'r Bwrdd Arholi ymarfer disgresiwn. Caiff Bwrdd Arholi gymryd i ystyriaeth ddatblygiad academaidd yr ymgeisydd drwy gydol y cynllun astudio.
14.: Dyfernir Gradd Sylfaen ar Sail Pasio / Methu yn unig, ac mae'n ddiddosbarth.

D. McParlin / M. Smith

Ebrill 2007