Rheoliadau ar gyfer Graddau Cychwynnol Modiwlar

Is-adran o ddogfen fwy o faint yw'r we-ddalen hon. Dylid felly ei darllen yn ei chyd-destun ac nid fel dogfen annibynnol. I weld y ddogfen gyfan ewch i dudalen y ddewislen.

 

1.

Gellir dyfarnu graddau cychwynnol y Brifysgol i'r sawl sydd wedi cwblhau cynllun astudio modiwlar a gymeradwywyd gan y Brifysgol yn llwyddiannus.

2.

Bydd pob cynllun yn cael ei ddiffinio fel un:

• Anrhydedd Sengl
• Anrhydedd Cyfun
• Prif Bwnc/Is-bwnc
• Cyffredin

yn unol â'r strwythurau a sefydlir gan bob Cyfadran ac a gymeradwyir gan y Brifysgol.

3.

I fod yn gymwys i gael ei (h)ystyried am ddyfarniad gradd o dan y Rheoliadau hyn, rhaid i ymgeisydd:

3.a.

fod wedi cyrraedd 17 mlwydd oed neu'n hyn adeg cychwyn astudio;

3.b.

fod wedi dilyn cynllun astudio modiwlar a gymeradwywyd am y cyfnod a bennir gan y Brifysgol, ac eithrio fel y darperir gan Reoliad 33 isod;

3.c.

fod wedi cyrraedd y cyfryw isafswm lefelau credyd a bennir mewn Cynllun a gymeradwywyd gan y Brifysgol;

3.d.

fod wedi cyflawni unrhyw amod arall/amodau eraill a fynnir gan y Brifysgol.

4.

Mae cynlluniau astudio yn cynnwys modiwlau sydd wedi'u cymeradwyo, pob un ohonynt â gwerth credyd sydd wedi'i ddiffinio mewn perthynas â'r oriau dysgu tybiannol sy'n gysylltiedig â'r modiwl, fel yr amlinellir yng Nghynllun Casglu a Throsglwyddo Credydau y Brifysgol.

5.

Bydd graddau cychwynnol yn cynnwys dwy ran, sef Rhan Un a Rhan Dau. Bydd y Brifysgol yn pennu ac yn cyhoeddi fel y bo'n addas reolau i reoli cynnydd myfyrwyr rhwng blynyddoedd astudio, dosbarthiad graddau Anrhydedd a dyfarniad Graddau Cyffredin. Bydd pob modiwl a astudir yn Rhan Dau yn cyfrannu at asesiad gradd terfynol pob myfyriwr, yn amodol ar gyfyngiadau a ddisgrifir yng Nghynllun Casglu a Throsglwyddo Credydau y Brifysgol. Gellir derbyn modiwlau a astudiwyd mewn sefydliadau eraill sydd wedi'u cymeradwyo yn lle modiwlau a astudiwyd yn y Brifysgol.

6.

Mae modiwlau ar gael ar wahanol lefelau, yn unol â'r hyn a ddiffinnir gan y Brifysgol yn ei Chynllun Casglu a Throsglwyddo Credydau.

7.

Ac eithrio ymgeiswyr a dderbynnir o dan ddarpariaethau Rheoliad 33 isod, rhaid i ymgeiswyr fod wedi astudio yr hyn sydd gyfwerth ag o leiaf 360 o gredydau, ac o leiaf 120 o'r rheiny ar Lefel 3 AU/Lefel 6 FfCChC neu'n uwch fel rheol, er mwyn cael eu hystyried ar gyfer dyfarniad gradd Anrhydedd. Fel rheol mae'n ofynnol i ymgeiswyr amser-llawn ddilyn yr hyn sydd gyfwerth ag o leiaf 120 o gredydau yn ystod pob sesiwn academaidd, fel arfer ar sail 60 credyd fesul semester. I ganiatáu hyblygrwydd ac i hwyluso dewis myfyrwyr, caniateir uchafswm o 70 credyd ac isafswm o 50 credyd fesul semester.

8.

Mae fel rheol yn ofynnol i ymgeiswyr gradd Gyffredin amser-llawn astudio'r hyn sydd gyfwerth ag o leiaf 120 o gredydau yn ystod pob blwyddyn academaidd. Ac eithrio ymgeiswyr a dderbynnir o dan ddarpariaethau Rheoliad 33 isod, rhaid i ymgeiswyr fod wedi astudio'r hyn sydd gyfwerth ag o leiaf 360 o gredydau, ac o leiaf 60 o'r rheiny ar Lefel 3 AU/Lefel 6 FfCChC neu'n uwch fel rheol, er mwyn cael eu hystyried ar gyfer dyfarniad gradd Gyffredin.

9.

Gall myfyrwyr astudio am ddyfarniadau ar sail ran-amser, yn amodol ar y terfynau amser cyffredinol ar gyfer cwblhau'r cynllun, fel y nodir ym mharagraff 31 isod.

10.

Gyda chymeradwyaeth y Brifysgol, ni all rhagor nag 20 credyd o fodiwlau Lefel AU 0/FfCChC 3 gyfrif tuag at gwblhau Rhan Un ac ni all rhagor nag 20 credyd o fodiwlau Lefel AU 1/FfCChC 4 gyfrif tuag at gwblhau Rhan Dau.

11.

Bydd myfyrwyr fel arfer yn cael eu hasesu yn ystod y cyfnod yn syth ar ôl cwblhau'r gwaith dysgu sy'n gysylltiedig â phob modiwl yn unol â'r dulliau asesu a'r gweithdrefnau marcio a gymeradwywyd gan y Brifysgol.

12.

40% fydd y marc pasio modiwlar. Yn ôl disgresiwn y Bwrdd Arholi, gellir caniatáu i fyfyrwyr Rhan Un gael hyd at dair ymgais i adfer modiwl y maent wedi'i fethu. Byddant yn gymwys i gael y marciau llawn pan fyddant yn ailsefyll. Yn ôl disgresiwn y Bwrdd Arholi, gellir caniatáu un ymgais arall i fyfyrwyr Rhan Dau ailsefyll neu gyfnewid modiwl y maent wedi'i fethu. Dim ond ar gyfer y marc pasio isaf (h.y. 40%) y byddant yn gymwys ym mhob modiwl o'r fath, beth bynnag fo lefel eu perfformiad mewn gwirionedd.

13.

Ar bob lefel, gellir gwrthod yr hawl i symud ymlaen os nad yw'r ymgeisydd wedi bodloni gofynion y cynllun astudio arfaethedig, er enghraifft drwy fethu modiwl neu fod ag absenoldeb heb ei gymeradwyo o fodiwl sy'n rhagofyniad angenrheidiol ar gyfer modiwlau diweddarach.

14.

Yn amodol ar baragraff 12 uchod, pan fo ymgeisydd wedi methu modiwl yn gyffredinol ond wedi pasio'r gwaith cwrs sy'n cael ei asesu, bydd y marciau a gafwyd yn y gwaith cwrs fel rheol yn cael eu cario ymlaen i unrhyw ailsefyll.

15.

Yn achos modiwlau a fethwyd, fel rheol disgwylir i ymgeiswyr:

1. (ail)gyflwyno gwaith cwrs y maent wedi'i fethu neu waith cwrs nad yw'n bodoli (os mai gwendidau yn yr elfen hon sydd wedi arwain at y methiant))
   Neu:
   
2. ailsefyll yr arholiad (pan fo'r myfyriwr wedi methu'r arholiad neu wedi bod yn absennol ohono)
   Neu:
   
3. ailgyflwyno'r gwaith i'w asesu ac ailsefyll yr arholiad (pan fo myfyriwr wedi methu dwy ran yr asesiad, neu naill ran yr asesiad mewn rhai achosion).

Gall adrannau, fodd bynnag, fynnu mai dim ond drwy sefyll arholiad ffurfiol y gellir ailsefyll modiwl. Yn achos ymgeisydd yr oedd ei waith ar gyfer ei asesu yn ddiffygiol, bydd angen elfen ychwanegol yn yr arholiad ac/neu arholiad ffurfiol ychwanegol (llafar neu ysgrifenedig) fel rheol. Bydd adrannau yn datgan yn eglur wrth fyfyrwyr pa un o'r opsiynau hyn fydd yn berthnasol iddynt.

DMcP/mes
1 Rhagfyr 2005