Mae’r cwestiynau a’r atebion isod yn berthnasol i ymgeiswyr israddedig amser llawn a fydd yn cychwyn ar eu hastudiaethau yn 2012:

 

Pa fath o Ysgoloriaethau a Gwobrau sydd gennych?

Mae gennym nifer o wahanol Ysgoloriaethau – mae rhai ohonynt yn seiliedig ar incwm ac mae eraill yn gwobrwyo rhagoriaeth academaidd a llwyddiant yn y byd chwaraeon neu gerddoriaeth.

 

Pa fath o gymorth sydd ar gael i wobrwyo Rhagoriaeth ymhlith ymgeiswyr neilltuol?

Mae gennym gystadleuaeth Ysgoloriaeth Mynediad sydd wedi hen sefydlu erbyn hyn (lle byddwch yn sefyll dau arholiad dwy awr sy’n cael eu gosod a’u marcio gan adrannau’r Brifysgol), Bwrsariaethau Rhagoriaeth mewn pynciau penodol (sy’n cael eu rhoi ar sail eich canlyniadau Safon Uwch / cymwysterau cyfatebol), Bwrsariaethau Chwaraeon i’r rheini sydd wedi cyrraedd safon uchel yn eu maes yn ddiweddar a Bwrsariaethau Cerddoriaeth i gynorthwyo cerddorion cerddorfaol dawnus.

 

Pa ddarpariaeth sydd gennych i helpu myfyrwyr llai cefnog?

Mae Bwrsariaethau Aberystwyth yn newydd ar gyfer 2012, lle bydd myfyrwyr sy’n dod o aelwydydd ag incwm islaw £34,090 yn cael hyd at £1,100 y flwyddyn. Mae’r Bwrsariaethau Preswyl yn rhoi gostyngiad o £800 ar ffi llety’r flwyddyn gyntaf er mwyn i fyfyrwyr o bob cefndir gael blas ar brofiad dysgu a phreswyl unigryw Aberystwyth. Mae Bwrsariaethau Gadael Gofal, gwerth hyd at £1,800 y flwyddyn, ar gael i’r rheini sydd wedi treulio cyfnod mewn gofal cyn eu penblwydd yn 16 oed.

 

Ydy’r holl wobrau’n seiliedig ar incwm?

Nac ydyn – dim ond Bwrsariaeth Aberystwyth sy’n seiliedig ar incwm; mae’r holl wobrau eraill yn agored i’r holl ymgeiswyr, beth bynnag fo incwm eu rhieni.

 

Pa fuddion eraill fydd ar gael, ac eithrio buddion ariannol?

Ar wahân i’r budd amlwg o gyfoethogi eich CV:

• Ysgoloriaethau Mynediad – cynnig diamod, llety wedi’i warantu drwy gydol y cwrs.
• Gwobrau Teilyngdod – cynnig diamod.
• Bwrsariaethau Chwaraeon – aelodaeth am ddim o Glwb Sborti Canolfan Chwaraeon y Brifysgol bob blwyddyn o’r cwrs, llety wedi’i warantu drwy gydol y cwrs, cymorth gan Fentor y Fwrsariaeth Chwaraeon.
• Bwrsariaethau Cerddoriaeth – aelodaeth am ddim o holl ensembles y Ganolfan Gerddoriaeth a’r ensembles cyswllt, cael defnyddio ystafelloedd ymarfer, llyfrgell ac adnoddau eraill y Ganolfan Gerddoriaeth am ddim, llety wedi’i warantu drwy gydol y cwrs.
• Bwrsariaethau Gadael Gofal – cymorth gan Fentor o’r Ganolfan Ehangu Cyfranogiad a Chynhwysiant Cymdeithasol a fydd yn cychwyn cyn i chi ddod i’r Brifysgol ac yn para tan i chi raddio.

 

Allaf i gael mwy nag un wobr ar yr un pryd?

Gallwch! Gall fod gennych Ysgoloriaeth Mynediad neu Wobr Teilyngdod neu Fwrsariaeth Rhagoriaeth ynghyd ag UNRHYW UN neu BOB UN o’n gwobrau eraill – Bwrsariaeth Aberystwyth, Bwrsariaeth Breswyl, Bwrsariaeth Chwaraeon, Bwrsariaeth Gerddoriaeth, Bwrsariaeth Gadael Gofal.

 

Oes rhaid i mi wneud cais am le ar gwrs mewn pwnc penodol cyn cael fy ystyried am wobr?

Nac oes – er bod y Bwrsariaethau Rhagoriaeth wedi’u cyfyngu i gyrsiau penodol, gall fod gennych Ysgoloriaeth Mynediad, Gwobr Teilyngdod, Bwrsariaeth Aberystwyth, Bwrsariaeth Breswyl, Bwrsariaeth Chwaraeon, Bwrsariaeth Gerddoriaeth a Bwrsariaeth Gadael Gofal ar gyfer UNRHYW UN o’n cyrsiau.

 

Oes angen i mi wneud cais ar wahân ar gyfer yr holl wobrau?

Mae ffurflenni cais ar wahân ar gael ar gyfer yr Ysgoloriaethau Mynediad, y Bwrsariaethau Chwaraeon a’r Bwrsariaethau Cerddoriaeth, ond nid oes angen i chi wneud cais am Fwrsariaethau Rhagoriaeth neu Fwrsariaethau Preswyl – os ydych yn gymwys, byddwch yn eu cael yn awtomatig. Y cyfan sy’n rhaid i chi ei wneud yw gwneud cais i Aberystwyth drwy UCAS erbyn 30 Mehefin a nodi Aberystwyth fel eich dewis cadarn. O ran Bwrsariaethau Aberystwyth, byddwn yn cael gafael ar y wybodaeth ariannol y byddwch yn ei rhoi i’r Cwmni Benthyciadau Myfyrwyr ac yn defnyddio’r wybodaeth honno i asesu a ydych yn gymwys, felly ni fydd rhaid i chi wneud cais ar wahân am Fwrsariaeth Aberystwyth chwaith.

 

Pam fod pecyn ariannol Aberystwyth mor ARBENNIG?

Yn wahanol i lawer o’r sefydliadau eraill, mae ein holl wobrau (ac eithrio’r Fwrsariaeth Gadael Gofal) yn agored i fyfyrwyr o BOB rhan o’r DU a’r UE.

 

Mae tua 60% o’n myfyrwyr yn cael Ysgoloriaeth, Bwrsariaeth neu Wobr o ryw fath.

 

Peidiwch â chymryd ein gair ni – mae astudiaethau diweddar gan OpinionPanel Research yn dangos mai gan Aberystwyth y mae’r ystod ORAU o Ysgoloriaethau, Bwrsariaethau a Gwobrau o blith holl brifysgolion y DU! Rydym wedi ymrwymo i gynnal a gwella’r cymorth sydd ar gael ac mae’r arolygon ymhlith ein myfyrwyr yn tystio i hyn.

 

4^ydd o Orffennaf, 2011