Cyflwyniad i Datblygu Staff ac Adolygu Perfformiad (DSAP)
Beth yw DSAP?
Fe fyddwch yn gwybod o bosibl bod y Brifysgol yn cyflwyno proses beilot ar gyfer Datblygu Staff ac Adolygu Perfformiad (DSAP) yn ystod y flwyddyn academaidd hon (2011/2012). Cynhelir DSAP yn flynyddol, bydd yn cynnwys yr holl Brifysgol a bydd yn broses o adolygu a datblygu aelodau unigol o staff.
Bydd y pwyslais ar gynorthwyo a datblygu staff i berfformio eu swyddogaethau cyfredol ac yn y dyfodol. Amcan yr adolygiad hwn fydd ategu, ac nid disodli systemau cyfredol o fonitro (e.e. monitro ymchwil a Sicrhau Ansawdd).
Bydd yn ofynnol i’r holl aelodau o staff, (ar wahân i’r rheini sydd yn dal o fewn eu cyfnod prawf) ddod i gyfarfod adolygu. Cynhelir hwn rhwng yr aelod o staff a’r adolygydd cyntaf, a ddetholir gan y pennaeth adran.
I gael y defnydd gorau, bydd union natur y broses yn amrywio ar draws adrannau a rolau, ond bydd y dibenion hyn yn gyffredin i bawb:
Datblygu: bydd DSAP yn sicrhau bod sgiliau, agweddau a gwybodaeth newydd yn cael eu datblygu a fydd yn eich helpu chi i ddysgu yn y gweithle.
Perfformiad: mae hwn yn gyfle i adolygu a chofnodi eich llwyddiannau dros y flwyddyn flaenorol a gosod targedau ar gyfer y flwyddyn nesaf, yn ogystal â thrafod lle mae angen cymorth arnoch chi.
Eglurder: bydd y cyfarfodydd adolygu yn anelu at sicrhau dealltwriaeth gyffredin am yr hyn y gofynnir i chi ei wneud a sut y mae hyn yn cydweddu ag amcanion yr adran.
Gofod: i chi gael trafod eich swyddogaeth gyffredinol a chynlluniau’r dyfodol.
Bydd y rhan fwyaf o adrannau yn cofnodi manylion y cyfarfod adolygu ar y system arlein AberCQ sydd i’w weld yma.
Caiff y broses adolygu ei goruchwylio gan ail adolygydd a’r pennaeth adran, a fydd yn gwirio bod y targedau yn ymarferol ac yn cyd-fynd ag amcanion yr adran, a hefyd i sicrhau bod cyflawniadau blaenorol yn cael eu cydnabod. Bydd y ffurflen flynyddol yn gyfrinachol a chaiff ei gweld gan yr aelod o staff, yr adolygwyr cyntaf a’r ail a’r pennaeth adran yn unig.
Amcan y broses hon yw eich cynorthwyo yn eich gwaith a bydd yn canolbwyntio ar adolygu gwaith y flwyddyn ddiwethaf er mwyn sicrhau llwyddiant yn y dyfodol i chi fel unigolyn ac yn y pen draw i’r Brifysgol fel sefydliad.
Mae’r broses yn wahanol i'r rhai a gysylltir â HERA, ailraddio neu fonitro ymchwil a systemau arfarnu eraill sydd eisoes yn bodoli, er y gallai'r rhain fwydo i'r broses DSAP.
Mae DSAP hefyd ar wahân i brosesau sy’n bod yn y Brifysgol i ymdrin â chwynion a materion disgyblu.
Mae nodau ac amcanion allweddol DSAP yr un fath i bob unigolyn a phob adran ar draws y Brifysgol - sef gwneud yn siŵr fod pob un ohonom yn cael ein gwerthfawrogi a’n cynorthwyo wrth weithio at dargedau cyffredin.