Rhagdraeth

Mae’r Adran Gwyddor Chwaraeon ac Ymarfer Corff ym Mhrifysgol Cymru, Aberystwyth yn cyflwyno rhaglenni israddedig mewn gwyddor chwaraeon ac ymarfer corff, yn gwneud ymchwil yn y gwyddorau chwaraeon ac ymarfer, ac yn darparu gwasanaethau ymgynghoriaeth i unigolion a sefydliadau yng Nghymru a gweddill Prydain.

Hanfod gwyddor chwaraeon ac ymarfer corff yw dadansoddi’n wyddonol sut mae’r corff dynol yn symud, yn ymarfer ac yn perfformio mewn chwaraeon. Mae’n fater o ddeall gwyddorau biomecaneg, ffisioleg a seicoleg i gael gwybodaeth ddamcaniaethol, ac o gymhwyso’r wybodaeth honno at sefyllfaoedd ymarferol.

Mae gwyddor chwaraeon yn ymwneud â chymhwyso gwyddoniaeth er mwyn gwella cymaint â phosibl ar berfformiad mabolgampwr(aig) unigol neu dîm, tra bo gwyddor ymarfer yn ymwneud â chymhwyso gwyddoniaeth at wella iechyd a lles drwy ymarfer. Gallai gwyddonydd chwaraeon lunio rhaglen hyfforddi i gynyddu cyflymder rasio rhedwyr pellter neu gynyddu gallu timau pêl-fasged i gyflymu gêm. Gallai gwyddonydd ymarfer, ar y llaw arall, lunio rhaglen hyfforddi i helpu unigolyn i golli pwysau neu i gynyddu cryfder y cyhyrau er mwyn i’r unigolyn allu dal i gyflawni tasgau beunyddiol heb flino.