Siarter Y Myfyrwyr

Cyflwyniad

Diben y ddogfen hon yw nodi’n gryno ar ddu a gwyn yr hyn y gallwch chi ei ddisgwyl gennym ni a’r hyn yr ydym ni’n ei ddisgwyl gennych chi.

Bwriad arall yw rhestru’r nifer sylweddol o lyfrynnau a thaflenni sydd eisoes wedi eu paratoi ar gyfer myfyrwyr a staff y Sefydliad. Gobeithio y bydd y cynnwys yn ddefnyddiol.

Gan fod hon yn ddogfen fydd yn cael ei hadolygu’n gyson, byddem yn croesawu unrhyw sylwadau ar y cynnwys.

Cenadwri

• Nod Aberystwyth yw bod yn Brifysgol o’r radd flaenaf o safbwynt gwaith addysgu ac ymchwil.
• Rydym yn chwarae rhan gyflawn ym maes ymchwil rhyngwladol.
• Rydym yn darparu cyfle i ddysgu i'r safonau academaidd uchaf, amgylchfyd eithriadol i astudio ynddo ac ansawdd cyfoethog i fywyd y myfyrwyr.
• Rydym yn ymateb i anghenion cymdeithas am ymchwil ac am raddedigion addysgiedig a chanddyn nhw sgiliau arbennig.
• Mae gennym gyfrifoldeb arbennig tuag at anghenion Cymru ac rydym yn ymwybodol iawn o’r rhan sydd i ni wrth gynnal a hyrwyddo diwylliant cynhenid Cymru a’r iaith Gymraeg.
• Rydym yn ymwybodol o’r cyfrifoldeb sydd gennym tuag at y gymuned yr ydyn ni’n rhan ohoni ac y mae cydweithio â sefydliadau lleol yr un mor bwysig i ni ag yw cydweithio â’r cysylltiadau eraill sydd gennym yng ngwledydd Prydain, yn Ewrop ac yn y byd ehangach.

Amcanion Perthnasol

• Cynnal a datblygu’r enw da a’r parch sydd i ni ar lefel rhyngwladol yn sgil y ffaith ein bod yn darparu addysg nodedig i israddedigion a graddedigion mewn nifer o bynciau yn y Celfyddydau, y Gwyddorau a’r Gwyddorau Cymdeithasol.
• Parhau i ehangu mynediad i fyfyrwyr o amrywiol gefndiroedd, gan gynnwys myfyrwyr o’r gymuned leol, ac i chwarae ein rhan ym mywyd economaidd, addysgol a diwylliannol y gymuned honno.
• Ymestyn ein dulliau o ddarparu ein gwasanaethau o safbwynt astudio rhan-amser a dysgu o bell er mwyn ehangu mynediad i addysg uwch ac ymateb i'r galw am ddysgu gydol oes.
• Cyflawni ein cyfrifoldeb arbennig tuag at anghenion addysgol Cymru.
• Cynnal a datblygu perthynas agos â diwydiant ac â chyflogwyr, gan ymateb i'w anghenion trwy arfogi graddedigion â'r sgiliau a'r hyblygrwydd y bydd eu hangen arnynt yn y dyfodol wrth addasu i farchnad waith sy'n newid yn gyson.
• Defnyddio’r dechnoleg newydd yn effeithiol er mwyn hybu’n hamcanion o ran gwaith dysgu a gwaith ymchwil.

Cyfle Cyfartal

Mae gennym bolisi cyfle cyfartal sy’n cynnwys materion yn ymwneud â myfyrwyr ac â staff.