Gwybodaeth i Ddarpar Fyfyrwyr Israddedigion

Y mae’r Adran Saesneg, a ddyfarnwyd yn ‘rhagorol’ yn yr arolwg diweddaraf ar ansawdd yr addysgu, yn cynnig cynllun cyffrous, sef BA Saesneg ac Ysgrifennu Creadigol. Y mae’n gynllun anrhydedd sengl cyflawn ac integredig. Yn ei hanfod, cwrs i ddatblygu eich sgiliau creadigol a beirniadol yw’r cynllun gradd hwn ac fe’i dysgir, yn rhannol, gan ddarlithwyr sy’n awduron eu hunain. Bydd yn ceisio datblygu amrywiaeth a hyd a lled eich dawn ysgrifennu, a’ch helpu i weithio’n hyderus mewn sawl ffurf neu genre. Cewch eich annog hefyd i ddatblygu dull myfyriol o ysgrifennu, a chreu arddull sy’n tyfu o wybodaeth am weithiau ysgrifenedig cyfoes a hanesyddol, a dealltwriaeth o’r cyddestun llenyddol, diwylliannol a hanesyddol-gymdeithasol sy’n gefndir i’r broses o ysgrifennu ac o ddarllen llenyddiaeth. Fe fydd hefyd yn eich dysgu am wahanol agweddau ar astudio llenyddiaeth ac ysgrifennu.

Strwythur y Cwrs

Blwyddyn 1

Yn y flwyddyn gyntaf byddwch yn astudio tri modiwl craidd, bydd yn eich cyflwyno i Saesneg ac Ysgrifennu Creadigol ar lefel brifysgol.  Y modiwlau craidd yw:

• Ways with Words -  cyflwynir myfyrwyr i'r wahanol fathau o arferion ysgrifennu trwy raglen integredig o weithdai a darlithoedd.  Bydd myfyrwyr yn cael profiad o farddoniaeth, ffuglen ryddiaeth ac ysgrifennu am fywyd go iawn, a'r mathau o ymchwil mae'n rhaid i ysgrifenwyr creadigol ei wneud
• Encountering Texts - mae'r modiwl yma'n canolbwyntio ar amrywiaeth o wahanol agweddau ar ddarllen ac ysgrifennu am destunau llenyddol o wahanol gyfnodau 
• Aspects of Genre - yn ystod y modiwl yma byddwch yn astudio barddoniaeth, drama a’r nofel trwy edrych yn fanwl ar destunau o gyfnodau gwahanol.

Blynyddoedd 2 a 3

Bydd pawb ar y cwrs Llenydda a Saesneg yn astudio'r un modiwlau craidd ac yn ychwanegu atynt o blith modiwlau dewisol Llenydda. Mae’r craidd yn cynnwys The Set Forms; Reading Theory/Reading Texts (1); Textual interventions; ac yn y flwyddyn olaf Prosiect Ysgrifennu lle byddwch yn creu darn estynedig o waith gwreiddiol ar unrhyw ffurf gan gynnwys darn hwy o ffuglen, casgliad o gerddi neu straeon byrion, neu destun drama. Ar ben hyn byddwch yn astudio pedwar modiwl craidd ar lenyddiaeth, mewn trefn hanesyddol: Medieval and Renaissance Writing, Restoration and Eighteenth Century Writing, Nineteenth Century Writing, a Twentieth Century Writing. Byddwch yn dewis modiwlau ychwanegol o blith y canlynol: Writing Short Fictions; Traditional Poetic Forms; Writing Selves; Writing and Place; Writing Contemporary Wales; Experimental Writing; Writing Lives: Autobiography. (Y mae rhagor o fodiwlau yn cael eu datblygu.) Bydd pwyslais y modiwlau hyn ar gynhyrchu a mireinio gwaith gwreiddiol y byddwch yn ei gyflwyno yn rheolaidd i gael adborth ac awgrymiadau.

Asesu

Asesir Reading Theory/Reading Texts (1) a’r modiwlau craidd trwy gyfuniad o waith cwrs ac arholiad ar ddiwedd y modiwl. Asesu cyson yw’r dull a ddefnyddir yn y lleill i gyd. Asesir y Prosiect Ysgrifennu yn y flwyddyn olaf trwy gyfrwng portffolio o waith ysgrifenedig ynghyd â sylwebaeth am y gwaith.

Louise Jenkins BA Llenyddiaeth Saesneg ac Ysgrifennu Creadigol Swydd Rydychen

Fe ddewisais i astudio yn Aberystwyth oherwydd y cwrs a’r lleoliad ar lan y môr. Roedd yn hawdd iawn dod i’r arfer o astudio. Rwyf i wedi byw yn y dref am y tair blynedd ac rydych chi’n teimlo’n rhan o’r gymuned ar unwaith, mae pawb mor gyfeillgar, ac mae Sadyrnau’n wyllt! Mae’r adran yn dda. Mae’r tiwtoriaid yn barod i helpu ac os oes gennych chi gwestiynau mae yna oriau swyddfa pan fedrwch chi ymweld â nhw. Mae Canolfan y Celfyddydau yn dda dros ben, maen nhw’n dangos ffilmiau celfyddydol yn ogystal â’r rhai mwy diweddar. Ac mae ganddyn nhw wythnosau thematig, er enghraifft bob pythefnos maen nhw’n dangos ffilmiau arswyd. Mae Aberystwyth yn hamddenol a chyfforddus, a does dim pwysau. Mae’r bywyd cymdeithasol yn ardderchog. Diwylliant y dafarn sydd yma. Rwy’n credu bod 52 o dafarnau yma, sy’n wallgof. Dwyf i ddim wedi ymweld â phob un! Mae dau glwb yn y dref sy’n dda, ac mae pawb yn tueddu i fynd i’r un lle, felly dim ond i chi fynd allan, byddwch chi’n gwneud ffrindiau. Yn bendant byddwn i’n argymell Aberystwyth i eraill, ac yn enwedig os ydych chi’n dod o ddinas ac am brofi rhywbeth cwbl wahanol, dyma’r lle i chi. Rydych chi’n teimlo’n bell o gartref, ond mae hynny’n beth da!