Daearyddiaeth Ffisegol

Please turn on JavaScript.
Media requires JavaScript to play.

Gwaith daearyddwyr yw astudio’r prosesau sy’n rhoi strwythur i’r byd naturiol a’r materion yn ymwneud â rheoli’r amgylchedd sy’n codi yn sgil y prosesau hynny. Mae deall yr amgylchedd byd-eang a’i broblemau yn berthnasol i’n bywydau oll. Aberystwyth oedd y brifysgol gyntaf trwy Brydain i gynnig graddau anrhydedd gwyddonol arbenigol mewn Daearyddiaeth. Mae’r traddodiad hwn yn parhau hyd heddiw â’r cyfle i ganolbwyntio’n fanwl ar astudio prosesau amgylcheddol o safbwynt gwyddonol. Sylweddolwn, serch hynny, fod Daearyddiaeth Ffisegol safon uwch yn ddisgyblaeth eang iawn, ac y byddwch o bosibl eisiau parhau â’r ehangder astudio hwnnw. Ar y llaw arall, efallai y byddwch eisiau canolbwyntio ar rai meysydd penodol â rhyw yrfa arbennig mewn golwg. Mae digon o gyfle yma, ac mae patrwm y modiwlau yn hyblyg i gyfateb i’ch anghenion unigol. Pwrpas ein cyrsiau yn y pen draw yw eich arfogi â’r amrywiaeth o sgiliau arbenigol a deongliadol y byddwch eu hangen i ganfod swydd yn y dyfodol.

Rydym yn croesawu ceisiadau gan bobl sy’n teimlo’n gryf am y pwnc. Yr ydym hefyd yn croesawu ceisiadau gan fyfyrwyr hŷn. Yn y flwyddyn gyntaf byddwch yn treulio’r rhan fwyaf o’ch amser yn astudio modiwlau Daearyddiaeth Ffisegol sy’n trafod pynciau megis materion amgylcheddol byd-eang, ecoleg fyd-eang, amgylcheddau arwyneb y ddaear a chylch dŵr a’r atmosffer, a bydd cyfle hefyd i astudio modiwlau eraill o blith y dewis eang sydd ar gael yn y Sefydliad Daearyddiaeth a Gwyddorau Daear neu mewn pynciau tebyg. Yn yr ail a’r drydedd flwyddyn gallwch arbenigo mewn meysydd penodol o Ddaearyddiaeth Ffisegol, megis rhewlifeg, dynameg systemau afon, geomorffoleg, newid amgylcheddol cwaternaidd, systemau gwybodaeth ddaearyddol a synhwyro o bell, neu weithgarwch folcanig.

Cynnwys a Strwythur

Mae strwythur y cwrs Daearyddiaeth yn un blaengar sy’n datblygu’n barhaus. Ym mlwyddyn gyntaf y cynllun hwn byddwch yn gorfod astudio chwe modiwl craidd Daearyddiaeth Ffisegol a phum modiwl o blith y pynciau eraill a gynigir yn y Sefydliad Daearyddiaeth a Gwyddorau Daear, gan gynnwys Gwyddor yr Amgylchedd, Gwyddor Daear Amgylcheddol a Daearyddiaeth Ddynol. Mae’r modiwlau hyn yn cynnwys darlithoedd ac elfen ymarferol. Mae’r modiwl ymarferol yn cynnwys elfennau sy’n ymwneud â chartograffeg, ystadegau disgrifiadol a phrosesu a chyfrifo data. Mae modiwl tiwtorial yn rhan ganolog o’r rhaglen graidd ym mlwyddyn gyntaf y cynllun gradd ac yn y blynyddoedd dilynol.

Yn ail flwyddyn y rhaglen radd Daearyddiaeth Ffisegol bydd angen i chi astudio naw modiwl. Mae’r rhaglen graidd Daearyddiaeth Ffisegol yn cynnwys sgiliau labordy a sgiliau dadansoddi, gwaith maes, modiwl tiwtorial a phynciau allweddol ym maes geomorffoleg afonol, rhewlifeg a rheoli’r amgylchedd a gwyddor gwaternaidd. Bydd cyfle i chi ddewis eich modiwlau arbenigol, gan gynnwys dewisiadau ym maes geoberyglon, adnoddau’r ddaear, eigioneg, amgylcheddau pegynol, systemau hydrolegol a hydrocemeg.

Yn y drydedd flwyddyn mae’r craidd gorfodol yn llai ac yn cynnwys traethawd estynedig ar sail ymchwil annibynnol yn y maes. Bydd cyfle hefyd i chi astudio sawl llwybr gwahanol, gan gynnwys modiwlau arbenigol ym maes adnoddau dŵr, rhewlifeg, synhwyro o bell, systemau gwybodaeth ddaearyddol, geocemeg, gweithgarwch folcanig, bioddaearyddiaeth, pobl ac amgylcheddau, ansawdd dŵr, systemau afon a newid amgylcheddol, gemorffoleg tir sych a hydrodaeareg. Oherwydd bod cymaint o ddewis o fodiwlau bydd rhai o’r dosbarthiadau yn fychan ac felly bydd gennych gyswllt clòs ag aelodau o staff. Ceir manylion penodol am y modiwlau yr ydym yn eu cynnig yn y llawlyfr ‘Daearyddiaeth yn Aberystwyth’.

Adnoddau

Mae’r cwrs Daearyddiaeth Ffisegol yn cael ei ategu gan gyfleusterau datblygedig ar gyfer gwneud gwaith labordy ym maes dadansoddi cemegol a ffisegol (e.e. priddoedd, ansawdd dŵr a gwaith paill) a phrosesu data. Bydd yr holl israddedigion yn cael hyfforddiant ym maes trin a chyrchu data cyfrifiadurol ar y Rhyngrwyd, dadansoddi ystadegau a dadansoddi deunyddiau naturiol a byddant yn dysgu am ddulliau cynnal arolwg yn y maes. Mae’r hyfforddiant yma’n cael ei gyfoethogi a’i gefnogi gan yr ymchwil a wneir yn y Ganolfan Rewlifeg ac yn y grwpiau ymchwil Newid Amgylcheddol Cwaternaidd a Basnau Afon a Hydroleg. Ymhlith yr adnoddau eraill y mae unedau ffotograffig a reprograffig a gweithdai offer maes a labordy.

Yr ydym yn ffodus yma yn Aberystwyth bod gennym gymuned gefnogol o ddaearyddwyr a chyswllt clòs a chyfeillgar rhwng y myfyrwyr a’r staff. Mae gennym Bwyllgor Ymgynghorol Staff a Myfyrwyr gweithgar, a Chymdeithas Ddaearyddiaeth lewyrchus dan arweiniad y myfyrwyr, sy’n cynnig darlithiau rheolaidd gan siaradwyr gwadd ynghyd â theithiau maes anffurfiol, cinio a dawns, a gweithgareddau cymdeithasol eraill.

Gradd Fyd-eang

Mae’r cwrs maes gorfodol wythnos o hyd – a gynhelir ar hyn o bryd yn Seland Newydd, Sbaen, Iwerddon neu ganolbarth Cymru – ynghyd â chyrsiau maes dewisol, a thraethodau estynedig a gwaith prosiect unigol sy’n seiliedig ar waith maes, yn elfennau pwysig o’r cwrs Daearyddiaeth. Mae gan Aberystwyth fanteision academaidd unigryw gan fod yr amgylcheddau arfordirol, afonol a biolegol yn ein galluogi i astudio daearyddiaeth ffisegol yn lleol.

Rydym yn annog ein holl fyfyrwyr israddedig i ddatblygu agwedd fyd-eang a rhyngwladol at eu gwaith. Gan ein bod yn ganolfan ragoriaeth ryngwladol, mae’r gwaith ymchwil a’r dysgu israddedig yn canolbwyntio ar amrywiaeth helaeth o themâu ac amgylcheddau – o eithafion yr Arctig i’r Antarctig; trwy Ewrop a gwledydd America i China a’r Dwyrain Pell; o Ogledd Affrica i Ethiopia, Kenya a De Affrica.

Gyrfaoedd

Yn ystod y blynyddoedd diwethaf mae graddedigion o Aberystwyth wedi cael gwaith ym meysydd yr amgylchedd, gwyddoniaeth, mathemateg, gwasanaethau gwybodaeth a gwasanaethau cymdeithasol; mewn twristiaeth, rheoli diwydiant a mentrau busnes. Bydd rhai daearyddwyr yn mynd yn athrawon, ond bydd y rhan fwyaf yn mynd i weithio mewn amrediad eang o swyddi ym mhob sector o’r economi, a bydd eu sgiliau cyffredinol ac arbenigol yn cael eu cydnabod mewn marchnad swyddi gystadleuol iawn.

Gwnawn bob ymdrech i sicrhau eich bod yn cael swydd addas wrth raddio. Rydym yn trafod cyfleoedd gyrfa gyda’n myfyrwyr yn rhan o raglen sesiynau tiwtorial yr israddedigion, a rhoddwn bob anogaeth ichi fanteisio i’r eithaf ar fywyd y Brifysgol ac achub ar bob cyfle a gewch i gryfhau eich proffil cyflogaeth.

I gael rhagor o fanylion am y BSc Daearyddiaeth Ffisegol (F840) gweler ein gwefan ar http://www.aber.ac.uk/iges.

Sarah Louise Page BSc Daearyddiaeth Ffisegol Banbury

Fe ddewisais i astudio yn Aberystwyth oherwydd ei fod yn lle gwych i astudio Ffiseg a Daearyddiaeth. Mae’n ardal hynod o braf ac roedd y bobl yn gyfeillgar ar y Diwrnod Agored. Roedd yn hawdd iawn ymgartrefu – rydych chi’n cwrdd â phobl newydd yn gyflym iawn ac yn dechrau eu gweld o gwmpas Aberystwyth, ac mae’r darlithwyr i gyd yn barod i helpu. Mae Aberystwyth yn lle rhagorol, gyda’r traeth a’r bryniau. Mae’r adran yn wych, gyda phopeth sydd ei angen. Mae’r cyfleusterau chwaraeon yn ardderchog. Mae sboncen yn rhagorol, ac mae tîm da iawn yma. Fe enillon ni llynedd gan ennyn diddordeb llawer o bobl, ac mae tîm hoci yma hefyd. Rwy’n hoffi’r awyrgylch sydd yma. Mae pawb ar y cwrs yn grêt, rydyn ni’n gyrru mlaen yn dda iawn ac yn nabod ein gilydd. Mae bywyd cymdeithasol yma hefyd wrth gwrs, gyda’r holl dafarnau yn y dref, mae’n wych, ac mae’r nosweithiau cymdeithasol chwaraeon yn hwyl hefyd. Mae Aberystwyth yn lle gwych i astudio. Dyw’r dref ddim yn rhy fawr nac yn rhy fach, ac rydych chi’n cwrdd ag amrywiaeth eang o bobl sy’n cael hwyl, sy’n wych.