Cynllun gradd yw hwn sy’n cyfuno dull cyffredinol o astudio Gwleidyddiaeth Ryngwladol â ffocws penodol ar natur a swyddogaeth Cudd-wybodaeth. Yn y flwyddyn gyntaf caiff myfyrwyr eu cyflwyno i rai o syniadau, trafodaethau a materion allweddol maes Gwleidyddiaeth Ryngwladol ac is-feysydd Astudiaethau Strategol ac Astudiaethau Cudd-wybodaeth. Bydd y rhain yn cael eu datblygu mewn cyfres o fodiwlau craidd Anrhydedd yn yr ail a’r drydedd flwyddyn. Dysgir y myfyrwyr sut i ddadansoddi materion cymhleth mewn Gwleidyddiaeth Ryngwladol o sawl safbwynt ac agwedd. Yn ogystal â hyn ceir nifer o fodiwlau sy’n canolbwyntio’n fwy penodol ar gudd-wybodaeth a materion sy’n ymwneud â chudd-wybodaeth. Bydd myfyrwyr yn edrych ar natur a swyddogaeth ysbïo, datrys codau a chêl-ddadansoddi yn ogystal â mathau eraill o gywain cuddwybodaeth. Byddant hefyd yn dysgu am y broses o asesu cudd-wybodaeth, swyddogaeth cudd-wybodaeth wrth greu polisïau tramor a diogelwch, a llwyddiant a methiant cudd-wybodaeth yn y rhyfel ar derfysgaeth.