Gwleidyddiaeth Ryngwladol a’r Trydydd Byd

LL29 - 3 blynedd

Mae mwyafrif poblogaeth y byd yn byw yn yr hyn a elwir ‘y Trydydd Byd’, ardal nad yw’n draddodiadol wedi cael llawer o sylw gan ddisgyblaeth Gwleidyddiaeth Ryngwladol. Ymgais yw’r cynllun gradd hwn i adfer y sefyllfa honno, ac mae’n cysylltu astudio’r byd datblygol â’r syniadau diweddaraf ym maes Cysylltiadau Rhyngwladol, Hanes Rhyngwladol, yr Economi Wleidyddol Ryngwladol ac Astudiaethau Diogelwch. Yn y flwyddyn gyntaf bydd myfyrwyr yn astudio modiwl rhagarweiniol sy’n trafod materion megis effeithiau gwladychiaeth, natur un o wladwriaethau’r Trydydd Byd, tlodi a datblygu, cysylltiadau economaidd rhwng y Gogledd a’r De a materion yn ymwneud â diogelwch yn y Trydydd Byd. Gallwch hefyd ddewis o blith sawl modiwl arall yn Rhan Un. Yn Rhan Dau bydd myfyrwyr yn astudio modiwl craidd ar y Trydydd Byd mewn gwleidyddiaeth ryngwladol, sy’n canolbwyntio ar agweddau economaidd, diwylliannol a gwleidyddol ar y berthynas rhwng y Gogledd a’r De. Ceir hefyd nifer o fodiwlau dewisol ar faterion y Trydydd Byd, gan gynnwys rhai ar Affrica, America Ladin a’r Dwyrain Canol ac ar faterion megis newyn, hilladdiad, imperialaeth, ymyrraeth ddyngarol ac ymyrraeth y Rhyfel Oer yn y Trydydd Byd. Mae’r rhaglen yn rhoi i fyfyrwyr ddealltwriaeth eang o sefyllfa newidiol y Trydydd Byd o fewn i system ryngwladol gwladwriaethau, gan gynnwys materion cyfoes megis y rhyfel ar derfysgaeth a phrosesau twf byd-eang. Mae’r amrywiaeth eang o ddewisiadau yn rhoi cyfle i fyfyrwyr gyfuno modiwlau damcaniaethol mwy cyffredinol ag astudiaeth o bynciau penodol a rhanbarthau arbennig