Gwybodaeth i Ddarpar Fyfyrwyr Israddedigion

Gradd BA yn y Gyfraith ym Mhrifysgol Aberystwyth

M103 - Cynllun Gradd BA 3 blynedd

BA yn y Gyfraith [M103]

Mae’r radd BA (y Gyfraith) yn rhoi cyfle i fyfyrwyr gyfuno’r Gyfraith â phynciau eraill er mwyn cynnig mwy o ddewis a hyblygrwydd.

Mae dau draean o’r modiwlau yn cael eu hastudio yn y Gyfraith, ac fe ellir dewis y drydedd ran sy’n weddill o unrhyw adran arall yn y Brifysgol, os byddant yn cyd-fynd â'ch amserlen. Er mwyn sicrhau bod cyfuniadau poblogaidd ar gael, mae nifer o gyfuniadau wedi'u sefydlu, gyda’u codau UCAS eu hunain. Maent yn cynnwys BA yn y Gyfraith gyda:

• Mathemateg (M1G1)
• Economeg (M1L1)
• Gwleidyddiaeth (M1L2)
• Gwleidyddiaeth Ryngwladol (M1LF)
• Busnes a Rheolaeth (M1N1)
• Cyfrifeg a Chyllid (M1N4)
• Marchnata (M1N5)
• Rheoli Gwybodaeth (M1P1)
• Cymraeg (M1Q5)
• Troseddeg (M1M9)

Mae’r radd BA yn y Gyfraith yn radd gymhwyso: ystyr hyn yw bod graddedigion sy’n dymuno gyrfa ym mhroffesiwn y gyfraith yn gymwys i barhau â hyfforddiant galwedigaethol ar y cwrs Ymarferiad y Gyfraith neu Legal Practice Course i gyfreithwyr, neu’r cwrs Bar Vocational Course (BVC) i fargyfreithwyr.

Gyrfaoedd gyda BA yn y Gyfraith

Mae llawer o gyfleoedd am waith i raddedigion yn y gyfraith. Mae’r wybodaeth a’r sgiliau sy’n cael eu datblygu wrth astudio am radd yn y gyfraith yn golygu y bydd myfyrwyr yn addas i lawer o yrfaoedd mewn gwleidyddiaeth, llywodraeth leol, busnes a’r cyfryngau yn ogystal â mynd i'r naill ochr neu’r llall o broffesiwn y gyfraith. I’r graddedigion a hoffai gymhwyso i fod yn gyfreithiwr, mae Aberystwyth yn cynnig ei Chwrs Ymarfer y Gyfraith ei hun o fewn Adran y Gyfraith a Throseddeg.

Gradd yn y Gyfraith gydag Iaith

A oes gennych ddiddordeb mewn ieithoedd? Gallwch hefyd wneud gradd BA yn y Gyfraith gydag Iaith.

Mae Gradd BA yn y Gyfraith gydag iaith yn para 4 blynedd ac fe fydd yn rhoi cyfle i chi astudio’r gyfraith gydag un o dair iaith Ewropeaidd. Dyma’r ieithoedd a gynigir:

• Ffrangeg [M1RC]
• Almaeneg [M1RF]
• Sbaeneg [M1RK]

Treulir y drydedd flwyddyn yn astudio yng Nghyfadran y Gyfraith yn un o'n sefydliadau partneriaethol mewn gwlad sy'n berthnasol i'r iaith a astudir. Mae’r flwyddyn honno yn rhoi cyfle i chi ddysgu am gyfundrefn gyfreithiol arall ac i ddysgu’r eirfa gyfreithiol angenrheidiol yn yr iaith dan sylw.

Ein Sefydliadau Partner