Ffiseg (yn cynnwys Blwyddyn Sylfaen)
F301 - 4 blynedd
Gradd Ffiseg (yn cynnwys blwyddyn Sylfaen) yn Aberystwyth
Gradd Ffiseg (yn cynnwys blwyddyn Sylfaen) – Gradd BSc Anrhydedd 4 mlynedd (F301)
Gradd Ffiseg (yn cynnwys blwyddyn Sylfaen)
Cynlluniwyd y cynllun gradd anrhydedd ‘Ffiseg yn cynnwys Blwyddyn Sylfaen’ hon i gynnig llwybr i addysg uwch ym meysydd Ffiseg neu Astroffiseg i fyfyrwyr sydd:
yn gymwys i symud ymlaen i addysg uwch, ond heb gymwysterau digonol mewn ffiseg a mathemateg
NEU
sydd heb y cefndir addysgiadol traddodiadol i gael mynediad i addysg uwch
NEU
nad ydynt hyd yma wedi cyflawni eu potensial academaidd yn llawn.
Beth fydda i’n ei astudio?
Bydd Myfyrwyr y cynllun gradd Ffiseg yn cynnwys Blwyddyn Sylfaen yn cychwyn drwy wneud blwyddyn sylfaen a ddysgir gan staff yn y Sefydliad Mathemateg a Ffiseg ar y prif Gampws ym Mhenglais. Mae’n cynnwys rhaglen cwbl integredig o ddarlithoedd, sesiynau ymarferol, seminarau a sesiynau tiwtorial mewn ffiseg, mathemateg, cyfrifiadureg, technegau labordy a sgiliau astudio. Mae’r cyfuniad hwn yn darparu amrywiaeth eang o wybodaeth a sgiliau sylfaenol mewn ffiseg a gwyddorau cysylltiedig. Mae’r dosbarthiadau gan amlaf yn cynnwys tua 20 o fyfyrwyr, felly mae yna ddigon o gyfleoedd i gael sylw unigol gan staff.
Ar ôl cwblhau’r flwyddyn sylfaen yn llwyddiannus, gall myfyrwyr gofrestru ar gyfer unrhyw un o’r cynlluniau gradd tair blynedd a gynigir gan y Sefydliad (gweler y rhestr isod). Gallant hefyd ddilyn rhaglenni gradd cymeradwy mewn adrannau eraill.
Manylion Strwythur y Cwrs
Nodweddion Allweddol
Cwrs 4 blynedd, amser llawn.
Hyfforddiant eang mewn Ffiseg.
Ar ôl cwblhau’r flwyddyn sylfaen yn llwyddiannus bydd myfyrwyr yn trosglwyddo i un o’n rhaglenni BSc (anrhydedd) a enwir (gweler y rhestr lawn gyferbyn).
Datblygu sgiliau technegol a sgiliau trosglwyddadwy.
Llwyth asesu amrywiol ond cytbwys drwy gydol y flwyddyn.
Staff brwdfrydig a chefnogol.
Cyfle i astudio yn un o ganolfannau ymchwil ffiseg mwyaf Cymru.
Lleoliad naturiol trawiadol ac amgylchedd arfordirol dilychwin
Gofynion Mynediad
Bydd mynediad i Ffiseg yn cynnwys Blwyddyn Sylfaen yn cael ei benderfynu ar sail unigol yn dilyn cyfweliad gyda’n tiwtoriaid mynediad.
Sut fydda i’n cael fy asesu?
Asesir y cwrs hwn drwy arholiad ac asesiadau yn ystod y tymor, a all gynnwys traethodau, adroddiadau labordy, seminarau, adolygiadau o destunau perthnasol, trafodaethau a phroblemau i’w datrys.
Ai dyma’r cwrs i mi?
Mae myfyrwyr y cwrs Ffiseg yn cynnwys Blwyddyn Sylfaen yn dod o amrywiaeth eang o gefndiroedd. Maent yn cynnwys myfyrwyr aeddfed a chanddynt amrywiaeth eang o brofiad blaenorol, yn ogystal â myfyrwyr tramor. Gall y cwrs recriwtio myfyrwyr sydd wedi tangyflawni yn eu hastudiaethau lefel A sy’n cynnwys Ffiseg a Mathemateg, ond dim ond mewn achosion lle mae yna reswm i ddisgwyl cynnydd mewn perfformiad.
Mae profiad yn dangos bod myfyrwyr sy’n cychwyn gyda’r cwrs Ffiseg yn cynnwys Blwyddyn Sylfaen yn gallu mynd ymlaen i gael y cymwysterau uchaf yn eu cynllun gradd dewisedig. Mae rhai wedi mynd ymlaen i ddatblygu gyrfaoedd mewn ymchwil gwyddonol.
Cynlluniau sydd ar gael ar ôl cyflawni’r Flwyddyn Sylfaen yn llwyddiannus
Ffiseg - MPhys (F303), BSc (F300)
Ffiseg gyda Ffiseg y Planedau a’r Gofod - MPhys (F366), BSc (F364)
Astroffiseg - MPhys (F511), BSc (F510)
Gwyddoniaeth y Gofod a Roboteg - MPhys (FH5P), BSc (FH56)
Ffiseg Fathemategol a Damcaniaethol - MMath (F341), BSc (F340)
Mae’n bosib y bydd cynlluniau cymeradwy eraill ar gael.
Blwyddyn Sylfaen Ffiseg: Blwyddyn 1
Mae’r Flwyddyn Sylfaen Ffiseg yn gosod sylfeini’r pynciau sy’n hanfodol ar gyfer astudio Ffiseg yn y Brifysgol:
- Grymoedd Ffisegol;
- Ffiseg Mater;
- Ffiseg Labordy;
- Dulliau Mathemategol ar gyfer Ffisegwyr;
- Osgiliadau a Thonnau, Trydan a Magneteg.
Gradd BSc Anrhydedd mewn Ffiseg (yn cynnwys Blwyddyn Sylfaen): Blynyddoedd 2-4
Yn ystod blynyddoedd 2-4 mae’r Radd yn symud ymlaen i drafod:
- Algebra a Chalcwlws;
- Dynameg a Pherthynoledd;
- Y Bydysawd Cwantwm;
- Ffiseg Cyfrifiadurol ac Arbrofol;
- Ffiseg Golau.
Yn ogystal ag ystod o Fodiwlau Dewis ardderchog i ddatblygu’ch diddordeb eich hun wrth i’r cwrs symud ymlaen. Gyda’i gilydd mae’r Modiwlau Craidd a’r Modiwlau Dewis yn gosod y sylfaen ar gyfer eich Prosiect Unigol - elfen ganolog o’r flwyddyn olaf, ac uchafbwynt y radd i lawer o fyfyrwyr. Ar ddiwedd blwyddyn 4, gellir dewis gwneud pumed flwyddyn i astudio tuag at gymhwyster MPhys.
Cyfleodd Gyrfaol a Chyfleoedd Astudio ar ôl Graddio
Mae graddedigion Ffiseg Aberystwyth yn mynd ymlaen i gael gyrfaoedd ym meysydd Masnach, Addysg, a nifer o swyddi eraill technegol sy’n ymwneud â Ffiseg yn y sector cyhoeddus a’r sector preifat. Maent oll yn gallu elwa ar ddealltwriaeth ardderchog o sylfaeni Ffiseg, hanes o waith prosiect personol a datrys problemau, a phrofiad o weithio mewn amgylchedd o ragoriaeth arloesol.
Gwybodaeth am y Cynllun Astudio
Mae’r wybodaeth ar y dudalen hon yn cyfeirio at y cynllun(iau) astudio canlynol
F301
Manylion Cyswllt
Dr Martin Wilding
Tiwtor Mynediad
Y Sefydliad Mathemateg a Ffiseg
Prifysgol Aberystwyth
Penglais
Aberystwyth
SY23 3BZ
Cymru
Ffôn: 01970 622 816 Ffacs: 01970 622 826 E-bost: mbw@aber.ac.uk Gwefan yr Adran