Drama ac Astudiaethau Theatr

Please turn on JavaScript.
Media requires JavaScript to play.

Trawsgrifiad o'r fidio

W401 - BSc 3 blynedd

Mae’r Adran yn falch o’i pherthynas brysur, sydd wedi’i hen sefydlu, â phartneriaid allweddol yn y diwydiant, megis y BBC, S4C, AVID, Cyngor Celfyddydau Cymru, y Cyngor Prydeinig a Chelfyddydau Rhyngwladol Cymru.

Cynlluniwyd y cwrs Drama ac Astudiaethau Theatr yn ofalus i sicrhau cydbwysedd rhwng profiadau academaidd ac ymarferol a datblygiad cyson sgiliau deallusol, perfformio a thechnegol ein myfyrwyr. Yn ystod y flwyddyn gyntaf astudir nifer o  odiwlau rhagarweiniol sy’n cyfuno dadansoddi testunol a hanes y theatr â gwaith ymarferol – cynllunio, technegol a pherfformio – sy’n cael ei ddysgu ar y cyd â chydweithwyr ar y cynllun gradd Senograffeg a Dylunio Theatr.

Yn yr ail flwyddyn edrychir yn fanylach ar yr achlysur theatrig, gan ddechrau â chraidd o fodiwlau dadansoddol – gan gynnwys dadansoddi testunau a pherfformiadau, theatr mewn cymdeithas a drama Ewropeaidd. Byddwch yn dewis wedyn o lith cyfres o fodiwlau sy’n ystyried cynhyrchu a chynllunio theatrig, gan gynnwys actio, cyfarwyddo, goleuo, sain a chynllunio setiau a gwisgoedd. Dechreuir y drydedd flwyddyn â semester o waith ymarferol dwys, lle bydd sgiliau dadansoddol ac ymarferol yn cael eu cyfuno a’u profi’n greadigol drwy gyfrwng gwaith cynhyrchu ar raddfa eang. Bydd y profiad hwn yn hyrwyddo ac yn atgyfnerthu’r modd y bydd myfyrwyr yn ymdrin â modiwlau dewisol arbenigol – modiwlau yn trafod theatr mewn addysg, Shakespeare mewn ysgolion, ysgrifennu creadigol i’r llwyfan, drama gyfoes ym Mhrydain ac Iwerddon, theatr a rhywedd, ac yn y blaen.

Adnoddau

Mae gennym gyfleusterau ardderchog i waith ymarferol, gan gynnwys pedwar gofod theatr gydag adnoddau rhagorol i gynulleidfa o tua 100 o bobl yr un. Yr ydym hefyd yn cynnal perfformiadau sylweddol yng Nghanolfan y Celfyddydau Aberystwyth. Mae gennym nifer o ystafelloedd ymarfer sy’n cael eu defnyddio’n barhaus, a gall theatrau darlithio’r Brifysgol ddarparu adnoddau clyweled soffistigedig ar gyfer modiwlau sy’n ymwneud â pherfformio, gan gynnwys taflunio fideo a graffeg cyfrifiadurol.

Dulliau Dysgu

O’r flwyddyn gyntaf cyflwynir cyfres o ddulliau dysgu addas, o ddarlithiau ffurfiol i arddangosiadau technegol ac o weithdai ysgrifennu i waith prosiect a ddyfeisir gan grŵp. Mae’r amrywiaeth gweithgaredd hwn yn rhan hanfodol o athroniaeth yr Adran, ac mae’n creu amgylchedd dysgu sy’n unigryw o gyffrous a chynhyrchiol.

Nod cyffredinol ein cwrs yw integreiddio gwaith ymarferol a gwaith academaidd, fel y gall un dull o astudio ysgogi a chyfoethogi’r llall. Mae’r cyfuniad hwn yn rhoi digon o gyfle ichi ddatblygu dull deinamig o ymdrin â theatr a pherfformiad, a mynegi eich dealltwriaeth o’r cyfrwng yn gorfforol, yn ddeallusol ac ar sail profiad. Dysgir nifer o fodiwlau ar y cyd â gweithwyr proffesiynol gwadd o fyd y theatr, ac mae’r Adran yn elwa’n ogystal drwy gydweithio â chyfarwyddwyr a chynllunwyr proffesiynol sy’n gweithio ym mhrif theatr y Brifysgol, a thrwy gyfrwng ein cysylltiadau â’r Ganolfan Ymchwil i Berfformio yn Aberystwyth, sy’n dwyn ynghyd weithwyr yn y maes ac academyddion o statws rhyngwladol. Bydd ein myfyrwyr hefyd yn cael y cyfle i geisio am le ar gynllun y Brifysgol iastudio dramor neu i dreulio blwyddyn mewn gwaith.

Asesu

Mae bywyd myfyrwyr Drama yn brysur. Mae pob un o’r myfyrwyr yn cymryd rhan mewn perfformiadau cyhoeddus o bwys yn ogystal ag mewn prosiectau llai, ac mae gofynion y gweithgareddau hyn, ynghyd â gofynion y gwaith academaidd, yn sylweddol. Fodd bynnag, bydd astudio yn yr Adran yn rhoi digon o brofiad ichi o gyfuno gwaith creadigol â gwaith academaidd beirniadol. Bydd myfyrwyr Astudiaethau Theatr yn cael eu hasesu drwy gyfrwng prosiectau grŵp, cyflwyniadau seminar a llyfrau nodiadau creadigol, yn ogystal â thrwy draethodau ffurfiol, arholiadau a chynyrchiadau.

Gyrfaoedd

Bellach mae gan dros 400 o’n cynfyfyrwyr gardiau Equity llawn ac maent yn gweithio yn y theatr, ar y teledu neu yn y ddau gyfrwng. Drwy ein system o ofal bugeiliol, yr ydym wedi ymrwymo i’ch hyfforddi i ddatblygu eich gyrfa mewn modd heriol a llawn gwybodaeth ac i’ch annog i fod yn ymwybodol o’r amrywiaeth o sgiliau y gallwch eu cynnig i ddarpar gyflogwr. Mae’r Adran yn ymdrechu i sicrhau eich bod yn meithrin llawer o sgiliau trosglwyddadwy defnyddiol sy’n hanfodol yn y farchnad swyddi gyfnewidiol sydd ohoni heddiw. Mae llawer o’n myfyrwyr hefyd yn dilyn gyrfa ym meysydd dysgu, cysylltiadau cyhoeddus, adnoddau dynol, rheoli a gwaith yn y gymuned.

Graddau cyfuno Drama gyda phynciau eraill

Ann-Marie Clancy BA Drama Swydd Wexford, Iwerddon

“Yn Aberystwyth mae’r cyfleoedd ar gyfer astudio drama fel pwnc sengl yn well nag ym mhrifysgolion a cholegau Iwerddon. Roedd yn hawdd iawn ymgartrefu yma, ac roedd digon o help ar gael os a phan oedd ei angen. Rwy’n hoffi Aberystwyth am ei bod yn fach ac yn gymuned glòs. Mae’n dref hyfryd i fyw ynddi. Fe ddes i yma ar Ddiwrnod Agored rai misoedd cyn i mi ddechrau astudio; roeddwn i eisoes wedi cael lle yn y Brifysgol ond roedd y penwythnos a dreuliais i yma cyn dechrau astudio yn help mawr oherwydd fe gyflwynodd fi i’r dref ac i’r campws. Mae’r Adran Astudiaethau Theatr, Ffilm a Theledu yn dda ac yn cynnig cyfleoedd rhagorol. Os nad ydych chi am ganolbwyntio ar ddrama yn unig, mae nifer o lwybrau y gallwch chi eu dilyn i gyfeiriad radio a theledu hefyd. Mae’r llyfrgelloedd, y cyfrifiaduron, y darlithfeydd a’r cyfleusterau academaidd cyffredinol yn rhagorol yma. Rwy’n hoffi’r dewis eang o gyrsiau a modiwlau sydd ar gael, ac mae’r myfyrwyr a’r staff yn gyfeillgar. Mae’r bywyd cymdeithasol yn dda iawn hefyd. Mae bywyd nos gwych yma, ac mae’n rhad! Eisoes rwyf i wedi argymell i eraill y dylen nhw ddod yma i astudio, ac fe wnaf i barhau i wneud hynny!”