Module Information

Mae'r modiwl yn manylu ar themâu modern mewn ecoleg gymunedol. Trafodir natur y gymuned a sut mae cymunedau planhigion yn perthyn i'w gilydd mewn tirwedd. O fewn tirwedd, gellid meddwl am fatrics sylfaenol ac o fewn hwn ceir darnau o fathau eraill o gymunedau. Fel arall, efallai ceir mosäig cymhleth. Mae'r ddau yn adlewyrchu patrwm yr adnoddau a'r cyfyngiadau sy'n digwydd mewn tirwedd benodol o ran amser a gofod. Yn y bôn, gall tirweddau ymddwyn fel "archsystemau". Mae cysylltedd yn bwysig o ran sut mae tirweddau integredig yn gweithio, a gall poblogaethau o rywogaethau unigol, yn hytrach na chael eu hynysu, ffurfio metaboblogaethau sy'n cyfrannu at eu sefydlogrwydd tymor hir.

Ystyrir newidiadau mewn cymunedau dros gyfnod o amser. Nid ydynt yn aros yn llonydd, ond yn newid, yn aml mewn ffyrdd sydd fel petai'n rhagweladwy. Gall y newidiadau gael eu gyrru gan ddilyniant y rhywogaethau sydd yno (hunangenedledig/autogenic), neu gan amodau amgylcheddol sy'n newid gydag amser (alogenig). Awgrymwyd y ddamcaniaeth cymhareb-adnoddau fel peirianwaith ar gyfer llystyfiant ar ei "anterth", ond gwelir diwedd pwyntiau newid lluosol mewn llawer o ardaloedd.
Yn y modiwl rhoddir ystyriaeth i ffenomenau naturiol a dynol sy'n effeithio ar gymunedau planhigion. Gall anifeiliaid, wrth bori, ddangos lefel uchel o arbenigaeth wrth lunio cyfansoddiad cymunedau planhigion, tra bydd tân naturiol yn dileu bio-màs mewn llawer o dirweddau. Gall defnydd dynol olygu math syml o ddileu bio-màs, megis mewn systemau gwair; neu fe all fod yn ddetholus, gan ganolbwyntio ar rywogaethau penodol neu grwpiau penodol o unigolion (megis rhai sydd tua'r un maint â'i gilydd) ar gyfer rhyw ddefnydd arbennig, a thrwy hyn, bydd yn effeithio ar natur y gymuned. Trafodir disgrifiadau o gymunedau planhigion a'r dosbarthiad gofodol, o ran dulliau rhifol (dosraniad a dosbarthiad) a dulliau llysgymdeithasegol disgrifiadol (wedi'r cynrychioli gan NVC).

Er mwyn datblygu profiad ymarferol disgwylir i fyfyrwyr wneud y canlynol:
i) Cynnal arolwg o famaliaid bychain o'r wythfed wythnos ymlaen: bydd hyn yn golygu trapio poblogaethau mamaliaid bach yn lleol a'u hasesu.
ii) Gwneud cwrs maes pum diwrnod yn lleol (yn ystod gwyliau'r Pasg). Y nod yw datblygu arbenigedd ar gyfer adnabod rhywogaethau planhigion mewn ystod eang o gynefinoedd gwahanol yng Nghymru gan gynnwys gwrychoedd a choetiroedd collddail. Bydd y myfyrwyr yn cael arweiniad a chyfarwyddyd ar y technegau gwahanol ar gyfer samplu a strategaethau asesu poblogaethau (planhigion ac anifeiliaid). Byddant hefyd yn disgrifio cymunedau ac yn edrych ar nodweddion pridd.
Oherwydd pwysigrwydd sgiliau ymarferol / sgiliau maes ar gyfer deall y pwnc hwn, mae asesiadau'r modiwl wedi'u pwysoli (70%) tuag at elfennau ymarferol gyda 30% yn seiliedig ar brawf.