Nod y modiwl
Amcan y modiwl yw cynnig cyflwyniad i esblygiad a rhychwant Gwleidyddiaeth Ryngwladol yn ei chrynswth, a bod
yn ddolen gyswllt rhwng modiwl y semester cyntaf a'r modiwl sydd i'w astudio yn yr ail a'r drydedd flwyddyn.

Disgrifiad cryno
Yn y semester cyntaf, cyflwynwyd gwleidyddiaeth ar raddfa fyd-eang o safbwynt realaeth. Dyma'r safbwynt pennaf yn
nhraddodiad yr astudiaeth academaidd o Wleidyddiaeth Ryngwladol, yn ei bwyslais ar wladwriaethau fel y cyfranwyr
pennaf, uchel-wleidyddiaeth diogelwch cenedlaethol, a'r duedd tuag at drais dan amodau anarchiaeth. Bydd y modiwl hwn yn
gymorth esbonio rhai o'r prif bosibiliadau eraill wrth ateb y cwestiwn "sut ydym i feddwl am wleidyddiaeth y byd?".
Byddwn yn ystyried y posibiliadau canlynol: Ffeminyddiaeth, Rhyddfrydiaeth, Theori systemau'r byd a chyfeiriadau newydd.

Nid yn unig y bydd y modiwl yn cyflwyno'r prif ddadleuon o fewn Gwleidyddiaeth Ryngwladol heddiw ac yn rhoi blas o'r prif
isfeysydd a drafodir o Flwyddyn 2 ymlaen, ond bydd hefyd yn cysylltu eich astudiaeth a rhai o'r prif gwestiynau ym mywyd
deallusol y Gorllewin ar hyn o bryd ar ddiwedd yr ugeinfed ganrif.

Amcanion
Nod y cwrs yw eich galluogi erbyn ei ddiwedd i drafod canolbwynt a rhychwant, cryfderau a gwendidau y safbwyntiau
a gyflwynwyd.