Disgrifiad cyffredinol
Mae'n bwysig fod myfyrwyr gwleidyddiaeth ryngwladol yn deall nad allanolion mo damcaniaethau i ni; yn hytrach yr ydym yn byw ein bywydau o fewn i ddamcaniaethau. Ni allwn ddechrau meddwl yn ddeallus am y byd cymdeithasol heb ddirnadaeth o faterion llosg, a chysyniadau megis iawnderau dynol, masnach, chwyldroadau, cenedlaetholdeb, ffederaliaeth, rhywedd a hil-laddiad. I'r perwyl hwn, mae'r deunydd dan sylw yn DGRH yn gwneud tri pheth: yn gyntaf mae'n adeiladu ar sail modiwlau rhagarweiniol Gwleidyddiaeth Ryngwladol yn Rhan Un; yn ail, mae'n rhoi sylw i nifer o faterion damcaniaethol o godir mewn modiwlau eraill yn Rhan Dau; yn drydydd, mae'n ceisio rhoi cyfanrwydd cyffredinol i astudiaethau academaidd o wleidyddiaeth ryngwladol.

Nod
Mae modd i'r hyn sydd dan sylw mewn damcaniaethau gwleidyddiaeth ryngwladol - sef pwy sydd yn cael beth, pryd, ymhle a sut ar raddfa fyd-eang - gael ei ddehongli mewn nifer o ffyrdd cyferbyniol. Un o amcanion cyffredinol y cwrs yw helpu'r myfyrwyr i fynd i'r afael mewn modd beirniadol a'r patrymau croes hyn, ac a'r ffordd y mae syniadau yn rhoi ffurf i arferion gwleidyddiaeth fyd-eang. Mae hynny yn ein galluogi ni i ateb cwestiynau allweddol megis: Sut yr ydym yn dewis rhwng damcaniaethau croes? Sut mae gwerthuso cyfraniad damcaniaethau i'r hyn sydd yn digwydd? Pa mor ddefnyddiol yw damcaniaethau gwleidyddiaeth ryngwladol heddiw?

Amcanion

• amlygu daelltwriaeth lefel anrhydedd o ddamcaniaethau a chysyniadau allweddol y cwrs trwy gyfraniadau llafar a asesir, trwy draethawd ysgrifenedig, a thrwy bapur arholiad ysgrifenedig.

• meddwl yn feirniadol am y berthynas rhwng damcaniaethau ac arferion yng ngwleidyddiaeth y byd.

• ymchwilio i'r tyndra neu'r gwrthddywediadau sydd wedi eu hymgorffori mewn llawer o ddamcaniaethau gwleidyddiaeth ryngwladol.

10 credydau ECTS