Cyrsiau am Ddim i Staff y Brifysgol

O fis Medi 2020, bydd staff y Brifysgol yn gallu astudio cwrs Dysgu Gydol Oes yn rhad ac am ddim.

Mae Dysgu Gydol Oes yn cynnig amrywiaeth helaeth o gyrsiau, o sgiliau cwnsela i ysgrifennu creadigol, o farchnata ar y cyfryngau cymdeithasol i Sbaeneg, o Arabeg i baentio haniaethol; mae yma rywbeth i bawb! Mae ein cyrsiau yn cynnig cyfle i staff feithrin sgiliau sy'n berthnasol i'w gwaith, yn ogystal â chasglu credydau Addysg Uwch, gan fod ein modiwlau i gyd wedi'u hachredu gan y brifysgol. Gall staff y Brifysgol weithio tuag at Dystysgrif Addysg Uwch mewn Celf a Dylunio, Ieithoedd Modern, Hel Achau, Ecoleg neu Ysgrifennu Creadigol. 

Os ydych yn cofrestru ar gwrs a gynhelir yn ystod eich oriau gwaith, bydd angen i'r cwrs hwnnw fod yn gysylltiedig â'r gwaith a bydd angen cael cymeradwyaeth eich Rheolwr Llinell. Bydd angen i chi gofrestru ar-lein fel aelod o staff a llenwi Ffurflen Compact Cytundeb, a bydd angen i'ch Rheolwr Llinell ei llofnodi. 

Ond os ydych yn cofrestru ar gwrs a gynhelir y tu allan i'ch oriau gwaith, y cwbl sydd angen i chi ei wneud yw cofrestru ar-lein fel aelod o staff a llenwi Ffurflen Compact Cytundeb, lle y bydd angen i chi gytuno i gyflwyno'r holl asesiadau sydd eu hangen i'r modiwl erbyn y dyddiadau cau a roddwyd. Ni fydd angen llofnod eich Rheolwr Llinell. 

Oherwydd sefyllfa COVID-19, bydd pob cwrs Dysgu Gydol Oes yn cael ei ddysgu ar-lein o fis Hydref i fis Rhagfyr 2020. Cyflwynir y cyrsiau hyn drwy'r safle dysgu ar-lein: Blackboard. Rydym hefyd yn defnyddio Microsoft Teams neu Zoom i gyflwyno elfennau byw'r cyrsiau ar-lein hyn. 

Felly, beth am bori drwy ein cyrsiau dysgu ar-lein? Oes rhyw bwnc rydych wastad wedi meddwl dysgu mwy amdano? Neu sgil rydych yn awyddus i'w datblygu 

Mae rhestr o'n holl gyrsiau a gynhelir y flwyddyn academaidd hon ar gael ar ein gwefan: https://www.aber.ac.uk/cy/lifelong-learning/  

Os oes gennych unrhyw gwestiynau am y fenter Cyrsiau am Ddim i Staff y Brifysgol neu am unrhyw gwrs, mae croeso i chi gysylltu â ni drwy'r ebost: dysgu@aber.ac.uk .