Gwyddor Filfeddygol (Blwyddyn 1)

Wedi cwblhau'r modiwl dylai'r myfyrwyr fedru:

1. Disgrifio adeiledd a gweithrediad arferol anifeiliaid gan gynnwys egwyddorion homeostasis a’r ffactorau sy’n gallu tarfu arnynt
2. Dangos dealltwriaeth o swyddogaethau theori foesegol, meddygaeth sy'n seiliedig ar dystiolaeth, a phroffesiynoldeb yng ngwaith y milfeddyg.
3. Deall adeiledd sylfaenol a natur fiolegol micro-organebau a pharasitiaid, a chymhwyso'r rhain i imiwnoleg, pathogenesis a dulliau rheoli clefydau penodol.
4. Disgrifio gofal anifeiliaid yng nghyswllt systemau cynhyrchu da byw, y diwydiant ceffylau ac anifeiliaid anwes, gan gynnwys dulliau rheoli, yr amgylchedd, maeth a'u hymddygiad arferol, a chymhwyso'r rhain wrth weithio gydag anifeiliaid penodol.
5. Nodi cyfraniad ymchwil fiolegol sylfaenol i faes milfeddygaeth

Mae’r modiwl yn cynnwys chwe "llinyn" a fydd yn cyflwyno’r myfyrwyr i hanfodion sylfaenol milfeddygaeth. Mae’r llinyn “Hwsmonaeth Anifeiliaid” yn rhoi cyflwyniad i ofal anifeiliaid a'r rhan y mae anifeiliaid yn ei chwarae yn ein cymdeithas. Yn ystod y flwyddyn gyntaf hon, bydd myfyrwyr yn meithrin dealltwriaeth ymarferol a damcaniaethol o anatomeg a ffisioleg prif systemau cyrff anifeiliaid, mewn tair llinyn: "Systemau Ymborth, Endocrinaidd a Throethgenhedlol", "Systemau Cardiofasgwlaidd, Resbiradol ac Ymsymudol" a "Niwroleg, Offthalmoleg a Synhwyrau Arbennig". Bydd myfyrwyr yn meithrin dealltwriaeth o’r cysyniadau biolegol creiddiol yn y llinyn "Egwyddorion Gwyddoniaeth" sy'n cwmpasu meysydd fel clefydau heintus, patholeg, geneteg ac imiwnoleg. Yn olaf, mae’r llinyn "Astudiaethau Proffesiynol a Meddygaeth ar Sail Tystiolaeth” yn cyflwyno themâu pwysig o ran proffesiynoldeb, moeseg, sgiliau cyfathrebu a gwneud penderfyniadau.

1. Rhoi trosolwg o adeiledd arferol meinwe, bioleg ddatblygiadol, ffisioleg, a hwsmonaeth anifeiliaid, gyda phwyslais ar dda byw domestig ac anifeiliaid anwes.
2. Datblygu’r sgiliau i weithio'n hyderus gyda da byw domestig ac anifeiliaid anwes a deall eu hymddygiad arferol.
3. Disgrifio adeiledd micro-organebau a pharasitiaid penodol, sut maent yn ymosod ar westeion anifeil, a'r dulliau a ddefnyddir gan fertebratau i’w gwrthsefyll.
4. Disgrifio prosesau genetig ar bob lefel o drefniadaeth (e.e. moleciwlaidd, cromosomaidd, poblogaeth) gan gyfeirio at adeileddau a chysyniadau priodol.
5. Disgrifio’r swyddogaethau a'r safonau sy’n ddisgwyliedig gan filfeddygon yn y proffesiwn.

Mae'r modiwl yn cynnwys y llinynnau canlynol:
1. AEU: Systemau Ymborth, Endocrinaidd a Throethgenhedlol
2. CRLS: Systemau Cardiofasgwlaidd, Resbiradol ac Ymsymudol
3. PVP: Astudiaethau Proffesiynol a Meddygaeth ar Sail Tystiolaeth
4. AH: Hwsmonaeth Anifeiliaid
5. PRIS: Egwyddorion Gwyddoniaeth
6. NOSS: Niwroleg, offthalmoleg a synhwyrau arbennig.
Bydd y modiwl yn cael ei ddysgu trwy gyfuniad o ddarlithoedd, sesiynau ymarferol a dysgu hunangyfeiriedig, gyda phwyslais cryf ar weithio mewn grwpiau bach a datrys problemau.

Mae'r modiwl hwn yn cydymffurfio a FfCChC Lefel 4