Disgrifiad o'r modiwl
Awgrymid mai dyma'r cyfnod pan osodwyd y sylfeini ar gyfer y Gymru fodern. Amcan y modiwl hwn yw astudio'r newidiadau a'r datblygiadau a gyfrannodd at y broses hon. Profodd y ddeunawfed ganrif gyfres o ddiwygiadau mewn addysg, crefydd, diwylliant a hunaniaeth genedlaethol, ynghyd a thwf yr haenau canol a dechreuadau radicaliaeth wleidyddol. Ceisir hefyd asesu dylanwad rhai unigolion blaenllaw wrth lunio hunaniaeth y Cymry. Y mae gwahanol haneswyr wedi cyfeirio at Griffith Jones, Howel Harris a Iolo Morganwg fel 'Cymro mwyaf ei oes'. Ond pa un ohonynt mewn gwirionedd a gafodd yr effaith mwyaf dwfn a pharhaol ar gymdeithas a diwylliant Cymru?

Canlyniadau dysgu
Ar gwblhau'r modiwl, dylai myfyrwyr fedru dangos dealltwriaeth o natur a strwythur y gymdeithas yng Nghymru yn ystod y cyfnod hwn, ynghyd a dylanwad twf llythrennedd, y Diwygiad Methodistaidd ac adfywiad diwylliannol y ddeunawfed ganrif a sut yr effeithiodd y datblygiadau hyn ar iaith a hunaniaeth y Cymry.