Module Information

Nod y modiwl hwn fydd cynnig cyfle i’r myfyrwyr i ddatblygu strategaethau a sgiliau ymchwilio ar gyfer gwahanol gynyrchiadau a digwyddiadau perfformio damcaniaethol. Fe fydd y rhain yn cynnwys cyrchu a phrosesu gwybodaeth a deunyddiau hanesyddol, artistig a synhwyrus, ac yn trafod y math o ymchwil a wneir o flaen llaw wrth baratoi cynhyrchiad, ac wrth ei gloriannu a’i werthuso. Rhoddir sylw hefyd i gymhwyso a threfnu’r wybodaeth fel sail ar gyfer creu perthynas â chynulleidfa.

Ar ddechrau’r semester cyntaf, bydd cydgysylltydd y modiwl yn amlinellu prosiect cynhyrchu damcaniaethol ar thema benodol, ac yn awgrymu ffynonellau gwybodaeth a dehongli i’r myfyrwyr. Disgwylir i’r myfyrwyr ddefnyddio’r ffynonellau hyn, ac ymestyn cwmpas y gwaith ymchwil yn ôl eu gallu a’u dehongliad neilltuol eu hunain o’r prosiect cynhyrchu.


Yn ystod wythnosau cynnar y modiwl ( yn amodol, ar ôl wythnos 6), gofynnir i’r myfyrwyr gyflwyno ‘pitch’ ymchwil sylfaenol a fydd yn cynnig amlinelliad bras o faes eu hymchwil hyd at hynny, a hefyd yn rhoi amcan o’r modd y maent yn bwriadu mynd ati i ddehongli a chymhwyso’r deunydd hwnnw yn ymarferol. Ar ddiwedd y modiwl, gofynnir iddynt lunio cyflwyniad hyd at 15 munud o hyd a fydd yn gweithredu ac arddangos eu cynhyrchiad terfynol ar ffurf étude ymarferol.

Gosodir tasgau ymchwil ar derfyn pob sesiwn, a bydd disgwyl i fyfyrwyr rannu eu gwaith yn y sesiwn nesaf.

Darlith 1: Cyflwyno’r Prosiect Cynhyrchu Damcaniaethol a Datblygu Themâu’r Prosiect

Darlith 2: Ffynonellau Gwybodaeth a Darganfod Methodolegau Ymchwil

Darlith 3: Theatr a Hanesyddiaeth

Darlith 4: Theatr a’r Archif

Darlith 5: Adolygiadau a Beirniadaeth

Darlith 6: Gwleidyddiaeth a Pholisïau Cyllido

Darlith 7: Ymchwilio Cynulleidfaoedd

Darlith 8: Marchnata Perfformiadau

Darlith 9: Rhannu Casgliadau Prosesau Ymchwil

Darlith 10: Cymhwyso a Pharatoi ar gyfer y Cyflwyniad

Gall trefn a chynnwys y sesiynau amrywio o flwyddyn i flwyddyn, yn unol â chynnwys a themâu’r cynhyrchiad damcaniaethol.