Digideiddio

Gall y Gwasanaethau Gwybodaeth ddarparu copïau wedi’u digido o eitemau ar restrau darllen modiwlau, yn amodol ar gliriad hawlfraint, cyfyngiadau trwydded a chronfeydd canolfannau cost. Gall y rhain fod ar gael i’r myfyrwyr wedyn trwy

Manteision

Mae sicrhau bod eitemau ar gael yn fwy eang fel hyn yn golygu

• y gall myfyrwyr ddefnyddio’r eitem/au y tu allan i oriau agor y llyfrgell
• y gall dysgwyr o bell a defnyddwyr eraill nad ydynt ar y campws ddefnyddio’r eitemau o le bynnag y maent
• lleihad o ran pwysau ar y stoc benthyca
• lleihad yn y broblem o golli/camosod eitemau
• y gallwn sicrhau ein bod yn glynu at y ddeddfwriaeth hawlfraint

Costau

Mae’r costau yn amrywio yn ôl argaeledd yr eitem:

• Eitemau sydd ar gael yn un o lyfrgelloedd Prifysgol Aberystwyth (mewn print yn unig). Gall y rhain gael eu digido yn ôl trwydded yr Asiantaeth Trwyddedu Hawlfraint (CLA) gan staff y llyfrgell, yn amodol ar gyfyngiadau, hawlfraint a thrwyddedu. Mae’r prisiau yn cychwyn ar £19.22 yr eitem. Byddwn yn gwirio i weld a fyddai tanysgrifio i e-lyfr neu e-gyfnodolyn yn fwy darbodus. Ceir rhagor o fanylion am drwydded yr Asiantaeth Trwyddedu Hawlfraint (CLA) yma
• Eitemau sydd ar gael yn y Llyfrgell Brydeinig (deunydd printiedig yn unig)
  O dan amodau ein trwydded Asiantaeth Trwyddedu Hawlfraint gallwn gyrchu copïau PDF o eitemau nad ydynt ar gael yn ein llyfrgelloedd ein hunain,  cyhyd â’u bod ar gael yn y Llyfrgell Brydeinig. Mae’r prisiau  yn amrywio gan ddibynnu ar ffi hawlfraint yr eitem. Edrychir i weld os yw tanysgrifiad i e-lyfr neu e-gyfnodolyn yn fwy darbodus.
• Eitemau nad oes modd eu digido yn ôl trwydded yr Asiantaeth Trwyddedu Hawlfraint (CLA)
  Bydd y rhain yn cael eu cyfeirio at Wasanaeth Digideiddio HERON

Argaeledd

Mae’r argaeledd yn amrywio yn ôl o ble y daw’r eitem:

• Gall eitemau sy’n cael eu digido yn ôl trwydded yr Asiantaeth Trwyddedu Hawlfraint (CLA) fod ar gael fel rheol ymhen pedair wythnos a gellir eu hadnewyddu yn flynyddol. Mae’n costio £10 yr eitem i’w hadnewyddu. Mae’n rhaid rhoi pedair wythnos o rybudd. Bydd staff y llyfrgell bob amser yn chwilio am y dewis sy’n rhoi’r gwerth gorau.
• Gall copïau HERON gymryd rhwng 3 wythnos a 2 fis a mwy i fod ar gael ac fel rheol maent yn ddrutach.

Gwneud ceisiadau

I wneud cais am gopi wedi’i ddigido e-bostiwch clastaff@aber.ac.uk gan nodi:

• rhif y modiwl
• manylion llawn yr eitem sydd i'w ddigideiddio gan gynnwys y rhifyn a rhifau’r tudalennau
• nifer y myfyrwyr sydd wedi'u cofrestru ar gyfer y modiwl

Gofynnwn i chi roi o leiaf pedair wythnos o rybudd os yw’n bosibl

Rhoi deunydd ar gael drwy Blackboard

Pan fydd deunydd wedi’i ddigideiddio fe ellir ei roi ar gael i fyfyrwyr drwy Blackboard. Mae tîm digideiddio’r llyfrgell yn gallu llwytho’r deunydd i Blackboard, ond cyfrifoldeb yr aelod o staff ei hun yw trefnu bod y myfyrwyr yn cael yr hawl i’w gweld. Sylwer nad Tîm Blackboard sy’n trefnu hyn. Mae dwy ffordd o drefnu bod myfyrwyr yn cael defnyddio’r deunydd:

• Drwy ychwanegu’r enw cofnodi clastaff fel Adeiladwr Cwrs i’r modiwlau perthnasol gan ddefnyddio Panel Rheoli Blackboard (gweler http://www.inf.aber.ac.uk/advisory/cymraeg/faq/594#add-users am ragor o fanylion). 

• Drwy drefnu bod clastaff yn cael hawliau Adeiladwr Cwrs drwy’r cofnod ar y gronfa ddata o fodiwlau (cysylltwch â gweinyddwr y gronfa ddata adrannol briodol - http://www.inf.aber.ac.uk/advisory/faq/619 )  

Os oes angen rhagor o wybodaeth am roi deunydd ar gael ar Blackboard, cysylltwch â Thîm Blackboard ( bb-team@aber.ac.uk ).