Actor Cymreig o fri yn derbyn Cymrodoriaeth er Anrhydedd

Rakie Ayola

Mae’r actor Rakie Ayola, enillydd sawl gwobr BAFTA, sy'n fwyaf adnabyddus am ei rolau yn Kaos, Doctor Who, The Pact a Holby City, wedi derbyn Cymrodoriaeth er Anrhydedd gan Brifysgol Aberystwyth.

Mae’r actor Rakie Ayola, enillydd sawl gwobr BAFTA, sy'n fwyaf adnabyddus am ei rolau yn Kaos, Doctor Who, The Pact a Holby City, wedi derbyn Cymrodoriaeth er Anrhydedd gan Brifysgol Aberystwyth.

Dyfarnwyd y Gymrodoriaeth er Anrhydedd yn ystod seremoni yng Nghanolfan y Celfyddydau Aberystwyth. Mae ei gyrfa yn ymestyn dros bedwar degawd ac mae hefyd yn cynnwys ymddangosiadau yn Anthony, Shetland a Midsomer Murders ar ITV.

Yn 2023, enillodd Wobr BAFTA Cymru am yr Actores Orau am ei rôl yn y ddrama BBC The Pact, lle portreadodd weithiwr cymdeithasol a mam i dri o blant, y caiff ei bywyd ei chwalu gan ddyfodiad dieithryn dirgel.

Yn yr un seremoni, enillodd hefyd wobr fawreddog Siân Phillips BAFTA Cymru, a roddir i unigolyn o Gymru sydd wedi gwneud cyfraniad sylweddol i ffilm neu deledu.

Mae ei gwobrau eraill yn cynnwys BAFTA am yr Actores Gefnogol Orau yn 2021 am ei rôl yn y ffilm BBC Anthony, yn ogystal â gwobr yr Actores Orau mewn Drama yn y Black British Theatr Awards yn 2020. Ynghyd â'i gwaith actio, mae hi'n gwasanaethu fel Ymddiriedolwr Theatr Genedlaethol Cymru a Fuel Theatre.

Wrth siarad am ei gwobr, dywedodd Rakie Ayola:

“Diolch yn fawr iawn Prifysgol Aberystwyth. Rwy’n wirioneddol ddiolchgar am eich cydnabyddiaeth o’m gwaith drwy’r anrhydedd hon. Diolch hefyd am seremoni gyflwyno mor bersonol. Mae arwyddocâd y wobr hon wedi’i gyfoethogi gan y caredigrwydd, y cynhesrwydd a’r haelioni a gefais gan eich staff academaidd a’ch myfyrwyr. Gobeithio mai dyma ddechrau perthynas hir, greadigol ac ysbrydoledig.”

Yn ystod ei hymweliad ag Adran Theatr, Ffilm a Theledu’r Brifysgol, cyfarfu â myfyrwyr a chymerodd ran mewn sesiwn holi ac ateb, gan rannu mewnwelediadau am ei gwaith ar y llwyfan ac ar y sgrin.

Dywedodd Dr Kim Knowles, Pennaeth yr Adran ym Mhrifysgol Aberystwyth:

“Mae Rakie yn un o actorion Cymreig mawr ein hoes. Mae ei hyblygrwydd ar y llwyfan a’r sgrin ar draws ystod eang o rolau a genres yn hynod drawiadol.

“Mae hi hefyd yn gwybod pwysigrwydd rhoi rhywbeth yn ôl, boed hynny drwy wasanaethu fel llysgennad i’r Anthony Walker Foundation, noddwr yr Actor’s Children’s Trust, y Childhood Tumour Trust, Collage Voices, Praxis Performing Arts, neu Wobrau Cerddoriaeth Pobl Ddu Cymru. Mae hi’n dderbynnydd haeddiannol iawn o Gymrodoriaeth er Anrhydedd.”

Rhannu