Ystyried astudio am radd meistr neu ddoethuriaeth?

Dydd Llun 27 Tachwedd 2006
Ystyried astudio am radd meistr neu ddoethuriaeth?
Ffair Astudiaethau Uwchraddedig Aberystwyth: Dydd Mercher 29ain Tachwedd 2006
Bydd Prifysgol Cymru Aberystwyth (PCA) yn cynnal ei seithfed Ffair Astudiaethau Uwchraddedig ar ddydd Mercher, 29ain Tachwedd 2006. Gwahoddir unrhywun sydd â diddordeb i fynychu'r Ffair.  Mae'r Ffair bellach wedi ei sefydlu fel digwyddiad blynyddol yn y Brifysgol.

Cynhelir y Ffair yn Ystafell Fwyta Uwch yn Neuadd Penbryn ar Gampws Penglais y Brifysgol ac fe fydd ar agor o 11.00 y.b. tan 3.00 y.h..

Pwrpas cynnal Ffair Astudiaethau Uwchraddedig blynyddol yw rhoi'r cyfle, nid yn unig i fyfyrwyr presennol ond hefyd i bobl o’r gymuned leol, i holi ynglŷn â'n cyrsiau uwchraddedig.  Cewch gyfle i gwrdd â staff academaidd i drafod y gwahannol agweddau o astudiaethau uwchraddedig yn Aberystwyth.  Gellir hefyd trafod y broses dderbyn a derbyn cyngor ar faterion ariannol oddi wrth staff o’r Swyddfa Derbyn Graddedigion.  Mae’n angenrheidiol fod darpar fyfyrwyr uwchraddedig yn derbyn cyngor ar y materion hyn yn gynnar yn y broses er mwyn manteisio ar y cyfleoedd cyllido sydd ar gael.

Yn ôl Dr. Rhys Williams, Swyddog Derbyn Graddedigion yn PCA, “Yn ôl holiaduron a dderbynwyd yn dilyn ffeiriau blaenorol, nododd canrannau uchel iawn o’r atebwyr y bu eu hymweliad yn fuddiol. ‘Rydym yn falch ein bod yn gallu rhoi’r cyfle hwn i ddarpar uwchraddedigion gwrdd â staff o fwy nag un adran mewn un lle ac felly ymchwilio’r holl bosibiliadau sydd ar gael iddynt yn Aberystwyth. Mae hyn yn cynnwys cyllid, sy’n bwnc pwysig i fyfyrwyr.”

“Mae yna nifer o gyrsiau a chyfleoedd ymchwil gennym yn Aberystwyth ar gyfer myfyrwyr sydd esiau astudio ymhellach. Os ydych erioed wedi ystyried astudio ar lefel uwchraddedig, yna byddwch yn elwa o fanychu’r Ffair Astudiaethau Uwchraddedig.  Cymerwch y cyfle hwn i ganfod mwy.”

Yn ogystal â nifer o ffynonellau cyllid allanol, yn enwedig o Gynghorau Ymchwil y Deyrnas Unedig, gwobreir nifer o Ysgoloriaethau Ymchwil bob blwyddyn gan y Brifysgol.  Mae nifer o’n adrannau academaidd hefyd yn cynnig grantiau i fyfyrwyr Meistr. Mae myfyrwyr uwchraddedig Aberystwyth hefyd yn elwa o Swyddfa Astudiaethau Uwchraddedig eu hunain ac adnoddau ymchwil gwych gan gynnwys mynediad yn rhad ac am ddim i Lyfrgell Genedlaethol Cymru.

Dylai darpar fyfyrwyr uwchraddedig gysylltu â Dr. Rhys Williams yn y Swyddfa Derbyn Graddedigion.  Ffôn: 01970 622270  Ffacs: 01970 622921  E-bost: rlw@aber.ac.uk neu ymwelwch â www.aber.ac.uk am ragor o fanylion.