Gwybodaeth am Fodiwlau

Mae'r modiwl hwn yn cynnig cyfle i fyfyrwyr lunio, datblygu, ymarfer, cynhyrchu a chyflwyno eu prosiect perfformio eu hunain mewn grŵp gan ymateb i friff penodol. Bydd y modiwl yn cael ei gynnal yn bennaf trwy weithdai hunan-arweiniol a fydd yn arwain at ddatblygiad perfformiad byw a all gael ei berfformio mewn stiwdio neu mewn lleoliad safle-benodol. Bydd y gwaith yn cael ei arwain gan ddarlith/dangosiadau dan arweiniad staff yn ystod tair wythnos gyntaf y modiwl, gan ganolbwyntio ar astudiaethau achos o ymarfer ensemble ym maes theatr a pherfformio cyfoes. Bydd hyn yn creu sylfaen ar gyfer y gwaith ymarferol dilynol. Trwy gydol y modiwl, bydd staff yn arwain gweithdy un awr wythnosol, ble bydd myfyrwyr yn cyflwyno ac yn trafod gwaith a ddatblygwyd yn ystod y sesiynau ymarferol hunan-arweiniol.

Disgwylir i fyfyrwyr weithio ar y cyd i ddatblygu cyflwyniad cysyniadol ar gyfer y prosiect ensemble (i'w gyflwyno yn wythnos pedwar) ac wedi hynny tuag at berfformiad byw 25 – 30 munud ar ddiwedd y semester i'w gyflwyno yn wythnos olaf ond un y semester.

Darlith: 3 x 1 awr
Gweithdiau: 8 x 1 awr
Ymarferion Hunan-Arweiniol: 18 x 2 awr

Ran amlaf, bydd y broses o ddatblygu darn perfformio cydweithredol yn cynnwys yr elfennau canlynol:

- adnabod modelau o greu theatr ac o arferion perfformio cyfoes er mwyn efelychu a datblygu dulliau o ddyfeisio a chreu (e.e. Goat Island; Lone Twin; Frantic Assembly, ac ati).
- ymchwilio i wahanol fodelau dramatig a'u cymhwyso yn y gwaith
- sgorio neu sgriptio priodol
- cynllunio a gweithredu proses ymarferion a hyfforddiant priodol
- cynllunio a gweithredu elfennau senograffig a thechnolegol
- archwilio cyfres o ddewisiadau ynghylch ffurfio grŵp cydweithredol
- negodi rolau o fewn y grŵp, mannau cychwyn ar gyfer y gwaith, dewisiadau esthetig a methodolegau gwneud theatr gydweithredol
- rheoli cyllideb, amser ac adnoddau technegol
- nodi a gwerthuso'r berthynas rhwng y gynulleidfa â'r perfformiwr, a chreu llwyfaniad priodol ar gyfer y digwyddiad byw

Drwy gydol y broses, anogir myfyrwyr i gymhwyso eu hymarfer creadigol a hunanfeirniadol ei hunain er mwyn gwireddu'r digwyddiad perfformiadol a'i gyd-destunoli ym meysydd theatr a pherfformio cyfoes.