Mrs Amanda Jones

Nyrs Gofrestredig (Plant) , Nyrs Iechyd Cyhoeddus Gymunedol Arbenigol (YI), MSc Iechyd Cyhoeddus, Myfyrwraig Doethuriaeth,TUUAU, Athro Nyrsio Cofrestredig, Nyrs Gofrestredig Rhagnodi, Cymrawd ar gyfer yr Academi Addysg Uwch, Pontio achrededig i arweinyddiaeth

Arweinyddiaeth a chyfrifoldebau strategol

Amanda Jones yw’r Prif Arweinydd a Phennaeth Addysg Gofal Iechyd ym Mhrifysgol Aberystwyth, ac mae’n un o aelodau sefydlu’r Ganolfan Addysg Gofal Iechyd. Mae’n arwain y tîm nyrsio ac mae ganddi gyfrifoldeb gweithredol dros ddarpariaeth BSc Nyrsio amser llawn a rhan-amser y Brifysgol, y rhaglen Dychwelyd i Ymarfer a’r Dystysgrif Lefel 4 mewn Addysg Gofal Iechyd.

Mae Amanda yn arwain ar berthynas y Ganolfan â phartneriaid dysgu ymarfer ac Addysg a Gwella Iechyd Cymru (AaGIC), sy’n comisiynu lleoedd ar raglenni gradd nyrsio yng Nghymru. Mae ei rôl yn cysylltu darpariaeth rhaglenni’r Brifysgol a dysgu ymarfer â blaenoriaethau addysg gweithlu’r GIG. Mae wedi cyfrannu at dendrau a cheisiadau llwyddiannus a sicrhaodd gyllid ychwanegol ar gyfer addysg gofal iechyd yng nghanolbarth Cymru.

Rolau cenedlaethol a ledled y DU

• Is-Gynullydd, Cyngor Deoniaid Iechyd Cymru, penodwyd ym mis Mai 2024
• Cynrychiolydd Cymru, Pwyllgor Gweithredol y Nyrsys Arweiniol dros Addysg, penodwyd ym mis Ebrill 2025
• Cyd-gadeirydd, Grŵp Llywio Cymru Gyfan ar Fyfyrwyr Rhyngwladol AaGIC, penodwyd ym mis Rhagfyr 2025
• Aelod o Grŵp Nyrsio Cyn Cofrestru Cymru Gyfan a Grŵp Bwrsariaethau Llywodraeth Cymru

Mae Amanda hefyd yn cyfrannu at lywodraethu academaidd a phroffesiynol ym Mhrifysgol Aberystwyth drwy ei phaneli Arfer Academaidd Annerbyniol ac Addasrwydd i Ymarfer ym maes Nyrsio.

Ymchwil ac arbenigedd proffesiynol

Dechreuodd Amanda ei Doethuriaeth Broffesiynol ym mis Medi 2025. Mae ei hymchwil yn archwilio sut mae arweinyddiaeth dosturiol yn llywio’r ffordd y mae gweithwyr yn gwneud penderfyniadau mewn sefydliadau gofal iechyd yng Nghymru.

Mae Amanda wedi bod yn Nyrs Gofrestredig ers dros 33 mlynedd. Mae hefyd yn Nyrs Iechyd Cyhoeddus Cymunedol Arbenigol ym maes ymweld ag iechyd, yn Nyrs Gymunedol Ragnodi Gofrestredig ac yn Athrawes Nyrsio Gofrestredig gyda’r Cyngor Nyrsio a Bydwreigiaeth (NMC). Mae ei phrofiad clinigol yn cynnwys gweithio fel ymwelydd iechyd o fewn rhaglen Dechrau’n Deg yng nghanolbarth Cymru. Mae ganddi MSc mewn Iechyd Cyhoeddus ac arbenigedd ym maes diogelu plant a phobl ifanc.

Mae Amanda yn Gymrawd o’r Academi Addysg Uwch a chwblhaodd ei Thystysgrif Ôl-raddedig mewn Addysgu mewn Addysg Uwch drwy gyfrwng y Gymraeg. Enillodd achrediad Advance HE ar gyfer Transition to Leadership ym mis Gorffennaf 2023.

Addysg ddwyieithog a chyfraniadau allanol

Cyn ymuno â Phrifysgol Aberystwyth, roedd Amanda yn Uwch Ddarlithydd ym Mhrifysgol Abertawe, lle bu’n arwain y gwaith o weithredu Safonau’r Gymraeg ar draws ei choleg. Mae’n siarad Cymraeg yn rhugl ac mae ganddi brofiad o siarad yn gyhoeddus yn Gymraeg ac yn Saesneg. Mae wedi addysgu a chefnogi myfyrwyr israddedig ac ôl-raddedig yn y ddwy iaith, mewn lleoliadau academaidd a chlinigol.

Mae Amanda wedi gwasanaethu fel Arholwr Allanol i Brifysgol Sunderland ac fel arbenigwr pwnc allanol ar gyfer cymeradwyo rhaglenni gan yr NMC mewn sefydliadau addysg uwch eraill. Yn 2017, derbyniodd wobr staff am Hyrwyddo Cydraddoldeb, Amrywiaeth a Chynhwysiant.