Newyddion

Diwrnod Iechyd Meddwl y Brifysgol yn y llyfrgell

12/03/2026

Mae heddiw yn Ddiwrnod Iechyd Meddwl y Brifysgol. Pwrpas y diwrnod ydy ysgogi sgyrsiau am les myfyrwyr ac i feithrin amgylchedd cefnogol ar y campws. Heddiw, dewch i'r llyfrgell a chymerwch ychydig o amser i ganolbwyntio ar yr hyn sy'n wirioneddol bwysig: chi!

Mae datblygu mewnwelediad a dealltwriaeth trwy ddarllen, a chymryd yr amser i ymlacio a lleihau straen wrth wneud, yn bwysig iawn i'n lles corfforol a meddyliol. Ac mae'n llyfrgelloedd ni yn deall hynny'n well na dim!

Dewch i Lefel E, Llyfrgell Hugh Owen lle byddwch yn dod o hyd i ddetholiad o deitlau o'n casgliad Darllen yn Well, sy'n cynnwys llyfrau ac e-lyfrau sy'n hyrwyddo lles meddyliol, ymwybyddiaeth ofalgar a hunan-ofal. Neu archwiliwch y casgliad ar-lein yma: Darllen yn Well

Darllenwch yn well heddiw, teimlwch yn well am sbel :)

Dathlu Dydd Gwyl Dewi

26/02/2026

Pa ffordd well o ddathlu Dydd Gwyl Dewi na gyda llyfrau?

Efallai ein bod yn dangos tuedd. Ond! Mae gan y llyfrgell filoedd o lyfrau Cymreig a Chymraeg (ac ambell iaith arall) sydd wedi dod o Gymru ac maen nhw'n anhygoel.

Porwch nhw yn ein Casgliad Celtaidd ar-lein neu ar Lefel F, Llyfrgell Hugh Owen

Dydd Gwyl Dewi Hapus i ni i gyd!

Darllenydd Uwch Kortext - Gwasanaethau Llyfrgell

16/02/2026

O 12 Mawrth bydd yn rhaid i ddefnyddwyr ddefnyddio dull gwahanol i gael mynediad at yr opsiynau Darllenydd Uwch yn Kortext e.e. testun-i-leferydd. Mae'r feddalwedd sy'n cynnal ein darlleniadau wedi’u digideiddio yn cael ei diweddaru ac yn aros am integreiddio pellach â Kortext.

I gael mynediad at yr opsiynau Darllenydd Uwch, bydd angen i chi gymryd y camau canlynol:

Agor y darlleniad wedi'i ddigideiddio ar eich rhestr ddarllen.
Lawrlwytho copi o'r darlleniad (sydd wedi'i leoli ar ochr chwith y sgrin).
Mewngofnodi i wefan Kortext.
Uwchlwytho’r testun wedi'i lawrlwytho i'ch Silff Lyfrau. Agor y darlleniad o'r Silff Lyfrau i gael mynediad i'r opsiynau Darllenydd Uwch.

Byddwn yn eich diweddaru pan fydd yr integreiddio wedi'i gwblhau.

Ymddiheurwn am unrhyw anghyfleustra a achosir, os oes gennych ragor o gwestiynau, cysylltwch â ni ar digideiddio@aber.ac.uk.

Bydd Dydd Miwsig Cymru yn digwydd ar 13 Chwefror 2026

12/02/2026

P’un a ydych chi’n hoffi miwsig indi, roc, pync, ffync, gwerin, electronica, hip hop neu unrhyw beth arall, mae miwsig anhygoel yn cael ei greu yn y Gymraeg i chi ei ddarganfod. Mae’r diwrnod yn dathlu pob math o fiwsig Cymraeg.

Dewch i weld y stondin Pop Aber ar Lefel D, Llyfrgell Hugh Owen i ddysgu mwy!

Wyt ti eisiau helpu gwneud hi'n haws i ddarganfod llefydd o gwmpas y campws?

09/02/2026

Wyt ti wedi colli dy ffordd ar y campws? Rydym yn cynnal astudiaeth fer i ddeall sut mae myfyrwyr yn darganfod eu ffordd o gwmpas Prifysgol Aberystwyth, ac angen dy help.

Rydym yn chwilio am fyfyrwyr i gymryd rhan mewn sesiwn anffurfiol, fer o ran llywio'r campws.

Pam cymryd rhan?

Helpu i wneud y campws yn le haws i'w lywio.
Creu gwahaniaeth cadarnhaol i fyfyrwyr.
Derbyn £5 o gredyd Cerdyn Aber fel diolch.

I gofrestru

I gael gwybod mwy neu i gymryd rhan, mae modd cwblhau’r ffurflen ganlynol: https://forms.office.com/e/GWfynGMEk6 neu anfon e-bost at croeso@aber.ac.uk.

Diweddariad Blackboard fis Chwefror

06/02/2026

Gwelliannau yn niweddariad Blackboard fis Chwefror:

Defnyddio awtomeiddio i atgoffa myfyrwyr i wirio eu hadborth
Pentyrru blociau yn fertigol yn Dogfennau
Gwell defnyddioldeb ar gyfer Cyflawniadau

Am fanylion pellach, gweller ein blog: Beth sy’n Newydd yn Blackboard mis Chwefror 2026.

Galw am Gynigion: Cynhadledd Fer: Cynhadledd y Rhwydwaith Niwroamrywiaeth

05/02/2026

Bydd y gynhadledd fer nesaf yn cael ei chynnal fore dydd Mawrth 14 Ebrill 2026.

Rydym ar hyn o bryd yn gwahodd cydweithwyr i gyflwyno cynigion. Gallwch archebu’ch lle nawr hefyd. Gweler ein blog am ragor o wybodaeth.

Gwobr Cwrs Nodedig Blackboard 2025-26

12/01/2026

Mae’r ceisiadau ar gyfer Gwobr Cwrs Nodedig eleni ar agor, a’r dyddiad cau yw dydd Gwener 30 Ionawr 2026.

Gweler ein neges flog am ragor o wybodaeth.

Cynhadledd fer ar DA cynhyrchiol: Deunyddiau ar gael

06/01/2026

Mae'r deunyddiau o'n cynhadledd fer ym mis Rhagfyr ar DA Cynhyrchiol bellach ar gael ar ein tudalennau gwe.

O 12 Ionawr ymlaen: llif gwaith llyfrnodi newydd yn Aspire ar gyfer staff sy'n defnyddio'r estyniad porwr

06/01/2026

O 12 Ionawr, wrth ddefnyddio’r estyniad porwr i ychwanegu adnoddau llyfrgell at restrau darllen eich modiwlau yn Aspire, fe welwch lif gwaith newydd a gwell sy’n cynnig y canlynol:

Rhagolwg o’ch llyfrnod cyn ei ychwanegu at y rhestr ddarllen
Dewis rhwng ffynonellau amgen gyda’r un teitl
Os bydd angen gwneud newidiadau, mae’r ffurflen Golygu adnodd bellach yn dangos dewisiadau’r ddewislen fel botymau mewn panel cyfochrog

Cewch ganllaw cam wrth gam yn yr erthygl gymorth gan Talis, neu gallwch wylio’r fideo byr.

Mae croeso i chi gysylltu â'ch llyfrgellydd pwnc neu'r Tîm Cysylltiadau Academaidd i ofyn iddynt ddangos sut mae’r broses newydd yn gweithio.

Tîm Ymgysylltu Academaidd y Llyfrgell yn derbyn canmoliaeth gan CILIP Cymru am eu Cwrs Llythrennedd AI.

06/01/2026

Mae Tîm Ymgysylltu Academaidd Llyfrgell Prifysgol Aberystwyth wedi derbyn clod yng Ngwobr Tîm y Flwyddyn Llyfrgell Cymru CILIP Cymru 2025 am ddylunio a chyflwyno Cwrs Llythrennedd DA dwyieithog cwbl hygyrch a chynhwysol https://rise.articulate.com/share/uXQfvQf-7Z01ynCVGnJoL94obU328Klq // Cy: https://rise.articulate.com/share/4oOrQodS_sRXPaXsYaWEc2MSEXtlIIel

Meddai Simon French a Shân Saunders, oedd yn arwain y prosiect hwn yn Llyfrgell y Brifysgol: "Mae'r Cwrs Llythrennedd Deallusrwydd Artiffisial yn ymateb dwyieithog, ymarferol, prifysgol-gyfan i un o'r materion mwyaf dybryd ym maes addysg uwch heddiw. Gobeithiwn fod y myfyrwyr a’r staff yn cydnabod y cwrs fel adnodd hanfodol a'i fod yn dangos sut y gall llyfrgellwyr arwain y ffordd o ran helpu myfyrwyr i lywio cyfleoedd a risgiau Deallusrwydd Artiffisial."

Esboniodd Simon French “Ein nod ar gyfer y cwrs oedd darparu adnodd cydlynol a hygyrch sy'n ateb anghenion ein myfyrwyr yn uniongyrchol. Cynlluniwyd y cwrs fel bod modd i fyfyrwyr ddilyn y modiwlau mewn ffordd aflinol sy’n caniatáu iddynt fanteisio ar adnoddau yn ôl yr angen. Mae'r cynnwys yn seiliedig ar ymarfer academaidd yn y byd go iawn, gydag enghreifftiau'n deillio o dasgau ac aseiniadau nodweddiadol myfyrwyr.”

Mae Shân Saunders yn edrych tua'r dyfodol, “Dydy Deallusrwydd Artiffisial ddim yn sefyll yn llonydd, a dydyn ninnau ddim chwaith. Wrth i dechnoleg esblygu, mae'n rhaid i'r gefnogaeth a roddir i fyfyrwyr esblygu hefyd. Fe wnaethom ni gynllunio'r cwrs mewn ffordd fodiwlaidd yn fwriadol fel ei fod yn hawdd i'w addasu ac yn gynaliadwy. Mae dau ychwanegiad newydd yn cael eu datblygu i'r cwrs: un yn canolbwyntio ar ddeallusrwydd artiffisial a hygyrchedd, yn archwilio sut y gall y dechnoleg gefnogi dull cynhwysol o ddysgu; ac un arall ar ddeallusrwydd artiffisial a chyflogadwyedd, fydd yn helpu myfyrwyr i ddeall sut mae deallusrwydd artiffisial yn ail-siapio'r gweithle a sut y gellir ei ddefnyddio i wella eu rhagolygon gyrfa. Bydd y modiwlau newydd yma yn sicrhau bod y cwrs yn parhau i fod yn berthnasol i anghenion myfyrwyr ac yn ymgysylltu â'r sgyrsiau ehangach sy'n siapio addysg uwch a'r farchnad swyddi .”

Mae'r Wobr, a noddir gan Lywodraeth Cymru a CILIP Cymru, yn dathlu cyflawniadau timau sy'n gweithio yn y gwasanaethau Llyfrgell/Gwybodaeth yng Nghymru. Mwy o wybodaeth ar gael ar wefan CILIP Cymru

Mwy o wybodaeth am Gwrs Llythrennedd DA y Llyfrgell

Nid yw Deallusrwydd Artiffisial Cynhyrchiol yn mynd i unman. Gallai ei dwf cyflym a'i ddylanwad cynyddol ei wneud yn Google ein cenhedlaeth. Cafodd ei dderbyn yn fuan iawn gan y myfyrwyr. Os cerddwch trwy'r llyfrgell fe welwch sut maen nhw'n defnyddio'r dechnoleg i ddysgu, ymchwilio ac ysgrifennu. Ond daw'r dechnoleg hon hefyd â heriau newydd o ran uniondeb academaidd, meddwl beirniadol, a llythrennedd digidol. Er mwyn paratoi'r myfyrwyr ar gyfer y byd newydd hwn o ddeallusrwydd artiffisial, mae tîm Ymgysylltu Academaidd Llyfrgell Prifysgol Aberystwyth wedi cynllunio a chyflwyno Cwrs Llythrennedd DA dwyieithog (Cymraeg a Saesneg) cwbl hygyrch a chynhwysol. Mae'n cynnwys cyfres o fodiwlau byr, diddorol ac ymarferol gyda'r nod o helpu myfyrwyr i ddatblygu hyder mewn DA a'i ddeall a'i defnyddio'n gyfrifol.

Mae'r cynllun yn adlewyrchu profiad llyfrgellwyr mai modiwlau byr â ffocws pendant yw'r ffordd fwyaf effeithiol o ennyn diddordeb myfyrwyr, yn enwedig wrth fynd i'r afael â phwnc cymhleth sy'n symud yn gyflym fel DA. Mae pob modiwl yn cyflwyno maes allweddol (o ddeallusrwydd artiffisial a meddwl beirniadol i ddyfynnu a chyfeirio, i foeseg defnyddio deallusrwydd artiffisial) gan roi'r theori yn ogystal â'r sgiliau ymarferol i fyfyrwyr gael eu defnyddio’n uniongyrchol yn eu hastudiaethau.

Er mwyn atgyfnerthu'r ddysg, caiff y myfyrwyr brofi eu gwybodaeth trwy gwisiau byr ar ddiwedd pob modiwl. Mae'r modiwl olaf yn gwis crynodol hirach. Ar ôl cwblhau'r modiwl cwis yn llwyddiannus, mae’r myfyrwyr yn derbyn bathodyn sy'n dangos eu bod wedi cwblhau'r cwrs yn llwyddiannus. Mae'r cwisiau'n defnyddio amrywiaeth o wahanol fathau o gwestiynau, gan gynnwys dewis lluosog, atebion lluosog, a phroblemau sy'n seiliedig ar senarios, sydd wedi'u cynllunio i herio camdybiaethau ynghylch deallusrwydd artiffisial ac annog ymgysylltiad dyfnach â'r pwnc.

Mae'r prosiect wedi arwain at gydweithrediadau newydd ar draws y brifysgol. Gweithiodd aelodau'r tîm Ymgysylltu Academaidd yn agos â'r Dirprwy Is-Ganghellor dros Addysg a Phrofiad Myfyrwyr, Cyfarwyddwyr Dysgu ac Addysgu adrannol, a staff sy'n gweithio ar faterion uniondeb academaidd i sicrhau bod y cwrs yn adlewyrchu gwerthoedd sefydliadol a disgwyliadau disgyblaethol.

Newid i'r system archebu ystafell astudio yn Llyfrgell Hugh Owen

13/11/2025

Mae newid ar y gweill i’r system archebu ystafelloedd astudio yn Llyfrgell Hugh Owen. Bydd defnyddwyr brwd eisoes wedi sylwi bod yr hen sgriniau archebu / joan boards wedi mynd.

Byddwn yn darparu manylion am y ffordd newydd, gyfleus ichi reoli’ch archebion cyn gynted â phosibl.

Yn y cyfamser, cewch wirio pa ystafelloedd sydd ar gael, ac archebu yma: https://faqs.aber.ac.uk/cy/2607