Mathau parhaus o feillion: ffynhonnell wydn o brotein a dyfwyd gartref ar gyfer ffermio cynaliadwy

Mae meillion coch a gwyn yn chwarae rôl allweddol mewn cynhyrchu da byw yn gynaliadwy. Maent yn lleihau’r angen am wrteithiau nitrogen gwneuthuredig trwy gloi nitrogen o’r atmosffer, ac maent yn darparu ffynhonnell werthfawr o brotein a dyfwyd gartref—sy’n cynnig dewis amgen yn lle soia a gaiff ei fewnforio. Yn hanesyddol, fodd bynnag, defnydd cyfyngedig sydd wedi’i wneud o feillion oherwydd eu diffyg gwydnwch a’u hanallu i bara mewn systemau pori neu dorri.

Mae gwyddonwyr yn IBERS wedi goresgyn y rhwystrau hynny trwy ddatblygu mathau newydd o feillion y mae eu gallu i bara ac i berfformio’n dda yn amodau’r maes yn well o lawer.

Er mwyn gwella gallu meillion gwyn i bara, mae ymchwilwyr wedi llwyddo i greu’r croesiad cyntaf erioed rhwng meillion gwyn a meillionen y Cawcasws, gan gyfuno ffurf y stolon (sy’n tyfu uwchlaw’r ddaear) â system o dapwreiddiau dyfnach. Mae’r nodwedd unigryw hon yn gwella’r gallu i wrthsefyll sychder, yn gwella gwydnwch wrth bori ac yn gwella’r gallu i oroesi yn yr hirdymor. Y canlyniad yw AberLasting, sef math o feillion a gaiff ei farchnata gan Germinal dan yr enw DoubleRoot, sydd bellach yn cael ei ddefnyddio’n helaeth.

Yn y cyfamser, nid yw meillion coch wedi bod yn addas yn draddodiadol ar gyfer pori oherwydd bod da byw’n achosi niwed i’r corun, sy’n aml yn lladd y planhigyn. Aeth ymchwilwyr IBERS i’r afael â hynny trwy fridio math crwydrol o feillion coch, sy’n ymddwyn yn debycach i feillion gwyn yn y maes. Mae’r dull gweithredu newydd hwn yn golygu bod modd i feillion coch gael eu pori yn ogystal â’u torri, sy’n ei gwneud yn bosibl cael systemau da byw sy’n fwy hyblyg a chynaliadwy.

Mae meillion coch hefyd yn cynnwys yr ensym polyffenol ocsidas (PPO), sy’n helpu i warchod protein lluniaethol yn y flaenstumog, sy’n arwain at ddefnydd mwy effeithlon o nitrogen ac at lai o allyriadau.

Mae’r mathau newydd hyn o feillion a fridiwyd gan IBERS yn cynnig manteision clir:

• Llai o ddibyniaeth ar wrtaith nitrogen gwneuthuredig
• Protein a dyfwyd gartref i ddisodli soia a gaiff ei fewnforio
• Glaswellt sy’n gallu para’n hirach ac sy’n fwy gwydn wrth gael ei bori a’i dorri
• Mwy o hyblygrwydd ar gyfer systemau da byw
• Llai o allyriadau nitrogen wrth fagu cilgnowyr

Ar hyn o bryd, mae’r math newydd hwn o feillion coch—RedRunner, a fydd hefyd yn cael ei farchnata gan Germinal—yn mynd trwy brofion cenedlaethol ar gyfer mathau planhigion ac mae disgwyl iddo gael ei ryddhau yn fuan. Dyma’r unig feillionen o’i math yn y byd, ac mae’n gam mawr ymlaen ar gyfer bridio meillion a rheoli glaswelltiroedd yn gynaliadwy.

Lawrlwythwch ein Llyfryn Straeon Achos Effaith IBERS llawn yma: Arloesiadau ar gyfer Byd sy'n Newid