Ydy te gwyrdd yn gallu atal clefydau mewn pobl hŷn? Prosiect ymchwil

Prawf EEG yn Adran Seicoleg Prifysgol Aberystwyth.

Mae gwyddonwyr ym Mhrifysgol Aberystwyth yn profi sut y gall maetholion mewn te gwyrdd effeithio ar afiechydon sy’n gysylltiedig â heneiddio drwy fonitro gweithgaredd ymennydd pobl.

Bydd yr arbenigwyr bwyd ac ymddygiad yn profi a yw atchwanegiadau sy’n cynnwys blendiau naturiol o ginseng ac olewau omega yn gallu gwella iechyd pobl.

Wrth i ni heneiddio mae ein corff yn mynd yn llai abl i brosesu maetholion o’n diet ac mae hyn yn cyfrannu at rai o’r anawsterau iechyd y gallwn ni eu profi wrth i ni heneiddio.

Mae newidiadau i’n cyrff wrth i ni heneiddio yn cynnwys trafferthion treulio bwyd sydd, yn eu tro, yn gallu ein gwneud yn fwy agored i glefydau, gan gynnwys diabetes a chlefyd cardiofasgwlaidd, ond dirywiad gwybyddol yn ogystal.

Mae’r astudiaeth yn defnyddio’r cyfleuster EEG (Electroenceffalogram) yn Adran Seicoleg y Brifysgol i fesur a oes unrhyw berthynas rhwng sut mae’r perfedd yn gweithio a gweithgaredd yr ymennydd – y cof yn yr achos hwn ac agweddau amrywiol ar brosesu gwybodaeth.

Dywedodd Dr Amanda Lloyd o Brifysgol Aberystwyth:

“Mae gwella iechyd pobl hŷn yn ffocws mawr i lawer o’n gwaith dietegol, iechyd a bwyd y dyfodol yma yn Aberystwyth. Rydyn ni’n gwybod y gall diet wneud gwahaniaeth mawr o ran gwella lles pobl, lleihau salwch ac, yn ei dro, leihau'r pwysau ar ein gwasanaeth iechyd. Dyna pam mae'r math hwn o ymchwil mor bwysig.

“Mae hwn yn brosiect hynod ddiddorol a allai fod o fudd sylweddol i bobl hŷn, yn ogystal â lleihau’r baich ar y gwasanaeth iechyd. Rydyn ni'n gwybod y gall cynhyrchion penodol wella'r berthynas rhwng y perfedd a'r ymennydd. Ond bydd yr astudiaeth hon yn edrych a oes gan y cynhyrchion hyn fudd iechyd cyffredinol. Rydym yn bwriadu astudio’r newidiadau mewn gwybyddiaeth a marcwyr llid, mewn carfan o bobl hŷn sy’n cymryd yr atchwanegiadau hyn yn eu diet dros gyfnod o 30 diwrnod.”

Ychwanegodd yr Athro Nigel Holt, Pennaeth yr Adran Seicoleg ym Mhrifysgol Aberystwyth:

“Mae’r berthynas perfedd-ymennydd wedi cael cryn dipyn o sylw yn ddiweddar, ac fe welwch chi bob math o bethau mewn siopau a’r wasg am probiotegau ac atchwanegiadau bwyd. Mae gennym ni ddiddordeb mewn gwerthuso hyn, a thechnegau arloesol i’n galluogi i weithio ar draws disgyblaethau i ddod o hyd i’r atebion mwyaf cywir y gallwn ni. Rydyn ni i gyd yn gwybod bod bwyta'n iawn yn ein helpu’n gorfforol, ac rydyn ni nawr yn edrych ar sut y gallai atchwanegiadau ein helpu'n wybyddol.”

Mae’r prosiect yn bartneriaeth rhwng Prifysgol Aberystwyth, y cwmni Agroceutical Products Cyf o Gymru, Neurodyn Life Sciences Inc yng Nghanada, a PostBiotics Inc o’r Unol Daleithiau. Ariennir yr ymchwil drwy gystadleuaeth Gwell Bwyd i Bawb Innovate UK.

Y cynhyrchion a gaiff eu profi fel rhan o'r astudiaeth fydd Cerbella, fformiwleiddiad naturiol sy'n seiliedig ar gynnyrch a ddatblygwyd gan Neurodyn Life Sciences sy'n cyfuno cydrannau penodol o ginseng, te gwyrdd, ac asidau brasterog hanfodol, ac atodiad dietegol Postbiotics Inc POZIBIO sy'n gwella gweithrediad y llwybr gastroberfeddol.

Rhannu