2. Diffiniad o Ymddygiad Academaidd Annerbyniol

2.1 Ymddygiad Academaidd Annerbyniol yw cyflawni unrhyw weithred lle gall unigolyn sicrhau mantais na chaniateir iddo ef/iddi hi ei hun neu i rywun arall. Bydd y Rheoliad hwn yn berthnasol, a gellir canfod bod myfyriwr wedi cyflawni Ymddygiad Academaidd Annerbyniol, beth bynnag fo bwriad y myfyriwr a chanlyniad y weithred, a boed y myfyriwr yn gweithredu ar ei ben/phen ei hun neu ar y cyd ag unigolyn arall/unigolion eraill. Gellir cynnwys unrhyw weithredoedd yn y diffiniad hwn, boed hwy’n digwydd yn ystod neu mewn perthynas ag arholiad ffurfiol, darn o waith cwrs, cyflwyno tystiolaeth feddygol neu dystiolaeth arall i Fyrddau Arholi, neu unrhyw fath ar asesiad a wneir wrth ymgeisio am gymhwyster neu ddyfarniad gan y Brifysgol.

At ddibenion ymchwiliadau YAA, mae elfen asesu yn dasg neu elfen benodol sy'n cyfrannu at farc cyffredinol y modiwl. Mae elfennau asesu yn cynnwys, ond heb fod yn gyfyngedig i: arholiadau ysgrifenedig a llafar, traethodau, gwaith ymarferol yn y labordy, adroddiadau, cyflwyniadau ysgrifenedig a llafar, posteri, portffolios, arddangosfeydd, perfformiadau, traethodau hir, adroddiadau, Cwestiynau Amlddewis, arholiadau ar-lein. Diben gwahanol elfennau yw asesu'r sgiliau a'r dysgu (?) sydd eu hangen i fodloni canlyniadau dysgu'r modiwl. Bydd gwerth yr holl elfennau asesu yn adio i 100% o'r asesiad cyffredinol y modiwl. Gall rhai elfennau fod â gwerth uwch nag eraill. Weithiau, gall elfen asesu gynnwys sawl is-elfen, er enghraifft nifer o brofion yn y dosbarth. Pan fo is-elfen o elfen asesu o dan ymchwiliad ar gyfer YAA ac mae'r honiad wedi'i gadarnhau, bydd y gosb YAA yn cael ei chymhwyso i'r is-elfen dan ymchwiliad, nid i'r elfen asesu gyfan.

2.2 Mae'r Brifysgol yn cydnabod y categorïau canlynol o Ymddygiad Academaidd Annerbyniol. Nid yw hon yn rhestr gyflawn, a gall achosion eraill ddod o fewn i ddiffiniad cyffredinol Ymddygiad Academaidd Annerbyniol.

(i) Llên-ladrad

Y diffiniad o lên-ladrad yw defnyddio gwaith rhywun arall a'i gyflwyno gan honni mai eich gwaith eich hun ydyw. Mae enghreifftiau o lên-ladrad yn cynnwys

dyfynnu heb ddefnyddio dyfynodau
copïo gwaith rhywun arall
cyfieithu gwaith rhywun arall heb gydnabod hynny
aralleirio neu addasu gwaith rhywun arall heb gydnabod hynny'n gywir
defnyddio deunydd wedi'i lawrlwytho o'r rhyngrwyd heb gydnabod hynny
defnyddio deunydd a gafwyd gan fanc traethodau neu asiantaethau tebyg
cyflwyno gwaith a gynhyrchwyd gan Ddeallusrwydd Artiffisial fel eich gwaith eich hun

(ii) Cydgynllwynio

Mae cydgynllwynio'n digwydd pan fydd gwaith a gyflawnir gan eraill neu gydag eraill yn cael ei gyflwyno gan honni mai gwaith un unigolyn ydyw. Os yw gwaith un neu fwy o unigolion yn cael ei gyflwyno yn enw rhywun arall a bod yr awdur/awduron gwreiddiol yn ymwybodol o hynny, mae'n bosibl yr ystyrir bod pawb fu ynghlwm â hyn yn euog o Ymddygiad Academaidd Annerbyniol.

Mae’n bosibl yr ystyrir bod myfyrwyr sy'n llwytho copïau o'u haseiniadau eu hunain (neu aseiniadau pobl eraill) i safleoedd rhannu ffeiliau academaidd wedi cyflawni ymddygiad academaidd annerbyniol ar y sail bod gweithgaredd o'r fath yn hwyluso llên-ladrad ac yn gyfystyr â chydgynllwynio, ac eithrio lle caniateir hyn yn benodol gan yr adran.

Mae enghreifftiau o gydgynllwynio yn cynnwys (ond nid yn gyfyngedig i):

Dau neu fwy o fyfyrwyr yn gweithio gyda’i gilydd ac yn cyflwyno'r gwaith fel eu gwaith eu hunain
Rhannu data neu wybodaeth arall sy'n cael ei chyflwyno heb yn wybod i’r awduron gwreiddiol neu heb eu cydnabod
Rhannu atebion yn ystod arholiad neu asesiad wedi'i amseru ar-lein
Cyflwyno enghreifftiau o waith i wefannau rhannu ffeiliau academaidd

(iii) Ffugio tystiolaeth neu ddata

Mae ffugio tystiolaeth neu ddata a/neu ddefnyddio tystiolaeth neu ddata o'r fath mewn gwaith i'w asesu yn cynnwys gwneud honiadau ffug mai chi gyflawnodd arbrofion, arsylwadau, cyfweliadau neu ddulliau eraill o grynhoi a dadansoddi data. Mae ffugio tystiolaeth neu ddata a/neu ddefnyddio tystiolaeth neu ddata o'r fath hefyd yn cynnwys cyflwyno tystiolaeth ffug neu dystiolaeth a ffugiwyd ynglŷn ag amgylchiadau arbennig i Banel Apêl neu Fwrdd Arholi.

(iv) Ymddygiad Academaidd Annerbyniol mewn arholiadau ffurfiol

Mae enghreifftiau o Ymddygiad Academaidd Annerbyniol mewn arholiadau ffurfiol yn cynnwys y canlynol:

mynd ag unrhyw ffurf anawdurdodedig ar ddeunydd i mewn i ystafell arholi a/neu gyfleuster cysylltiedig, megis llyfr, llawysgrif, data neu bapurau rhydd, dyfais electronig, gwybodaeth a geir trwy unrhyw ddyfais electronig, neu unrhyw ffynhonnell o wybodaeth anawdurdodedig, ni waeth a yw'r deunyddiau hyn yn berthnasol i'r pwnc dan sylw ai peidio
copïo gwaith gan, neu gyfathrebu ag, unrhyw berson arall yn yr ystafell arholi a/neu gyfleuster cysylltiedig, ar wahân i'r hyn a awdurdodir gan oruchwyliwr
cyfathrebu'n electronig ag unrhyw un arall, ar wahân i'r hyn a awdurdodir gan oruchwyliwr
esgus bod yn ymgeisydd penodol mewn arholiad neu ganiatáu i rywun arall gymryd eich lle gan esgus mai chi ydyw
cyflwyno sgript arholiad gan honni mai eich gwaith chi ydyw, er bod y sgript yn cynnwys deunydd a gynhyrchwyd trwy ddulliau anawdurdodedig
peidio â chydymffurfio â chyfarwyddiadau ysgrifenedig i ymgeiswyr mewn arholiadau ffurfiol, nac â chyfarwyddiadau llafar gan oruchwylwyr yr arholiadau

Ystyrir bod dyfais electronig o fewn y Rheoliad os yw’n gallu gwneud unrhyw un o'r pethau canlynol: cyfathrebu’n electronig o fewn neu oddi allan i ystafell arholi, cysylltu â’r rhyngrwyd, dal data neu wybodaeth ddigidol, gwneud recordiadau sain, cadw cof digidol neu recordiadau sain, llwytho data neu wybodaeth ddigidol i ddyfais arall, arddangos data neu wybodaeth ddigidol neu chwarae recordiadau sain.

Bydd pob un o’r canlynol yn cael eu hystyried yn y categori hwn, ond nid yw’r rhestr yn gyflawn a bydd dyfeisiau eraill nas manylir yn eu cylch yn dod o fewn y Rheoliad: ffôn symudol, oriawr glyfar, gliniadur, cyfrifiadur llechen, dyfais storio data, derbynnydd Bluetooth, clustffonau, i-pod, cyfrifiannell electronig ac eithrio’r rhai a ganiateir yn benodol ar gyfer arholiadau prifysgol.

(v) Ailgylchu data neu destun

Ailgylchu data neu destun mewn mwy nag un asesiad, pan fo'r Adran yn benodol yn peidio â chaniatáu hyn.

(vi) Cyflwyno gwaith a gynhyrchir gan Ddeallusrwydd Artiffisial (DA) fel eich gwaith eich hun

Dylid cydnabod unrhyw ddefnydd o DA cynhyrchiol mewn asesiad yn eglur yn y gwaith a dylai gydymffurfio â chanllawiau'r Brifysgol a'r adrannau ar y defnydd o DA. Bydd unrhyw asesiadau sy'n cael eu cynhyrchu'n gyfan gwbl neu'n rhannol gan DA heb gydnabyddiaeth a/neu gyfeirio priodol yn cael eu hystyried yn Ymddygiad Academaidd Annerbyniol. Dylai myfyrwyr gyfeirio at y Canllawiau cyffredinol ar ddefnyddio DA yn ddiogel: https://www.aber.ac.uk/cy/is/regulations/canllawiau-ar-da/. Mae rhagor o wybodaeth am DA a sut i’w ddefnyddio’n diogel a moesegol ar gael yn https://www.aber.ac.uk/cy/is/help/ai/#defnyddio-da-ar-gyfer-eich-astudiaethau.