BEACON yn sicrhau buddsoddiad £12 miliwn

Prosesu glaswellt ar gyfer cynhyrchion yn BEACON, Prifysgol Aberystwyth

Mae cynllun technoleg werdd arobryn BEACON wedi sicrhau cyllid ychwanegol o £12 miliwn drwy Lywodraeth Cymru i barhau i ddatblygu’r economi werdd yng Nghymru dros y pedair blynedd nesaf.

Cyhoeddwyd y buddsoddiad newydd o £12miliwn heddiw (Dydd Iau 3 Rhagfyr) gan y Gweinidog Cyllid a Busnes y Llywodraeth, Llywodraeth Cymru, Jane Hutt yn ystod digwyddiad yn Stadiwm Liberty, Abertawe i ddathlu cyflawniadau rhaglenni Ewropeaidd yng Nghymru 2014-2020, a lansiwyd flwyddyn yn ôl.

Gyda chefnogaeth £8 miliwn o gronfeydd yr Undeb Ewropeaidd, bydd y prosiect BEACON yn gweld gwyddonwyr o Brifysgolion Aberystwyth, Bangor ac Abertawe yn gweithio gyda diwydiant i ddatblygu deunyddiau adnewyddadwy, tanwydd a chemegau.

Dywedodd y Gweinidog Cyllid: “Mae buddsoddiad yr UE heddiw o £8 miliwn ym mhrosiect BEACON yn newyddion ardderchog a fydd yn caniatáu i fusnesau yng Nghymru i elwa ar ymchwil gwyddonol uwch i ddatblygu cynnyrch newydd, creu swyddi ac i dyfu economi carbon isel Cymru.”

Mae BEACON yn gydweithrediad a ariennir gan yr Undeb Ewropeaidd trwy Lywodraeth Cymru o dan arweiniad Prifysgol Aberystwyth â Phrifysgolion Bangor ac Abertawe ble mae gwyddonwyr yn arbenigo mewn bio-buro.

Maent yn gweithio gyda mentrau bach a chanolig eu maint, i ddatblygu deunyddiau adnewyddadwy, tanwydd a chemegolion yn ogystal â phrosesau amgylcheddol newydd a rhai wedi eu haddsu, sydd yn economaidd gynaliadwy.

Bio-buro yw prosesu cynaliadwy o fiomas i greu ystod eang o gynhyrchion megis, cemegau a deunyddiau, a bio-ynni - biodanwyddau, pŵer ac / neu wres.
Sefydlwyd BEACON yn 2011 ac mae wedi cyflawni neu ragori ar ei holl dargedau mewn cynorthwyo cwmnïau a chreu swyddi yn yr economi werdd yng Nghymru ac yn gwneud cyfraniad sylweddol at fynd i'r afael â newid yn yr hinsawdd.

Dywedodd yr Athro Mike Gooding, Cyfarwyddwr Athrofa’r Gwyddorau Biolegol, Amgylcheddol a Gwledig (IBERS) ym Mhrifysgol Aberystwyth: "Trwy gronni gwybodaeth a defnyddio arbenigedd ein tair prifysgol ar y cyd, yr ydym yn rhoi Cymru ar y map yn y sector hwn sy'n tyfu ac yn chwarae rhan wrth ymateb i her fawr byd-eang.

“Mae BEACON yn defnyddio'r ymchwil academaidd mwyaf datblygedig i ddarparu atebion ymarferol i broblemau byd-eang.

“Mae'r ymchwil yr ydym yn ei wneud yma mewn bio-buro yn datblygu prosesau soffistigedig i droi cnydau a dyfir yn lleol i mewn i gemegau gwerthfawr a chynnyrch masnachol, sydd yn amrywio o danwydd i golur, deunyddiau fferyllol, tecstilau, cynhyrchion bwyd ac iechyd.

“Mae bio-buro yn golygu bod defnydd llawn yn cael ei wneud o gnydau, tra'n torri'n ôl ar allyriadau nwyon tŷ gwydr. Mae IBERS eisoes yn gwneud gwaith arloesol wrth gynhyrchu tanwydd o gnydau ynni fel miscanthus (glaswellt eliffant Asiaidd) a glaswelltydd siwgr uchel.”

Dywedodd yr Athro Iain Donnison o IBERS Prifysgol Aberystwyth a Chyfarwyddwr BEACON: “Mae BEACON yn cael ei yrru gan dargedau heriol ar gyfer mabwysiadu technolegau a gostyngiadau gwyrdd mewn allyriadau nwyon tŷ gwydr a osodwyd gan lywodraethau cenedlaethol a'r Undeb Ewropeaidd.”

“Mae technolegau carbon isel gan gynnwys bio-buro a biotechnoleg ddiwydiannol yn cael eu gweld fel sectorau twf pwysig a bydd angen cadwyni cyflenwi cynaliadwy a fydd yn creu gweithgaredd economaidd a swyddi, a'r rhain sy'n darparu'r ffocws ar gyfer y gwaith sy'n cael ei wneud yn ac ar gyfer Cymru yn BEACON.”

Rhannu