Academydd o Aberystwyth wedi'i phenodi'n Llywydd cymdeithas algâu

Mae Dr Jessica Adams, academydd ym Mhrifysgol Aberystwyth, wedi'i phenodi'n Llywydd Cymdeithas Algâu Prydain, prif gymdeithas y Deyrnas Gyfunol sy'n ymroddedig i astudio algâu.

Wedi'i sefydlu ym 1952, mae'r Gymdeithas yn sefydliad aelodaeth ac elusen gofrestredig sy’n ceisio hyrwyddo addysg ac ymchwil ym mhob agwedd ar astudiaeth algâu. Mae'n cyhoeddi ymchwil yn y ‘European Journal of Applied Phycology’ ac mewn cyhoeddiadau eraill, gan wneud yr ymchwil ar gael yn eang.

Un o'r cymdeithasau cyntaf yn y byd sy'n ymroddedig i ymchwil i algâu a'r mwyaf yn Ewrop, mae hefyd yn darparu cyllid i gefnogi myfyrwyr ac ymchwilwyr i gynnal prosiectau a mynychu cynadleddau a chyrsiau maes ledled y Deyrnas Gyfunol.

Mae Dr Adams yn Uwch Wyddonydd Ymchwil mewn Biodrosi a Bioburo yn Athrofa’r Gwyddorau Biolegol, Amgylcheddol a Gwledig (IBERS) ym Mhrifysgol Aberystwyth, gyda diddordeb arbenigol mewn gwymon, ceirch a phlanhigion dyfrol.

Mae ei hymchwil yn defnyddio algâu ar gyfer bwyd cynaliadwy, cynhyrchion ecogyfeillgar ac mewn sefyllfaoedd ymarferol eraill. Mae hi wedi arwain nifer o brosiectau ymchwil nodedig, wedi cyhoeddi'n helaeth ac wedi cyfrannu at fentrau cenedlaethol a diwydiannol mewn ymchwil algâu a bio-drosi.

Wrth sôn am ei phenodiad, dywedodd Dr Adams:

“Mae’n anrhydedd cael fy mhenodi. Rwy’n edrych ymlaen yn fawr at gefnogi aelodau’r Gymdeithas, hyrwyddo astudiaeth algâu a helpu i feithrin y genhedlaeth nesaf o wyddonwyr sy’n astudio algâu. Mae ymchwil yn y maes hwn yn bwysig yn y byd go iawn, o fwyd cynaliadwy i gynhyrchion ecogyfeillgar, ac rwy’n falch o allu helpu’r Gymdeithas i barhau i wella ein dealltwriaeth a throsi hynny’n fesurau ymarferol i newid bywydau er gwell.”

“Wrth i bwysau amgylcheddol byd-eang gynyddu, mae ymchwil i algâu yn cael ei chydnabod yn gynyddol am ei photensial i fynd i’r afael â newid hinsawdd a defnyddio adnoddau naturiol yn fwy cynaliadwy. Ym Mhrifysgol Aberystwyth, rydym wedi ymrwymo i ymchwil sy’n mynd i’r afael â heriau amgylcheddol byd-eang ac yn cynnig atebion ymarferol, sy’n seiliedig ar dystiolaeth.”

Cymerodd Dr Adams yr awenau gan yr Athro Saul Purton, Coleg Prifysgol Llundain, yng Nghyfarfod Blynyddol Cymdeithas Algâu Prydain, a gynhaliwyd gan IBERS, Prifysgol Aberystwyth yr wythnos hon.