Adnodd Darganfod Digidol

Gall myfyrwyr presennol gael mynediad at yr adnodd gan ddefnyddio manylion mewngofnodi eu cyfrif prifysgol. I gael canllawiau ynglŷn â defnyddio'r adnodd, gallwch ddod o hyd i wybodaeth ar y dudalen canllawiau i fyfyrwyr ar wefan Jisc.  

Mae'r canllaw yn esbonio sut i ddechrau arni a sut i gwblhau’r setiau o gwestiynau i asesu eich sgiliau digidol. Mae hefyd yn dangos sut i gael mynediad at eich adroddiad adborth personol a'i ddehongli, yn ogystal â sut i ddefnyddio banciau o adnoddau wedi'u teilwra i gefnogi datblygiad sgiliau.  

Gallwch gael mynediad at yr Adnodd Darganfod Digidol gan ddefnyddio manylion mewngofnodi eich cyfrif Prifysgol Aberystwyth. I gael arweiniad ynglŷn â defnyddio'r adnodd, gallwch ddod o hyd i wybodaeth ar y dudalen gymorth i staff ar wefan Jisc. 

Mae'r canllaw hwn yn egluro sut i ddechrau arni, yn rhoi trosolwg o'r setiau o gwestiynau a ddefnyddir ar gyfer hunanasesu, ac yn cynnwys canllawiau ar ddeall eich adroddiad adborth personol. Mae'n cynnwys banciau o adnoddau a deunyddiau dysgu wedi'u curadu i'ch helpu i gael y gorau o'r adnodd. 

Sut fydd Jisc yn defnyddio fy nata? 

Mae Jisc yn defnyddio data o'r adnodd darganfod digidol i ddarparu eu gwasanaeth, cefnogi defnyddwyr, a darparu mewnwelediadau ystyrlon wrth ddiogelu preifatrwydd. Mae manylion personol (megis enw, e-bost a rôl) yn cael eu casglu yn bennaf i greu cyfrifon, teilwra'r profiad asesu, a rheoli mynediad at y platfform.  

Defnyddir ymatebion y defnyddwyr i’r cwestiynau asesu er mwyn creu eu hadroddiadau adborth unigol, ond maent hefyd yn cael eu grwpio’n ddienw i gynhyrchu mewnwelediadau ar lefel sefydliad a sector, gan alluogi sefydliadau i ddeall tueddiadau o ran gallu digidol a thargedu cymorth yn effeithiol. Mae Jisc yn casglu ychydig iawn o ddata, yn ei gadw am gyfnod cyfyngedig, ac yn ei ddefnyddio'n ddiogel ar ran eich prifysgol i wella eu gwasanaeth. Gellir dod o hyd i fanylion llawn eu polisi preifatrwydd a chasglu data yma. 

Sut fydd Jisc yn diogelu fy nata? 

Mae'r Adnodd Darganfod Digidol yn defnyddio seilwaith cwmwl o safon y diwydiant, llywodraethu cadarn, a phrofion rheolaidd i ddiogelu data. Caiff mynediad ei reoli’n ofalus, ac mae prosesau clir ar waith ar gyfer diogelwch, copïau wrth gefn a rheoli digwyddiadau. I gael rhagor o wybodaeth am sut y bydd Jisc yn diogelu ac yn storio eich data, gweler eu canllaw diogelwch. 

Sut fydd Prifysgol Aberystwyth yn defnyddio fy nata? 

Bydd y brifysgol yn defnyddio data dienw a gesglir drwy’r adnodd at ddibenion adrodd ar raddfa fawr. Er enghraifft, gall hyn gynnwys data ynghylch sut mae staff mewn adran benodol neu garfan benodol o fyfyrwyr (grŵp blwyddyn) wedi ymateb.  

Diben yr adroddiadau hyn fydd penderfynu ar y ffordd orau y gallwn ni fel prifysgol gefnogi datblygiad ein staff a'n myfyrwyr. Trwy ddeall pa mor hyderus y maen nhw'n teimlo ynglŷn â defnyddio technolegau digidol, gallwn sicrhau y gellir targedu darpariaeth i feysydd lle mae defnyddwyr yn teimlo bod angen mwy o gefnogaeth ac arweiniad arnynt.