Ymchwil folcano ar restr fer Lloyd’s

Dr Carina Fearnley yn seremoni Gwobr Gwyddoniaeth Ymchwil Risg Lloyd’s 2013

Roedd Dr Carina Fearnley o'r Adran Daearyddiaeth a Gwyddorau Daear yn un o bum ymgeisydd i gyrraedd rhestr fer gwobr flynyddol Gwyddoniaeth Ymchwil Risg Lloyd’s eleni, a oedd yn canolbwyntio ar elfennau dynol o risg.

Cafodd Dr Fearnley, darlithydd mewn Peryglon Amgylcheddol yn Aberystwyth, ei chynnwys ar restr fer categori 'Risg Ymddygiadol' ac mae’n edrych ar y prosesau penderfyniadau sy'n gysylltiedig wrth neilltuo lefel rhybudd llosgfynydd a'r cymhlethdod risg sy'n gysylltiedig â’r broses.

Mae ei hymchwil yn edrych ar Leihau Risg Trychineb, ac yn canolbwyntio ar y rôl o ddeall a chyfathrebu ansicrwydd, risg a chymhlethdod i ddatblygu gallu i wrthsefyll peryglon naturiol ac amgylcheddol.

Gan ddefnyddio cyfweliadau a gynhaliwyd rhwng 2007 a 2009 mewn pum arsyllfa llosgfynydd Arolwg Daearegol UDA yn Alaska, Cascades, Hawaii, Long Valley, a Yellowstone, dangosodd Dr Fearnley nad yw penderfyniadau rhybuddio yn seiliedig ar wyddoniaeth yn unig ond hefyd ar gyd-destun cymdeithasol lle mae'r argyfyngau yn digwydd.

Eglurodd Dr Fearnley, "Mae'r ymchwil hwn yn cyflwyno’r dadansoddiad cyntaf o'r prosesau gwneud penderfyniadau sy'n ymwneud â neilltuo rhybudd mewn system lefel rhybudd llosgfynydd mewn gwahanol grwpiau sy'n ymwneud â’r argyfwng, fel y gwyddonwyr, ymatebwyr brys a llunwyr polisi.

"Y gobaith o'r ymchwil yma yw cael gwell dealltwriaeth o sut mae asesu a chyfathrebu peryglon a risg ar gyfer peryglon naturiol yn digwydd yn ymarferol, er mwyn lleihau colli bywyd ac effeithia economaidd a chymdeithasol ar gymunedau sy'n agored i niwed yn y dyfodol.

"Roeddwn wrth fy modd o gael fy nghynnwys ar y rhestr fer gan fod hyn yn gydnabyddiaeth o werth gwaith rhyngddisgyblaethol, a'r budd y gall hyn ei gynnig i'r sector yswiriant ac i lawer o unigolion a sefydliadau sy'n ymwneud â pheryglon naturiol.

"Fy nghred i yw y gall gwaith rhyngddisgyblaethol ddarparu budd enfawr mewn ymateb i broblemau sy'n wynebu cymdeithas heddiw na all disgyblaethau traddodiadol fynd i'r afael â nhw ar ben eu hunain drwy ddwyn ynghyd y cyfoeth o wybodaeth a thechnegau gwahanol ddisgyblaethau fel y gellir datblygu gwell dealltwriaeth o'r problemau ac yn sgil hynny, ddod o hyd i atebion effeithiol."

AU44413

Rhannu