Rali GB Cymru yn dod i Brifysgol Aberystwyth

Myfyrwyr Prifysgol Aberystwyth yn mynychu digwyddiad Rali GB Cymru

Mae myfyrwyr ym Mhrifysgol Aberystwyth yn cael cyfle unwaith yn rhagor eleni i gynorthwyo gyda digwyddiad chwaraeon rhyngwladol.

Mae’r Brifysgol wedi trefnu partneriaeth gyda Dayinsure Rali GB Cymru sy’n golygu bod profiad gwaith yn cael ei gynnig i fyfyrwyr a bod y campws yn croesawu un o sioeau teithiol y rali cyn y digwyddiad mawr yn Hydref 2016.

Mae Rali GB Cymru yn cael ei chynnal yn y Canolbarth a’r Gogledd a dyma rownd cyn-derfynol Pencampwriaeth Rali'r Byd (WRC). Mae’n denu tua 80,000 o wylwyr o bob cwr, mae'n cael ei ddarlledu i dros 60 miliwn o wylwyr ledled y byd ac mae’n cyfrannu dros £10m at economi Cymru bob blwyddyn.

Dechreuodd y berthynas rhwng y brifysgol a Rali GB Cymru rai blynyddoedd yn ôl wrth i fyfyrwyr sy’n astudio twristiaeth ym Mhrifysgol Aberystwyth gynorthwyo yn y gwaith o gynnal arolygon yn ystod cam 'Sweet Lamb' y rali. Ers hynny mae wedi datblygu yn bartneriaeth mwy arwyddocaol ac ymarferol.

I’r myfyrwyr, mae gweithio gyda’r rali yn gyfle i wella’u sgiliau ymchwil ac i gael profiad o reoli digwyddiad mewn amgylchedd gyffrous, go iawn.

Mae’r Dr Carl Cater yn uwch ddarlithydd twristiaeth ym Mhrifysgol Aberystwyth: "Nid pob dydd mae cyfle diddorol fel hyn yn codi ond mewn gwirionedd I’r myfyrwyr y mae’r diolch penna. Wnaethon ni drefnu cyfle iddyn nhw i weithio gyda’r rali ond eu gwaith caled a'u brwdfrydedd nhw wnaeth greu argraff mor dda ar y staff gan agor cyfleoedd pellach i weithio gyda’r tim. Mae profiadau fel hyn yn cynorthwyo’n addysgu ni am fod y myfyrwyr yn dysgu mewn ffordd hynod ymarferol iawn, allan yn y maes, ac maen nhw hefyd yn gallu nodi’r cysylltiad â’r WRC ar eu CV."

Mae Ben Taylor, Rheolwr Gyfarwyddwr International Motor Sports sy’n trefnu’r rali (yn ogystal â ras Fformiwla 1 Grand Prix Prydain), yn nodi’r gwaith "diwyd a phroffesiynol" sydd wedi’i gyflanwi gan fyfyrwyr twristiaeth Aberystwyth wrth gynnal y gwaith ymchwil.

Dyma’r ail flwyddyn yn olynol i drefnwyr y rali drefnu sioe deithiol ym mis Hydref i adeiladu momentwm ar gyfer y prif ddigwyddiad. Eleni, mae Aberystwyth yn un o’r prif ganolfannau wrth I’r daith ddodd I gampws y Brifysgol ddydd Mawrth 11 Hydref. Fel rhan o’r digwyddiad, bydd un o geir y rali yn parcio y tu allan I adeilad IBERS ar gampws Penglais.

Bydd un o brif yrrwyr y rali ar gael i ateb cwestiynau ac fe fydd cyfres o sesiynau arbennig yn cael eu cynnal gyda grwpiau o fyfyrwyr.

Rhannu