Offer, Arbenigedd a Chyfleusterau Labordy Lefelau Cyfyngu 2 a 3

Labordai lefelau cyfyngu uchel diogel ar gyfer ymchwil, dilysu ac arloesi

Rydym yn rhoi mynediad i sefydliadau at labordai Lefel Gyfyngu 2 (CL2) a Lefel Gyfyngu 3 (CL3) diogel, sy'n cydymffurfio'n llawn, gan eu galluogi i gynnal ymchwil sy'n ymwneud â phathogenau, samplau biolegol a deunyddiau sensitif yn ddiogel.

Mae ein cyfleusterau yn cefnogi’r gwaith o ddatblygu a dilysu diagnosteg, therapiwteg, brechlynnau, dulliau dadansoddol a phrosesau biolegol mewn amgylchedd lefel gyfyngu uchel a reolir yn broffesiynol. Ochr yn ochr â labordai arbenigol ac offer gwyddonol, rydym hefyd yn darparu gofod swyddfa, ystafelloedd cyfarfod a chyfleusterau cydweithredu i gefnogi’r gwaith o gyflawni prosiectau.

Y tu hwnt i fynediad i’r labordai, gall cleientiaid dynnu ar arbenigedd technegol ac academaidd i gefnogi dylunio arbrofion, casglu data, dadansoddi a dehongli. P'un a oes arnoch angen mynediad annibynnol i’r labordai neu brosiect â chefnogaeth lawn, gallwn eich helpu i gynhyrchu data gwyddonol cadarn, bodloni gofynion rheoleiddiol a symud ymlaen yn hyderus tuag at ddilysu a masnacheiddio.

Ar gyfer prosiectau sy'n gofyn am fewnbwn arbenigol ychwanegol, gallwn hefyd gynnig ein harbenigedd mewn meysydd gan gynnwys clefydau heintus, parasitoleg, epidemioleg, gofal iechyd a diagnosteg, iechyd anifeiliaid, biotechnoleg, genomeg a DA a dadansoddi data.

Ar gyfer pwy mae’r gwasanaeth?

Mae'r gwasanaeth hwn wedi'i gynllunio ar gyfer sefydliadau sydd angen amgylcheddau labordy lefel gyfyngu uchel i gynnal gweithgareddau ymchwil, profi a datblygu biolegol.

Mae ein cleientiaid nodweddiadol yn cynnwys:

Cwmnïau biotechnoleg a diagnosteg sy'n datblygu profion a dulliau dadansoddol
Datblygwyr fferyllol a therapiwteg sy'n gweithio ar frechlynnau, triniaethau a darganfod cyffuriau
Sefydliadau iechyd anifeiliaid a milfeddygaeth
Sefydliadau Ymchwil Gontractiol
Cwmnïau ar dwf a BBaCh gweithgar mewn ymchwil sy'n symud cynhyrchion ymlaen tuag at ddilysu neu gymeradwyaeth reoleiddiol

Mae'r gwasanaeth yn arbennig o werthfawr i sefydliadau sy'n gweithio ar gam canol y broses ddatblygu (TRL 3-7) sydd angen mynediad at gyfleusterau CL2 neu CL3 i drin deunyddiau biolegol yn ddiogel, cynhyrchu data credadwy a bodloni gofynion rheoleiddio, cyllido neu fasnachol.

Gall cleientiaid fanteisio ar:

Labordai CL2 a CL3 sy'n cydymffurfio'n llawn
Offer gwyddonol arbenigol a seilwaith labordy
Gofod mainc labordy pwrpasol
Cyfleusterau swyddfa, cyfarfod a chydweithredu
Cymorth technegol a gweithredol
Canllawiau iechyd, diogelwch a chydymffurfio
Cyfleusterau diogel, a reolir yn broffesiynol
Arbenigedd academaidd mewn ymchwil fiolegol a biofeddygol

O logi labordai i brosiectau ymchwil a gefnogir yn llawn, gellir teilwra ein gwasanaeth i ddiwallu anghenion eich prosiect.

Manteision a gwerth

Mynediad at gyfleusterau, arbenigedd a chymorth arbenigol mewn un lle

Cyfuno mynediad i labordai lefel gyfyngu uchel gydag offer arbenigol, cymorth technegol ac arbenigedd academaidd sy'n arwain y byd. Trwy ddod â chyfleusterau, cymorth cydymffurfio ac arbenigedd gwyddonol at ei gilydd mewn un lleoliad, rydym yn helpu sefydliadau i gynnal ymchwil yn fwy effeithlon wrth leihau'r cymhlethdod, y gost a'r risg o reoli darparwyr lluosog.

Datblygu Ymchwil â Hyder

Mae datblygu ymchwil fiolegol yn aml yn gofyn am gyfleusterau arbenigol, prosesau llywodraethu cadarn ac arbenigedd gwyddonol a all fod yn anodd ac yn ddrud i'w ddatblygu’n fewnol.

Mae ein Cyfleusterau CL2 a CL3 yn helpu sefydliadau i:

Cael mynediad at labordai lefel gyfyngu uchel heb fuddsoddiad cyfalaf sylweddol

Osgoi cost a baich gweithredol adeiladu, cynnal a rheoli cyfleusterau cyfyngu sy’n cydymffurfio.

Cynhyrchu tystiolaeth wyddonol o ansawdd uchel

Cynhyrchu data cadarn, amddiffynadwy i gefnogi ceisiadau cyllid, gofynion rheoleiddio, dilysu cynnyrch a gwneud penderfyniadau masnachol.

Cyflymu Ymchwil a Datblygu

Dileu rhwystrau seilwaith a chael mynediad cyflym at y cyfleusterau sydd eu hangen i ddatblygu rhaglenni ymchwil critigol.

Manteisio ar Arbenigedd Gwyddonol a Thechnegol

Cryfhau ansawdd a thrylwyredd ymchwil trwy fynediad at staff technegol profiadol a chymorth academaidd dewisol wrth ddylunio, dadansoddi a dehongli arbrofion.

Llywio Cydymffurfiaeth gyda Hyder

Cynnal ymchwil mewn amgylchedd diogel, a reolir yn broffesiynol wedi'i gynllunio i gefnogi dulliau diogel o weithio, cydymffurfiaeth reoleiddiol a llywodraethu labordy da.

Cynnydd tuag at ddilysu a masnacheiddio

Cynhyrchu'r dystiolaeth sydd ei hangen i ddenu buddsoddiad, cefnogi dilyniant rheoleiddiol a dod â datblygiadau newydd yn nes at y farchnad.

Y canlyniad yw cynnydd ymchwil cyflymach, llai o risg gweithredol a mwy o hyder wrth symud o ddarganfod a datblygu tuag at gymhwyso yn y byd go iawn.

Dewiswch eich lefel o gymorth

O fynediad i’r labordai i brosiectau ymchwil a gefnogir yn llawn, gellir teilwra ein gwasanaeth i’ch gofynion.

Efydd
Mynediad at gyfleusterau labordy CL2 a CL3 a seilwaith cysylltiedig ar gyfer gweithgareddau ymchwil annibynnol.

Arian
Mynediad at labordy ynghyd â chymorth technegol i'ch helpu i weithio'n ddiogel, yn effeithiol ac yn gydsyniol yn y cyfleuster.

Aur
Mynediad at labordy yn ogystal ag arbenigedd academaidd, dylunio arbrofion, casglu data, dadansoddi, gwerthuso a chofnodi i'ch helpu i gynhyrchu tystiolaeth wyddonol gadarn a chyflymu canlyniadau’r ymchwil.

Yr arbenigedd cysylltiedig sydd ar gael

Ochr yn ochr â mynediad at gyfleusterau CL2 a CL3, mae’n bosib y bydd cleientiaid hefyd yn gallu manteisio ar arbenigedd mewn:

Clefydau Heintus
Parasitoleg
Epidemioleg
Gofal Iechyd a Diagnosteg
Iechyd Anifeiliaid a Milfeddygaeth
Biotechnoleg, bioburo, bioynni
Genomeg a Geneteg
Dadansoddi Data a Biowybodeg

Gellir ymgorffori'r arbenigedd hwn mewn ymchwil, datblygu a phrosiectau arloesi pwrpasol lle bo'n briodol.

Sut i gysylltu â ni

P'un a ydych chi angen mynediad at labordy lefel gyfyngu uchel, cymorth i ddylunio rhaglen ymchwil, neu arbenigedd mewn dadansoddi a dehongli canlyniadau, gall ein tîm helpu. Cysylltwch â ni i drafod eich gofynion ac i weld pa un yw’r pecyn cywir ar gyfer eich prosiect.

Cysylltwch â ni i drefnu trafodaeth gychwynnol.

E-bost: vethub-1@aber.ac.uk

Ein Harbenigwyr:

	Dr Amanda Gibson Gymrawd Arweinwyr y Dyfodol UKRI yng Nghanolfan Sêr Cymru ar gyfer Twbercwlosis Buchol a Chanolfan a Labordai Milfeddygol¹. Dr Gibson hefyd yw Arweinydd Canolfan a Labordai Milfeddygol¹ ym Mhrifysgol Aberystwyth, gan arbenigo mewn clefydau heintus, imiwnoleg a rhyngweithiadau rhwng organebau lletyol a phathogenau. Arbenigwr mewn ymchwil twbercwlosis buchol (bTB) a chlefydau heintus Ymchwilio i sut mae Mycobacterium bovis yn rhyngweithio â'r system imiwnedd buchol yn ystod y camau cynharaf o'r haint Cefndir cryf mewn imiwnoleg, gydag arbenigedd arbenigol mewn mycobacterioleg Cefnogi ymchwil sy'n canolbwyntio ar ddeall sut mae afiechydon yn datblygu ac ymatebion imiwn lletyol Cyfrannu at ddatblygu technolegau diagnostig a brechlyn newydd Yn gweithio ar draws prosiectau amlddisgyblaethol sy'n cwmpasu iechyd anifeiliaid, clefydau heintus ac ymchwil drosiadol
	Yr Athro Glyn Hewinson CBE, FLSW Yn dal Cadair Ymchwil Sêr Cymru II ac mae'n Gyfarwyddwr y Ganolfan Ragoriaeth ar gyfer Twbercwlosis Buchol ym Mhrifysgol Aberystwyth. Cyfarwyddwr Canolfan Ragoriaeth Sêr Cymru ar gyfer TB Buchol Cadeirio'r Grŵp Cynghori Technegol ar TB Buchol ar gyfer Llywodraeth Cymru Cynghorydd ad hoc i Sefydliad Iechyd Anifeiliaid y Byd ar dwbercwlosis buchol. Aelod o Grŵp Adolygu Godfray (2018 a 2025) yn cynghori Gweinidogion Defra ar y Strategaeth Dileu TB ar gyfer Lloegr. Cadeirio'r gynhadledd 'AberTB' flynyddol, gan ddod â milfeddygon, ffermwyr a llunwyr polisi at ei gilydd. Rhan o'r prosiect a ariennir gan UKRI sy'n datblygu synhwyrydd twbercwlosis newydd ar gyfer pobl ac anifeiliaid sy'n gallu cofnodi canlyniadau o fewn awr Yn rhan o Brosiect Sir Benfro a phrosiect TB buchol cyfatebol Gogledd Cymru Cynghorydd Gwyddonol Arweiniol i Brosiect Capasiti Profi Clefydau Anifeiliaid Llywodraeth Cymru Cadeirydd y Corff Adolygu Moeseg a Lles Anifeiliaid (AWERB) ym Mhrifysgol Aberystwyth
	Jennifer Bunyan Rheolwr Ansawdd a Labordy ar gyfer Canolfan a Labordai Milfeddygol¹, gyda ffocws sylfaenol ar y Prosiect Capasiti Profi Clefydau Anifeiliaid. Rheolwr Ansawdd a Labordy ar gyfer Canolfan a Labordai Milfeddygol¹ Arwain gweithgareddau gweithredol ac ansawdd labordy sy'n cefnogi'r Prosiect Capasiti Profi Clefydau Anifeiliaid Dros 25 mlynedd o brofiad yn gweithio mewn amgylcheddau labordy lefel gyfyngu uchel Profiad helaeth o reoli gwasanaethau diagnostig milfeddygol Cyn-Reolwr Gweithrediadau Labordy a Phrosiectau yn Biobest Laboratories Arbenigedd mewn gweithrediadau labordy, rheoli ansawdd a chyflawni prosiectau Cefnogi’r gwaith o ddarparu gwasanaethau labordy diogel, effeithiol ac o ansawdd uchel mewn amgylcheddau ymchwil diogel
	James Goillau Rheolwr Labordy Biolegol Prifysgol Aberystwyth, ac mae’n gweithio ar draws Canolfan a Labordai Milfeddygol¹ a Chanolfan Ragoriaeth Sêr Cymru ar gyfer Twbercwlosis Buchol i gefnogi gweithrediad diogel, cydsyniol ac effeithiol y cyfleusterau labordy lefel gyfyngu uchel. Rheolwr Labordy Biolegol, sy'n cefnogi cyfleusterau lefel gyfyngu uchel ledled y Brifysgol Yn gweithio yng Nghanolfan a Labordai Milfeddygol¹ a Chanolfan Ragoriaeth Sêr Cymru ar gyfer TB Buchol Yn gweithredu fel Cynghorydd Diogelwch Organebau a Addaswyd yn Enetig (GMO) a Swyddog Diogelwch Biolegol (BSO) y Brifysgol Wedi gweithio o’r blaen fel Rheolwr Labordy CL3 a Chynghorydd Iechyd, Diogelwch a Bioddiogelwch yn Sefydliad Pirbright Profiad o reoli cyfleusterau lefel gyfyngu uchel arbenigol a sicrhau cydymffurfiaeth reoleiddiol Goruchwylio gweithrediad a pharodrwydd labordai CL2 a CL3 ar gyfer gweithgareddau addysgu, ymchwil a masnachol Darparu cyngor arbenigol ar drin, storio, cyfyngu, gwaredu a chludo deunyddiau biolegol a deunyddiau a addaswyd yn enetig yn ddiogel Cefnogi cydymffurfiaeth â gofynion SAPO, COSHH a GMOCU a gofynion iechyd, diogelwch a llywodraethu amgylcheddol ehangach Datblygu a darparu hyfforddiant bioddiogelwch a chydymffurfiaeth arbenigol Arwain arolygiadau labordy, ymchwiliadau a gweithgareddau gwella parhaus i gryfhau diogelwch y labordai a safonau gweithredol
	Dr Bev Hopkins Gydymaith Ymchwil Milfeddygol yng Nghanolfan Ragoriaeth Sêr Cymru ar gyfer Twbercwlosis Buchol. Cyn-Ymchwilydd Arweiniol Clefydau Milfeddygol yng Nghanolfan Milfeddygaeth Cymru Wedi cynnal archwiliadau post-mortem i edrych am glefydau ac archwiliadau post-mortem ar foch daear fel rhan o astudiaeth Canfod Moch Daear Marw Ledled Cymru Profiadol mewn cynnal archwiliadau ac ymchwilio i glefydau milfeddygol Darlithydd ar y cynlluniau gradd Biowyddorau Milfeddygol a Gwyddor Filfeddygol. Hwyluso cydweithio â ffermwyr a milfeddygon ledled Cymru Cefnogi ymchwil a chyfnewid gwybodaeth ar draws mentrau iechyd anifeiliaid a thwbercwlosis buchol
	Dr Hefin Jones Ymchwilydd o fewn Canolfan Ragoriaeth Sêr Cymru ar gyfer Twbercwlosis Buchol. Cefnogi ymchwil sy'n ystyried rôl ymatebion imiwnedd mewn heintiau twbercwlosis buchol parhaus Cyfrannu at astudiaethau labordy sy'n canolbwyntio ar dwbercwlosis buchol a sut mae afiechydon yn datblygu Yn rhan o dîm Prifysgol Aberystwyth sy’n cyfrannu at brosiect a ariennir gan UKRI sy'n datblygu synhwyrydd twbercwlosis newydd ar gyfer pobl ac anifeiliaid sy'n gallu darparu canlyniadau o fewn awr Cefnogi gweithgareddau ymchwil sy'n cwmpasu clefydau heintus, imiwnoleg a diagnosteg twbercwlosis
	Dr. Amy Healey Ymchwilydd ôl-ddoethurol yng Nghanolfan Ragoriaeth Sêr Cymru ar gyfer TB Buchol ac mae’n cefnogi’r gwaith o fonitro Dilyniannu Genom Cyfan (WGS) Mycobacterium bovis. Yn cefnogi’r gwaith o fonitro Dilyniannu Genom Cyfan (WGS) M. bovis Yn defnyddio data genomig i ymchwilio i ddeinameg trosglwyddo epidemiolegol berthnasol Yn gweithio i nodi amrywiad genomig swyddogaethol ac ymaddasol mewn M. bovis Cyfrannu at brosiectau twbercwlosis buchol Sir Benfro a Gogledd Cymru Yn darparu gwyliadwriaeth arferol WGS i gefnogi amcanion prosiectau Yn arbenigo mewn cymhwyso dulliau genomig i ymchwil twbercwlosis buchol a monitro clefydau