4.11 Cynlluniau gradd Peirianneg Drydanol ac Electronig (BEng/MEng)

Yn berthnasol i bob myfyriwr sy'n dechrau Blwyddyn 1 ym mis Medi 2025

BEng Peirianneg Drydanol ac Electronig [163H]
BEng Peirianneg Drydanol ac Electronig [163F]
BEng Peirianneg Drydanol ac Electronig (gyda blwyddyn integredig mewn diwydiant) [163Y]
MEng Peirianneg Drydanol ac Electronig Gynaliadwy [163M]
MEng Peirianneg Drydanol ac Electronig Gynaliadwy (gyda blwyddyn integredig mewn diwydiant) [163I]

Dylid darllen y ddogfen hon ar y cyd â Rheoliadau ar gyfer Graddau Cychwynnol Modiwlar Prifysgol Aberystwyth, a'r Confensiynau Arholiadau canlynol: Gradd Baglor: Rheolau Symud Ymlaen, Graddau Meistr integredig: Rheolau Symud Ymlaen a Chynlluniau Gradd gyda Blwyddyn Ryng-gwrs, neu gynlluniau blwyddyn Integredig o Astudio Dramor nad ydynt yn ymwneud ag iaith.

Mae'r wybodaeth gyffredinol yn yr adrannau uchod yn berthnasol; fodd bynnag, ceir manylion wedi’u teilwra am reolau penodol i’r cynllun isod.

Y Sefydliad Peirianneg a Thechnoleg (IET)

1. Er mwyn cymhwyso ar gyfer y radd, rhaid i fyfyrwyr fodloni rheoliadau achredu'r Sefydliad Peirianneg a Thechnoleg (IET). Bydd Prifysgol Aberystwyth yn gweithio tuag at achrediad yr IET pan fydd y garfan gyntaf yn graddio yn 2028. Bydd achrediad IET yn ddarostyngedig i gymeradwyaeth gan IET ar y pryd.

2. Mae gan y Cyngor Peirianneg reolau penodol mewn perthynas â chydadferiad. Mae’r rhain yn berthnasol i bob rhaglen sydd wedi'u hachredu gan Gyrff Proffesiynol, Statudol a Rheoliadol (PSRB) sydd o dan drwydded gan y Cyngor Peirianneg.

3. Ar gyfer y rhaglenni hyn, mae'r Brifysgol yn cymhwyso diffiniad o gydadferiad sy’n gyson â diffiniad y Cyngor Peirianneg, fel a ganlyn:

Cydadferiad yw "Yr arfer o ganiatáu methiant ymylol (h.y. dim mwy na 10% yn is na'r marc pasio enwol) mewn un neu fwy o fodiwlau a dyfarnu credyd iddynt, yn aml ar sail perfformiad academaidd cyffredinol da". Gweler isod am reolau penodol i ddyfarniadau.

Rheolau Penodol Dyfarniadau

4. Gellir cydadfer uchafswm o 30 credyd mewn rhaglen gradd Baglor neu radd Meistr integredig (ac eithrio blwyddyn sylfaen). Mae'r amodau canlynol yn berthnasol:

a. Rhaid dynodi'r modiwl fel ‘cydadferol’ ym manyleb y rhaglen.

b. Ni ddylai’r modiwl fod yn brosiect unigol neu grŵp.

c. Nid yw'r isafswm marc modiwl y caniateir cydadferiad ar ei gyfer yn fwy na deg pwynt canran yn is na'r marc pasio modiwl enwol.

d. Rhaid i'r myfyriwr ennill marc cyfartalog o 40% o leiaf ar draws 120 credyd llawn yr asesiad yn y lefel, gan gynnwys unrhyw fodiwlau a fethwyd ac a gydadferwyd. Bydd y cyfartaledd gofynnol yn 50% yn lefel derfynol y rhaglen MEng.

5. Rhaid bodloni holl ganlyniadau dysgu AHEP. Os yw marc pasio wedi'i gyflawni ar gyfer y modiwl, ond mae un neu fwy o'r canlyniadau dysgu AHEP unigol a aseswyd o fewn y modiwl hwnnw yn cael eu methu, yn gyffredinol ystyrir bod yr unigolyn wedi methu’r modiwl a rhaid ei ail-sefyll.

6. Pan fo modiwlau’n cynnwys asesiadau lluosog (cydrannau) sy'n asesu gwahanol Ganlyniadau Dysgu, dylid mabwysiadu trothwy pasio, gyda'r trothwy pasio hwn ddim mwy na 10% yn is na marc pasio modiwl arferol.

Rheolau symud ymlaen BEng

Blwyddyn Sylfaen

7. Mae rheolau symud ymlaen safonol PA yn berthnasol (4.2 Gradd Baglor: Rheolau Symud Ymlaen/ 2.1 Rhan Un – myfyrwyr a ymunodd â Rhan Un O fis Medi 2018 ymlaen)

Blwyddyn Un

8. Bydd myfyrwyr yn pasio blwyddyn un os ydynt yn bodloni’r amodau a ganlyn yn yr asesiadau ar gyfer modiwlau blwyddyn un:

(i) ennill marc o 40% neu ragor mewn modiwlau sy’n werth 100 o gredydau

(ii) cyfartaledd pwysoli cyffredinol o 40% o leiaf.

(iii) dim methiannau o dan 30% (*Gofyniad digolledu y Cyngor Peirianneg)

Rhan Dau

9. Bydd y rheolau symud ymlaen canlynol ond yn berthnasol os nad yw myfyrwyr wedi rhagori ar y terfyn cydadferiad o 30 credyd ar draws y rhaglen gyfan (ac eithrio BS) fel y caniateir gan IET.

10. Er mwyn symud ymlaen o un flwyddyn astudio i'r llall, rhaid i fyfyrwyr basio o leiaf 100 credyd, gyda chyfartaledd o 40%, a heb unrhyw fethiannau o dan 30% (*gofyniad cydadferiad y Cyngor Peirianneg), ac eithrio modiwlau lefel 'S', h.y. marciau a enillwyd o flwyddyn ryng-gwrs.

Graddau Meistr Integredig (MEng)

Rhan Un

11. Bydd myfyrwyr yn pasio blwyddyn un os ydynt yn bodloni’r amodau a ganlyn yn yr asesiadau ar gyfer modiwlau blwyddyn un:

(i) ennill marc o 40% neu ragor mewn modiwlau sy’n werth 100 o gredydau

(ii) cyfartaledd pwysoli cyffredinol o 40% o leiaf.

(iii) dim methiannau o dan 30% (*Gofyniad cydadferiad y Cyngor Peirianneg)

Rhan Dau

12. Bydd y rheolau symud ymlaen canlynol ond yn berthnasol os nad yw myfyrwyr wedi rhagori ar y terfyn cydadferiad o 30 credyd ar draws y rhaglen gyfan fel y caniateir gan IET.

13. Er mwyn symud ymlaen o un flwyddyn astudio i'r llall, rhaid i fyfyrwyr basio o leiaf 100 credyd, gyda chyfartaledd o 40%, a heb unrhyw fethiannau o dan 30% (*gofyniad cydadferiad y Cyngor Peirianneg), ac eithrio modiwlau lefel 'S', h.y. marciau a enillwyd o flwyddyn ryng-gwrs.

14. Er mwyn aros ar yr MEng, bydd yn ofynnol i fyfyrwyr gyflawni cyfartaledd cyffredinol o 55% ym mlwyddyn 2 i symud ymlaen i'r drydedd flwyddyn. Bydd yn ofynnol i fyfyrwyr sy'n methu â chyflawni'r gofyniad sylfaenol hwn drosglwyddo i radd Baglor. Rhaid i fyfyrwyr basio'r ail flwyddyn i gael symud ymlaen i flwyddyn ddiwydiannol.

Blwyddyn ryng-gwrs

15. Mae rheolau symud ymlaen safonol PA yn berthnasol (4.5 Cynlluniau Gradd gyda Blwyddyn Ryng-gwrs, neu gynlluniau blwyddyn Integredig o Astudio Dramor nad ydynt yn ymwneud ag iaith).

Cymhwyster ar gyfer dyfarniad

16. I fod yn gymwys ar gyfer dyfarniad cynllun BEng Peirianneg Drydanol ac Electronig a MEng Peirianneg Drydanol ac Electronig Gynaliadwy, rhaid i fyfyrwyr basio'r holl fodiwlau ar draws Rhan Un (ac eithrio BS) a Rhan Dau, gan gynnwys lefel M; caniateir marciau pasio trwy gydadferiad o rhwng 30 a 39% (40 a 49% ar gyfer Lefel M) mewn hyd at 30 credyd ar draws y rhaglen gyfan (ac eithrio BS).

Dyfarniadau gadael

17. Bydd ymgeisydd sy’n ennill marc cyffredinol o 40% yn Rhan Un ond nad ydynt yn parhau â’u hastudiaethau yn gymwys i dderbyn Tystysgrif Addysg Uwch (TAU) Technoleg Electronig a Thrydanol (120 credyd ar Lefel 4), nad yw’n cael ei hachredu gan IET.

18. Bydd ymgeisydd sy’n ennill marc cyffredinol o 40% neu fwy ym mlwyddyn 2 ond nad ydynt yn parhau â’u hastudiaethau yn gymwys i dderbyn Diploma Addysg Uwch (DipAU) Technoleg Electronig a Thrydanol (120 credyd ar Lefel 5), nad yw’n cael ei hachredu gan IET.

19. Bydd ymgeisydd MEng sy'n ennill marc cyffredinol o 40% neu fwy ym mlwyddyn 3 ond nad ydynt yn parhau â’u hastudiaethau yn gymwys i dderbyn BEng mewn Technoleg Electronig a Thrydanol, nad yw wedi'i achredu gan IET, neu'r BEng achrededig mewn Peirianneg Electronig a Thrydanol os bodlonwyd y gofynion achredu proffesiynol (120 credyd ar Lefel-6).

20. Bydd ymgeisydd sy'n methu â chyflawni'r gofynion achredu proffesiynol a nodir uchod, ond sy'n bodloni rheoliadau graddau cychwynnol modiwlar PA, yn gymwys i dderbyn BEng / MEng mewn Technoleg Electronig a Thrydanol, nad yw wedi'i achredu gan IET.