Gwobr Sgiliau

Myfyriwr yn gweithio gyda cherbyd robotig

Mewn cydweithrediad ag Undeb Aber, rydym yn cyflwyno’r Wobr Sgiliau sy’n cydnabod ac yn clodfori popeth yr ydych yn ei wneud y tu allan i’ch cwrs – boed yn waith rhan-amser neu’n waith gwirfoddol yn y gymuned neu drwy glybiau a chymdeithasau. Dyma eich cyfle i ddathlu eich twf, cydnabod y sgiliau yr ydych wedi’u datblygu, a chael cymorth i ddangos eich sgiliau i gyflogwyr yn y dyfodol.  

I ennill y Wobr Sgiliau, bydd angen i chi:

  • Gofnodi o leiaf 60 awr o waith gyda thâl neu waith gwirfoddol
  • Nodi 8 sgìl yr ydych wedi’u datblygu drwy’r profiadau hynny
  • Mynychu tair sesiwn hyfforddiant a datblygu, a ddarperir gan y Gwasanaeth Gyrfaoedd a Chyflogadwyedd
  • Cwblhau dau ddarn myfyriol 150 o eiriau ynglŷn â’r sgiliau yr ydych wedi’u datblygu drwy eich profiad gwaith a thrwy fynychu sesiynau’r Gwasanaeth Gyrfaoedd a Chyflogadwyedd

Sut mae cael mynediad i’r Wobr

Gallwch gael mynediad i’r Wobr drwy wefan Undeb Aber. Nodwch y bydd angen i chi gofrestru ar gyfer Proffil Sgiliau a Gwirfoddoli er mwyn dechrau ar y broses o ennill y Wobr Sgiliau.

Sut mae cofnodi llawer o oriau ar yr un pryd

Er mwyn ennill y Wobr Sgiliau, bydd angen i chi gyflawni o leiaf 60 awr o brofiad gwaith a all gynnwys gwaith gyda thâl a gwaith gwirfoddol. Bydd modd i chi gofnodi llawer o oriau ar yr un pryd, a allai fod yn ddefnyddiol, yn enwedig os ydych yn cofnodi oriau’n ôl-weithredol.

Er mwyn cofnodi llawer o’ch oriau ar yr un pryd, bydd angen i chi:

  • Fewngofnodi i’ch Proffil Sgiliau a Gwirfoddoli ar wefan Undeb Aber
  • Dewis ‘cofnodi oriau’
  • Dewis y math o rôl sydd fwyaf perthnasol i chi (e.e. rolau gyda thâl, clwb a chymdeithas, gwirfoddolwyr)
  • Ychwanegu’r rôl, gan roi teitl a’r cyfnod yr ydych wedi bod ynddi
  • Ar ôl ychwanegu’r rôl, os cliciwch chi ar y teitl glas, bydd dau opsiwn newydd yn ymddangos, sef “ychwanegu sgìl” a “cofnodi oriau”
  • Yn yr opsiwn ‘cofnodi oriau’, gallwch ôl-ddyddio oriau os oes angen. Gallwch hefyd ddewis cyfnod hir a chynnwys yr oriau a weithiwyd yn lle cofnodi diwrnodau unigol
  • Nodwch mai dim ond hyd at 24 awr y gallwch eu cofnodi mewn un tro

Pa sesiynau sy’n cyfrif o ran hyfforddiant a datblygu

Yn rhan o’r Wobr Sgiliau, bydd angen i chi fynychu o leiaf tair sesiwn hyfforddiant a datblygu a ddarperir gan y Gwasanaeth Gyrfaoedd a Chyflogadwyedd. Rhaid bod y sesiynau hynny’n rhai allgyrsiol (nad ydynt yn digwydd yn ystod sesiynau sydd wedi’u hamserlennu) a gallant gynnwys y canlynol:

  • Sgyrsiau Gyrfaoedd
  • Gweithdai
  • Digwyddiadau

Gallwch weld yr holl sesiynau sydd ar gael drwy gyrfaoeddABER.

Sut mae cael mynediad i’r cofnodion myfyriol

Pan fyddwch wedi cofnodi eich oriau a’ch sgiliau, eich cam nesaf fydd ysgrifennu dau gofnod myfyriol 150 o eiriau am y sgiliau yr ydych wedi’u datblygu drwy sesiynau’r Gwasanaeth Gyrfaoedd a Chyflogadwyedd ac yn ystod eich profiad gwaith.

Nodwch: dim ond pan fyddwch wedi cyrraedd y trothwyau gofynnol, sef 60 awr ac 8 sgìl, y bydd y cofnodion myfyriol i’w gweld.

I gael mynediad i’r cofnodion myfyriol, dychwelwch i’ch Proffil Sgiliau a Gwirfoddoli.

Dan ‘Gwobr Sgiliau’, dylech weld tri phwynt bwled. Un o’r rheini yw “Please complete the submission | Llenwch y ffurflen hon os gwelwch yn dda” – dewiswch yr opsiwn hwn.

Bydd pen draw ar hyd eich sesiwn ar y wefan, felly rydym yn argymell eich bod yn cwblhau eich cofnodion myfyriol mewn dogfen Word ac yn copïo’r testun i mewn i’r blychau ateb ar gyfer testun rhydd.