Diwrnod Bwyd y Byd 2025: Law yn Llaw i sicrhau Bwydydd Gwell a Dyfodol Gwell

16 Hydref yw Diwrnod Bwyd y Byd, achlysur byd-eang i fyfyrio ar yr heriau a'r cyfleoedd wrth adeiladu system fwyd fwy cynaliadwy a theg. Mae’r thema eleni — "Law yn Llaw i sicrhau Bwydydd Gwell a Dyfodol Gwell" — yn cyd-daro’n gryf â chenhadaeth a gwerthoedd IBERS.

Yn IBERS, mae ein gweledigaeth yn glir:
Cynnal ymchwil i sicrhau y gall dynolryw gynhyrchu’r bwyd, y porthiant, a’r adnoddau diwydiannol sy’n seiliedig ar blanhigion y mae eu hangen yn gynaliadwy

O ddatblygu cnydau sy'n gallu gwrthsefyll yr hinsawdd i hyrwyddo systemau da byw cynaliadwy, mae ein gwaith yn dwyn ynghyd wyddonwyr, ffermwyr, partneriaid diwydiannol a llunwyr polisi - law yn llaw - i fynd i'r afael â materion pwysig diogelu cyflenwadau bwyd, colli bioamrywiaeth, a’r newid yn yr hinsawdd.

Gweithio Gyda'n Gilydd i Greu Effaith

Mae cydweithredu wrth wraidd yr hyn a wnawn. Boed hynny trwy ein partneriaethau â chymunedau amaethyddol, ein cyfraniadau at raglenni ymchwil cenedlaethol a rhyngwladol, neu ein hymrwymiad i hyfforddi'r genhedlaeth nesaf o fiowyddonwyr, mae IBERS yn helpu i lunio dyfodol lle mae bwyd gwell a dyfodol gwell yn mynd law yn llaw.

Mae ein hymchwil yn rhychwantu:

• Gwyddor Cnydau a Bridio Planhigion
  Datblygu amrywiadau newydd o gnydau porthiant, grawn ar gyfer iechyd a chnydau diwydiannol i wella cynhyrchiant, gwytnwch a gwerth maethol.
• Systemau Da Byw Cynaliadwy
  Ymchwil i faeth da byw, systemau amaethyddol, a ffermio manwl i leihau allyriadau a gwella cynhyrchiant. Darllenwch fwy am ein hymchwil i Systemau Da Byw Cynaliadwy yma: https://www.aber.ac.uk/cy/ibers/gwyddor-cnydau-a-bridio-planhigion/systemau-amaethyddol/
• Bio-economi a Bioburo
  Trawsnewid adnoddau sy'n seiliedig ar blanhigion yn gynhyrchion diwydiannol cynaliadwy ac ymchwilio i ddewisiadau amgen yn lle ffynonellau protein a fewnforir. Darllenwch fwy am ein hymchwil bioburo yma: https://www.aber.ac.uk/cy/ibers/gwyddor-cnydau-a-bridio-planhigion/bioeconomi/
• Datblygu Cnydau Gwydn
  Mae IBERS yn hyrwyddo ymchwil i rygwellt lluosflwydd, meillion, ceirch, miled perlog a mwy i gefnogi amaethyddiaeth sy'n gallu gwrthsefyll yr hinsawdd a chynhyrchu bwydydd iachach.

Prosiectau Enghreifftiol

Dyma rai o'r prosiectau arloesol y mae ymchwilwyr IBERS yn gweithio arnynt:

• Porfeydd  Uchel eu Siwgr i wella cynhyrchiant da byw
• Datblygu mathau mwy parhaus o feillion i ddarparu ffynhonnell gynaliadwy o brotein
• Bridio mathau newydd o geirch gyda gwell ansawdd melino er budd iechyd pobl
• Datblygu amrywiadau newydd o filed perlog i gynyddu eu gwydnwch i sychder a gwella iechyd pobl

Ar Ddiwrnod Bwyd y Byd, rydym yn gwahodd pawb - o ymchwilwyr a myfyrwyr i ffermwyr a defnyddwyr - i fyfyrio ar sut y gallwn weithio gyda'n gilydd i adeiladu system fwyd fwy cynaliadwy.

Rhannu