Prifysgol yn gofyn am farn y gymuned am ei darpariaeth gerdd

Dr Anwen Jones

Dr Anwen Jones

04 Tachwedd 2020

Mae Prifysgol Aberystwyth yn gofyn i’r cyhoedd fynegi eu barn ar ei darpariaeth gerdd, wrth iddi edrych i ledaenu’r buddion i’r gymuned leol.

Mae cyfraniad cerddorol y Brifysgol yn dyddio yn ôl i’w dyddiau cynnar yn 19eg ganrif. Ym 1895, cyfansoddodd Yr Athro Anwyl a'r Athro Ainsworth Davies 'Cân y Coleg' i ddathlu Dydd Gŵyl Dewi.

Ers ymhell dros ganrif, mae’r Brifysgol wedi cynnig llwyfan i berfformiadau yn yr Hen Goleg ar lan y môr yn Aberystwyth, sydd yn awr wrthi’n cael ei ailwampio. Ynghyd â darpariaeth yng Nghanolfan y Celfyddydau ar gampws Penglais, mae’n cynnig ysgoloriaethau cerddorol a rhaglen lawn o gyfleoedd i fwynhau ystod o eang cerddoriaeth mewn lleoliadau amrywiol ar draws Aberystwyth.

Bydd y Brifysgol yn cynnal arolwg ar-lein am ei darpariaeth gerdd tan 26 Tachwedd. Caiff canlyniadau’r arolwg eu defnyddio er mwyn llunio datganiad gweledigaeth cyn cynnal trafodaethau pellach mewn nifer o gyfarfodydd rhithiol.

Daw’r ymgynghoriad wrth i’r Brifysgol gynllunio penodi arweinydd newydd ar gyfer ei darpariaeth gerddorol dros y misoedd i ddod, fel rhan o’i hymrwymiad i gynnal ei lefelau presennol o fuddsoddiad. Tan yn ddiweddar, arweiniwyd y ddarpariaeth gerdd gan Dr David Russell Hulme, a ymddeolodd yn gynharach eleni.

Wrth lansio’r ymgynghoriad, meddai Dr Anwen Jones, Dirprwy Is-Ganghellor Prifysgol Aberystwyth: “Os ydych naill ai’n gerddor neu’n rhywun sydd yn caru cerddoriaeth o bob math, rydym am glywed gennych chi. Mae cerddoriaeth wrth wraidd ein dathliad o fywyd diwylliannol, cymdeithasol a gwleidyddol yn y Gymru gyfoes, ac yn hanesyddol. Â hithau wedi'i lleoli wrth galon y genedl, mae Prifysgol Aberystwyth wedi gwneud cyfraniad allweddol i draddodiad hir a balch Cymru o greu cerddoriaeth. Mae buddsoddiad parhaol y Brifysgol yn ei darpariaeth gerddorol yn tystio i'w hymroddiad iddi. Mae’r ymrwymiad a’r buddsoddiad hwnnw yn parhau, a hoffem wahodd pobl i ddweud eu dweud wrth inni lunio darpariaeth y dyfodol.

“Rydym yn edrych y tu hwnt i'r Coronafeirws tuag at oes newydd a fydd yn fwrlwm o greu cerddoriaeth, gwrando arni a meithrin cysylltiadau cerddorol. Rydym am ddarparu profiad cerddorol amrywiol ac eangfrydig, fydd yn lledaenu buddion cerddoriaeth i gymaint o’n cymuned ag sy’n bosibl; gan feithrin ein cyswllt drachefn â'n cynulleidfaoedd a'n cyfranogwyr presennol, ond gan fentro hefyd ar daith newydd a chyffrous.

“Rhan ganolog o genhadaeth y ddarpariaeth gerddorol yw cynnal y ddeinameg gyffrous gydweithredol o weithio sydd wrth galon y berthynas unigryw rhwng staff a myfyrwyr y Brifysgol a'r gymuned yn ehangach yn Aberystwyth. Rydym yn barod i ymroi i ddulliau, moddau a methodolegau cerddorol newydd, gan agor tirweddau newydd. Bydd hyn yn digwydd o dan arweiniad newydd dros y flwyddyn nesaf wrth i ni edrych i benodi arweinydd a fydd yn dod â syniadau ac arbenigedd penodol, a hefyd yn hwyluso'r strategaeth a fydd yn seiliedig ar adborth ein cymunedau.”

Mae arolwg ar-lein y Brifysgol ar gael drwy fynd i: https://www.aber.ac.uk/cy/music/shapethefuture/