Anrhydeddu daearyddwr am ymchwil ac addysgu rhagorol

Mae daearyddwr dawnus o Aberystwyth wedi derbyn gwobr am ei chyfraniad rhagorol i ymchwil wyddonol ac addysgu drwy gyfrwng y Gymraeg.

Cyflwynwyd Gwobr Eilir Hedd Morgan i Dr Cerys Jones gan y Coleg Cymraeg Cenedlaethol.

Sefydlwyd y wobr flynyddol er cof am Dr Eilir Hedd Morgan, ysgolhaig uchel ei barch a fu farw yn 2013 yn 29 mlwydd oed.

Mae’n cydnabod cyfraniad rhagorol academydd ifanc at ymchwil arloesol ac addysgu drwy gyfrwng y Gymraeg ym maes gwyddoniaeth.

Graddiodd Dr Cerys Jones gyda gradd anrhydedd dosbarth cyntaf mewn Daearyddiaeth Ffisegol a Mathemateg yn 2008.

Aeth ymlaen i gwblhau PhD ym Mhrifysgol Aberystwyth, gyda chefnogaeth Ysgoloriaeth Ôl-raddedig Addysgu Cyfrwng Cymraeg gan y Ganolfan Datblygu Addysg Uwch Cyfrwng Cymraeg.

Ers 2013, mae hi wedi gweithio fel darlithydd yn yr Adran Daearyddiaeth a Gwyddorau Daear, gan addysgu’n helaeth drwy gyfrwng y Gymraeg.

Wrth dderbyn y wobr, dywedodd Dr Jones:

"Hoffwn ddiolch i deulu Eilir Hedd ac i’r Coleg Cymraeg am yr anrhydedd hwn. Mae’r wobr yn cydnabod blaengarwch o ran ymchwil ac addysgu ym maes y Gwyddorau, felly mae’n fraint derbyn cydnabyddiaeth am fy nghyfraniad yn yr Adran Daearyddiaeth a Gwyddorau Daear ym Mhrifysgol Aberystwyth.

“Dwi’n angerddol dros roi’r profiad gorau i bob myfyriwr er mwyn sicrhau eu bod yn magu sgiliau hanfodol a’r gallu i barhau i ddefnyddio eu Cymraeg ym maes y gwyddorau.”

Cyflwynwyd y wobr yn yr Eisteddfod Genedlaethol yn Wrecsam ar 6 Awst 2025.