Ymchwilwyr IBERS ac Adran y Gwyddorau Bywyd yn cyfrannu at Gyfarfod Glaswelltiroedd LUNZ yn FarmED

Ymunodd ymchwilwyr o IBERS ac Adran y Gwyddorau Bywyd â chydweithwyr o bob cwr o'r DU ar gyfer Cyfarfod tîm Glaswelltiroedd LUNZ (Defnydd Tir ar gyfer Sero Net) a gynhaliwyd yn FarmED ar 22–23 Ionawr 2026.

Gan gynrychioli IBERS ac Adran y Gwyddorau Bywyd, rhannodd Simon Moakes, Pip Nicholas-Davies, a Mari Davies y cynnydd diweddar ar draws sawl pecyn gwaith o fewn prosiect Glaswelltiroedd LUNZ. Daeth y cyfarfod deuddydd â phartneriaid ynghyd sy'n gweithio i ddeall sut y gall systemau glaswelltir gefnogi natur, pobl ac uchelgeisiau sero-net ledled y DU.

Cyfraniadau IBERS ac Adran y Gwyddorau Bywyd

Cyflwynodd y tîm ddiweddariadau ar dri phecyn gwaith allweddol:

Pecyn Gwaith 1 - Llwybrau Defnyddio Glaswelltir (Adran y Gwyddorau Bywyd) – Pip Nicholas‑Davies ac Eleri Phillips

 Mae’r pecyn gwaith hwn yn cynllunio llwybrau defnyddio glaswelltir y DU yn y dyfodol gydag ystod amrywiol o randdeiliaid. Y nod yw nodi’r elfennau sy’n rhwystro ac yn galluogi yn ogystal â’r camau polisi sydd eu hangen i gefnogi cyfnod pontio cynaliadwy, derbyniol a hygyrch tuag at sero net.

Pecyn Gwaith 3 - Allyriadau Nwyon Tŷ Gwydr ar draws Systemau Porthiant (IBERS) – Christina Marley a Mari Davies
 Mae’r ymchwil hwn yn meintioli sut mae gwahanol strategaethau rheoli glaswelltir yn effeithio ar allyriadau nwyon tŷ gwydr y pridd a’r planhigion ar draws ystod o systemau porthiant cyferbyniol.

Pecyn Gwaith 4 - Asesiad Cylch Bywyd ar Lefel Fferm (IBERS) – Simon Moakes a Mari Davies
 Mae pecyn gwaith 4 yn defnyddio asesiadau cylch bywyd ar lefel fferm ar draws ffermydd glaswelltir cynrychioliadol yn y DU i ymchwilio i gyfaddawdau, llwybrau sero-net, ac effeithiau arloesi ar allyriadau a charbon pridd.

Cydweithredu tuag at Sero Net

Rhoddodd y cyfarfod gyfle pwysig i ymchwilwyr ar draws consortiwm LUNZ rannu gwybodaeth, cysoni dulliau, a chynllunio’r camau nesaf ar gyfer y prosiect Glaswelltiroedd. Mae IBERS ac Adran y Gwyddorau Bywyd yn parhau i chwarae rhan ganolog wrth ddatblygu mewnwelediadau sy'n seiliedig ar dystiolaeth a fydd yn siapio systemau glaswelltir mwy cynaliadwy a gwydn.

Caiff prosiect Glaswelltiroedd LUNZ ei gyd-ariannu gan Ymchwil ac Arloesi y DU (UKRI), DEFRA (ar ran Cymru a Lloegr), yr Adran Diogeledd Ynni a Sero Net, yr Adran Gwyddoniaeth, Arloesi a Thechnoleg, Llywodraeth Cymru, Gweithrediaeth Gogledd Iwerddon, a Llywodraeth yr Alban. 

Rhannu