Ymgeisio i Brifysgol Aberystwyth
Yn Aberystwyth, mae digon o gyfleoedd a chefnogaeth i'th helpu i wneud y gorau o dy brofiad fel myfyriwr. Ymhlith y manteision mae:
- Sicrwydd llety i fyfyrwyr sy’n dewis byw yn neuaddau’r Brifysgol, gydag aelodaeth am ddim i'r ganolfan chwaraeon.
- Ysgoloriaethau a bwrsariaethau i helpu gyda chostau astudio a byw.
- Cerdyn Rheilffordd 16-25 am ddim i wneud teithio'n fwy fforddiadwy.
- Profiad myfyriwr mwy fforddiadwy: mae Aberystwyth ymhlith y 5 dinas rataf yn y DU am lety myfyrwyr (StudentCrowd, 2025).
→ Ymgeisia nawr drwy UCAS.com
Neu dilyna ein canllaw cam wrth gam ar sut i wneud cais.
Dod o hyd i gwrs
Gyda dewis eang o gyrsiau israddedig, mae cyfle i ddod o hyd i gwrs sy'n ennyn dy ddiddordeb a gweld pa gyfleoedd allai godi ohono.
Bywyd Myfyrwyr
Yn ôl yr Arolwg Cenedlaethol o Fyfyrwyr 2025, Aberystwyth yw’r brifysgol orau yng Nghymru o ran bodlonrwydd myfyrwyr. Mae Prifysgol Aberystwyth yn cynnig campws hardd ger y lli gyda chymuned groesawgar a chynhwysol. Gyda dros 100 o glybiau a chymdeithasau, mae digon o gyfleoedd i fwynhau bywyd y tu hwnt i dy astudiaethau.
Ein Lleoliad
Ar arfordir gorllewin Cymru, mae Aberystwyth rhwng y mynyddoedd a’r môr, gyda’r promenâd yn agos iawn at y campws. Mae Parciau Cenedlaethol Eryri a Sir Benfro hefyd yn hawdd eu cyrraedd, gan wneud Aberystwyth yn lle gwych i fwynhau’r awyr agored. Mae Aberystwyth hefyd yn Ddinas Llên UNESCO. Gyda’i diwylliant dwyieithog a chreadigol a’i hamgylchedd naturiol, mae’n cynnig y gorau o ddau fyd i fyfyrwyr.
Ysgoloriaethau a Bwrsariaethau
Rydym yn cynnig amrywiaeth o wobrau i helpu gyda chostau astudio, gan gynnwys y Wobr Rhagoriaeth Academaidd ac Ysgoloriaethau a Gwobrau Teilyngdod Prifysgol Aberystwyth.
Mae cyfle hefyd i gael cymorth ariannol ychwanegol drwy astudio drwy’r Gymraeg, gan gynnwys ysgoloriaethau’r Coleg Cymraeg Cenedlaethol a Bwrsariaeth Astudio drwy’r Gymraeg Prifysgol Aberystwyth.
Llety
Rydym yn gwarantu llety i holl fyfyrwyr y flwyddyn gyntaf sy’n dewis byw yn neuaddau’r Brifysgol. Mae myfyrwyr sy’n byw yn llety’r Brifysgol hefyd yn cael aelodaeth Blatinwm am ddim i ganolfan chwaraeon y Brifysgol, gyda mynediad diderfyn i’r cyfleusterau a’r dosbarthiadau ffitrwydd.
Astudio Dramor
Mae cyfle i astudio neu weithio dramor ar bron bob cynllun gradd. Mae modd treulio semester neu flwyddyn yn un o’n prifysgolion partner, neu fynd ar leoliad gwaith sy’n gysylltiedig â’th radd. Mae ein tîm Cyfleoedd Byd-eang yma i’th helpu i ddod o hyd i’r opsiwn sy’n addas i ti.
Profiad gwaith a Blwyddyn mewn diwydiant
Mae llawer o’n cyrsiau yn cynnig blwyddyn integredig mewn diwydiant, gan roi profiad gwaith gwerthfawr a sgiliau i wella dy ragolygon gyrfa. Mae modd cael profiad hefyd drwy leoliadau profiad gwaith, gyda chefnogaeth ein Gwasanaeth Gyrfaoedd i ddod o hyd i gyfleoedd addas.
Ymchwil
Mae ein gwaith ymchwil yn cael ei gydnabod yn rhyngwladol fel ymchwil arweiniol ar lefel fyd-eang (FfRhY 2021), ac mae’n cyfrannu at brosiectau pwysig ar faterion fel newid hinsawdd ac iechyd byd-eang. Yn y dosbarth, bydd cyfle i ddysgu gan arbenigwyr yn eu meysydd sy’n defnyddio’u hymchwil yn eu haddysgu.
