Ffeiliau Canllaw

Isod mae dolenni ar gyfer copïau y gellir eu hargraffu o Ganllaw RMP Blackboard ar gyfer staff:

IPG Blackboard Word

IPG Blackboard PDF

Canllaw IPG

Blackboard yw amgylchedd dysgu ar-lein Prifysgol Aberystwyth (PA). Mae gan bob modiwl PA ei safle cwrs ei hun ar Blackboard. Mae'r Isafswm Presenoldeb Gofynnol (IPG) yn rhoi cysondeb er mwyn i fyfyrwyr allu dod o hyd i'r cynnwys y mae arnynt ei angen.  

Nid yw'r IPG yn berthnasol i gyrsiau Aber Ar-lein sydd â'u safonau a'u gofynion eu hunain.I gael rhagor o wybodaeth am gyrsiau Aber Ar-lein, cysylltwch ag aberarlein@aber.ac.uk.

I gael cymorth i ddefnyddio Blackboard, gweler ein canllaw staff ar gyfer Blackboard. Os oes gennych unrhyw gwestiynau am Blackboard, cysylltwch â’r Tîm Addysg Ddigidol (eddysgu@aber.ac.uk). 

Hygyrchedd 

Dylai'r holl gynnwys a uwchlwythir ac a gynhyrchir ar Blackboard fod mor hygyrch â phosib i sicrhau bod pob myfyriwr yn gallu ei ddefnyddio. Gweler Cyfarwyddyd PA ar Greu Deunyddiau Dysgu Hygyrch PA i gael rhagor o wybodaeth. Mae Blackboard Ally ar gael ym mhob cwrs a dylai staff gynnal safle’r cwrs drwy ddefnyddio’r adroddiad cwrs a thrwy ddatrys unrhyw broblemau sy’n codi. 

Sgôr Ally o 70% neu uwch yw’r IPG safonol ym mhob cwrs. 

Templed

Mae pob un o safleoedd cyrsiau PA Blackboard yn defnyddio templed y cytunwyd arno sydd â lle ar gyfer gwybodaeth graidd ynghyd â chynnwys y cytunwyd arno ar gyfer polisïau ar lefel Prifysgol. Cytunir ar y templed ar gyfer cyrsiau bob blwyddyn gan y Pwyllgor Ansawdd a Safonau. Cydlynwyr y Modiwlau sy’n gyfrifol am drefn y deunyddiau yn eu cyrsiau. Ni ddylai staff ddileu cynnwys templed. 

Ardal Gwybodaeth Modiwl 

Dylai’r ardal gwybodaeth am y modiwl gynnwys y canlynol: 

• Amlinelliad o'r modiwl, nodau a deilliannau dysgu. Gellir darparu llawlyfr modiwl y gellir ei lawrlwytho ar wahân sy'n cynnwys yr wybodaeth hon.  

• Deunyddiau cyflwyno i helpu myfyrwyr i ymgyfarwyddo â gofynion y modiwl, wedi'u trefnu mewn un ffolder. Darparwch gyfarwyddiadau clir i fyfyrwyr ar sut i ymgymryd â'r modiwl a'r gweithgareddau dysgu. 

• Dolen i unrhyw wybodaeth iechyd a diogelwch berthnasol ar gyfer astudio'r modiwl, gan gynnwys asesiadau risg lle bo hynny'n berthnasol. 

• Gwybodaeth am staff sy'n dysgu'r cwrs gan gynnwys manylion cyswllt ac phryd maent ar gael, sut i drefnu cyfarfod (yn bersonol neu ar-lein) a pha bryd y dylai myfyrwyr ddisgwyl cael ateb i ymholiad. 

• Manylion am sut y gall myfyrwyr roi adborth ar y modiwl, a gofyn cwestiynau am y modiwl. 

• Dolen i offer Cwrs Holl Fideos Panopto.  

• Uwchlwytho cynllun gweithredu’r ABM (gweler Polisi Cloriannu Modiwlau). 

Lleoliad trefnus ar gyfer Deunyddiau Dysgu 

Dylid creu strwythur ffolder neu Fodiwl Dysgu ar gyfer Deunyddiau Dysgu. Er mwyn i staff gael bod yn gyfrifol am y ffordd y trefnir y cynnwys, nid ydym wedi pennu strwythur penodol.  

Dylai'r staff sicrhau: 

• Bod y cynnwys wedi’i drefnu'n glir gyda ffolderi /Modiwlau Dysgu yn ôl wythnosau neu bynciau (gweler y canllawiau ar greu cynnwys i gael rhagor o wybodaeth). 

• Bod yr holl gynnwys, gan gynnwys ffolderi / Modiwlau Dysgu, yn cael eu henwi'n glir ac yn gyson. 

• Bod yr holl ddeunyddiau dysgu perthnasol yn cael eu huwchlwytho i safle'r cwrs ar Blackboard – mae hyn yn cynnwys sleidiau PowerPoint, taflenni, nodiadau neu ddeunyddiau ategol eraill. 

• Bod yr holl ddeunyddiau perthnasol i sesiwn ddysgu yn cael eu huwchlwytho 1 diwrnod gwaith cyn i’r sesiwn ddigwydd. Noder y bydd gan rai myfyrwyr gofnod o ddarpariaeth cymorth sy'n gofyn am uwchlwytho deunyddiau yn gynharach – bydd yr amserlen a nodir gan y cofnod bob amser yn cael blaenoriaeth. 

• Bod y deunydd yn parhau i fod ar gael ar ôl i fyfyrwyr eu gweld.Dylid cuddio deunyddiau i sicrhau uniondeb asesu’n unig a dylid eu gwneud ar gael eto ar ôl i'r broses asesu gael ei gwblhau. 

• Bod y gweithgareddau dysgu'n cael eu hychwanegu ochr yn ochr â'r deunyddiau ategol perthnasol (adnoddau dysgu). 

• Cyfarwyddiadau clir i fyfyrwyr ar beth i'w wneud gyda phob adnodd. 

• Rhaid i'r holl ddeunyddiau dysgu fod mor hygyrch â phosib. Os na ellir gwneud rhai eitemau yn gwbl hygyrch, eglurwch pam a chyfeiriwch at y canllaw ar ddefnyddio Blackboard Ally. Gweler y Cyfarwyddyd ar Greu Deunyddiau Dysgu Hygyrch i gael mwy o wybodaeth. 

• Bod dolenni i recordiadau Panopto unigol yn cael eu cynnwys ochr yn ochr â’r deunyddiau/gweithgareddau dysgu. I gael arweiniad ar recordio darlithoedd byw, gweler Polisi Cipio Darlithoedd PA. I gael arweiniad ar ddarlithoedd a recordiwyd ymlaen llaw, gweler Sut i sicrhau bod recordiadau anghydamserol yn ennyn brwdfrydedd ac yn rhyngweithiol.

• Bod yr holl gynnwys a ddefnyddir yn cydymffurfio â deddfwriaeth hawlfraint. 

Ardal Asesu ac Adborth 

Dylai'r ffolder asesu ac adborth gynnwys: 

• Cyfarwyddiadau am yr aseiniad cyn dechrau'r addysgu.Dylai'r rhain gynnwys disgrifiad o'r aseiniad, meini prawf marcio, a dyddiadau cau. 

• Datganiad ar lefel y defnydd derbyniol ar gyfer DA Cynhyrchiol ym mhob aseiniad.Gellir copïo'r rhain o'r Gadwrfa Gwrthrychau Dysgu neu eu creu gan gydweithwyr. 

• Mannau cyflwyno aseiniadau gyda gwybodaeth lawn gan gynnwys y dyddiad a’r amser hwyraf y ceir cyflwyno’r aseiniad. 

• Pwy y dylid cysylltu â hwy os yw myfyrwyr yn cael trafferth yn cyflwyno aseiniadau. Cyfeiriwch y myfyrwyr at y Tîm Addysg Ddigidol i gael cymorth technegol ( eddysgu@aber.ac.uk).  

Ardal (gudd) Arholwyr Allanol 

Dylai'r ffolder hon gynnwys: 

• Eitemau yr hoffech i'r Arholwr Allanol eu gweld. 

• Aseiniadau wedi'u marcio a lawrlwythwyd ar gyfer eu safoni. 

• Tystiolaeth o brosesau safoni. 

• Ni ddylai'r ffolder hon fyth fod yn weladwy i fyfyrwyr. 

• Copi o ganllawiau Turnitin (ar gyfer staff y Gofrestrfa sy’n gosod mannau cyflwyno estyniad). 

Rhestr Ddarllen Aspire 

Dylid ychwanegu’r rhestr ddarllen Aspire fel eitem ar wahân (yn hytrach nag mewn ffolder) a’i gosod ar y tab Cynnwys fel un o'r chwe eitem uchaf (gweler Polisi Rhestr Ddarllen). 

Cyrsiau wedi’u Cyfuno 

Pan fo cyrsiau Saesneg a Chymraeg wedi'u cyfuno gyda’r cwrs Saesneg yn brif gwrs, dylid uwchlwytho'r canlynol yn Gymraeg: 

• Llawlyfr modiwl (os defnyddir llawlyfr modiwlau Saesneg). 

• Cyfarwyddiadau am yr aseiniad, gan gynnwys disgrifiad o’r aseiniad, meini prawf marcio, dyddiadau cyflwyno a datganiad ar lefel y defnydd derbyniol o DA Cynhyrchiol. 

• Dolen i'r rhestr ddarllen ar gyfer y cwrs Cymraeg (neu defnyddiwch y rhestr Saesneg ar gyfer adnoddau Cymraeg gweler y Cwestiwn Cyffredin am arweiniad). Gweler canllawiau'r Coleg Cymraeg ar ddarpariaeth cyfrwng Cymraeg i gael gwybodaeth am ofynion ar gyfer Cyrsiau cyfrwng Cymraeg. 

Dylid uwchlwytho unrhyw adnoddau dysgu cyfrwng Cymraeg a gynhyrchir ar gyfer y cwrs. Anogir staff i ddefnyddio'r templed Cymraeg dwyieithog ar gyfer cyrsiau Cymraeg / Saesneg wedi’u cyfuno.

Mae'r Polisi hwn yn cael ei gynnal gan y Gwasanaethau Gwybodaeth. Fe'i adolygwyd ddiwethaf ym mis Chwefror 2026 gan y Pwyllgor Ansawdd a Safonau a bydd yn cael ei adolygu eto ym mis Chwefror 2027. / This Policy is maintained by Information Services, was last reviewed by Quality and Standards Committee in February 2026 and is due for review in February 2027.